រាជធានីភ្នំពេញ ៖ គ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយរថយន្តមួយគ្រឿង បណ្តាលអោយម៉ូតូវេចខ្នងកង់ខាងមុខ ចំណែកខាងរថយន្តរងការខូចខាយទ្វារខាងក្រោយចំហៀងខាងឆ្វេង ប៉ុន្តែករណីនេះមិនមានអ្នករងរបួសទេ ។ ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងជាង១០យប់ថ្ងៃទី២៣ ខែមិថុនា ឆ្នាំ២០១៩នេះ…
រាជធានីភ្នំពេញ ៖ គ្រោះថ្នាក់ចរាចរណ៍រវាងម៉ូតូមួយគ្រឿងបុកជាមួយរថយន្តមួយគ្រឿង បណ្តាលអោយម៉ូតូវេចខ្នងកង់ខាងមុខ ចំណែកខាងរថយន្តរងការខូចខាយទ្វារខាងក្រោយចំហៀងខាងឆ្វេង ប៉ុន្តែករណីនេះមិនមានអ្នករងរបួសទេ ។
ហេតុការណ៍គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោងជាង១០យប់ថ្ងៃទី២៣ ខែមិថុនា ឆ្នាំ២០១៩នេះ នៅត្រង់ចំណុចផ្លូវបំបែកជាបួន លើផ្លូវ៣៦០ កែងផ្លូវ១៤៣ សង្កាត់អូរឡាំពិក ខណ្ឌបឹងកេងកង (អតីតខណ្ឌចំការមន) រាជធានីភ្នំពេញ។
ភាគីខាងម៉ូតូមួយគ្រឿងម៉ាកហុងដាឌ្រីម ពណ៍ខ្មៅ ពាក់ស្លាកលេខ ភ្នំពេញ ១GG-៥៧៤៦ បើកបរដោយបុរសម្នាក់មិនស្គាល់អត្តសញ្ញាណ ។ ចំណែកភាគីខាងរថយន្តមួយគ្រឿងម៉ាកព្រូស ពណ៌ស ពាក់ស្លាកលេខ ភ្នំពេញ ២AD-២១៧១ បើកបរដោយនារីម្នាក់មិនស្គាល់អត្តសញ្ញាណ ។
តាមប្រភពព័ត៌មានពីកន្លែងកើតហេតុបានរៀបរាប់ប្រាប់ឱ្យដឹងថា នៅមុនពេលកើតហេតុ គេបានឃើញ បុរសម្នាក់សង្ស័យស្ថិតក្នុងស្ថានភាពស្រវឹងស្រឿងៗបានបើកបរម៉ូតូមួយគ្រឿងម៉ាកហុងដាឌ្រីម ពណ៍ខ្មៅ ទើបចេញពីជួបជុំគ្នានៅកន្លែងធ្វើការ ធ្វើដំណើរតាមផ្លូវ៣៦០ ក្នុងទិសដៅពីកើតមកលិច លុះមកដល់ចំណុចផ្លូវបំបែកជាបួនកែងផ្លូវ១៤៣ ដែលជាចំណុចកើតហេតុខាងលើ ស្រាប់តែមាននារីរូបស្រស់ម្នាក់ បើកបររថយន្តមួយគ្រឿងម៉ាកព្រូស ពណ៌ស ធ្វើដំណើរតាមផ្លូវ១៤៣ ទិសដៅពីជើងមកត្បូង ក្នុងល្បឿនលឿន និងមិនគោរពស្លាកសញ្ញាចរាចរណ៍ (ឈប់) ធ្វើឲ្យអ្នកបើកបរម៉ូតូចាប់ហ្វ្រាំងមិនទាន់ ក៏ជ្រុលទៅបុករថយន្តរបស់នារីរូបស្រស់នោះពេញទំហឹងតែម្តង ។
តាមប្រភពដដែលបានបន្តថា ក្នុងហេតុការណ៍នោះ បណ្ដាលឱ្យរថយន្តនិងម៉ូតូរងការខូចខាតយ៉ាងដំណំ តែសំណាងល្អ មិនមានមនុស្សណាម្នាក់រងរបួសធ្ងន់ធ្ងរនោះទេ គ្រាន់តែដោះស្រាយគ្នាមិនត្រូវគ្នា ព្រោះភាគីខាងរថយន្តបានហៅបុរសម្នាក់ដែលគេស្គាល់ថាជាប្រធានក្រុម Never Care និងបុរសម្នាក់ផ្សេងទៀតមកដល់កន្លែងកើតហេតុ ដើម្បីឱ្យជួយដោះស្រាយ និងទារសំណងពីបុរសជាអ្នកបើកបរម៉ូតូចំនួន២០០ដុល្លារ តែខាងអ្នកបើកបរម៉ូតូមានលទ្ធភាពត្រឹមតែ៨០ដុល្លារប៉ុណ្ណោះ ទើបភាគីម្ចាស់រថយន្តដែលមានបុរសម្នាក់ដែលគេស្គាល់ថាជាប្រធានក្រុម Never Care ប្រកែកមិនទទួលយកសំណង៨០ដុល្លារនោះទេ ព្រោះយកទៅជួសជុលរថយន្តក៏មិនគ្រប់ដែរ ។
តាមប្រភពដដែលបានបន្តទៀតថា ដោយសារការដោះស្រាយមិនត្រូវគ្នាបែបនេះ ទើបបង្កឲ្យមានការភ្ញាក់ផ្អើលដល់បងប្អូនប្រជាពលរដ្ឋរាយការណ៍ប្រាប់សមត្ថកិច្ចចុះមកជួយសម្របសម្រួល តែភាគីទាំងសងខាងធ្វើការដោះស្រាយមិនត្រូវគ្នាទៀត ទើបប្រគល់ឱ្យសមត្ថកិច្ចផ្នែកវាស់វែងចរាចរណ៍ខណ្ឌចំការមនចុះមកវាស់វែងតែម្ដង។
ក្រោយពេលកើតហេតុ សមត្ថកិច្ចប៉ុស្តិ៍អូរឡាំពិកបានទាក់ទងហៅផ្នែកវាស់វែងនៃអធិការនគរបាលខណ្ឌចំការមន ចុះមកពិនិត្យមើល និងវាស់វែង រួចយករថយន្តនិងម៉ូតូយកទៅរក្សាទុកបណ្ដោះអាសន្ន ដើម្បីរង់ចាំធ្វើការដោះស្រាយបន្តតាមផ្លូវច្បាប់៕ (កែសម្រួលដោយ ៖ ធីតា)
ចែករំលែកព័តមាននេះ