រាជធានីភ្នំពេញ ៖ សេចក្តីរាយការណ៍បានឱ្យដឹងថា បើគិតមកត្រឹមម៉ោងជាង៨ព្រឹក ថ្ងៃទី២៤ ខែមិថុនា ឆ្នាំ២០១៩ អ្នកដែលស្លាប់ដោយសារការបាក់អគារនៅខេត្តព្រះសីហនុ បានរកឃើញ មានចំនួន២៥នាក់…
រាជធានីភ្នំពេញ ៖ សេចក្តីរាយការណ៍បានឱ្យដឹងថា បើគិតមកត្រឹមម៉ោងជាង៨ព្រឹក ថ្ងៃទី២៤ ខែមិថុនា ឆ្នាំ២០១៩ អ្នកដែលស្លាប់ដោយសារការបាក់អគារនៅខេត្តព្រះសីហនុ បានរកឃើញ មានចំនួន២៥នាក់ និងរងរបួសចំនួន២៤នាក់ហើយ នៅក្នុងគំនរនៃបំណែកអគារនោះ ហើយខណៈពេលនេះ ក្រុមសង្គ្រោះនៅតែបន្តស្វែងរកមនុស្សនៅឡើយដែលគេមានការសង្ស័យថា អាចមានមនុស្សនៅក្នុងគំនរអគារដួលរលំនេះបន្តទៀត ។
សូមបញ្ជាក់ថា កាលពីថ្ងៃទី២២ ខែមិថុនាកន្លងមកនេះ លោក កឹម សុខា អតីតប្រធានគណបក្សសង្គ្រោះជាតិ ដែលកំពុងជាប់នៅក្នុងផ្ទះបានអំពាវនាវឲ្យមានការផ្តល់យុត្តិធម៌ដល់ជនរងគ្រោះដែលស្លាប់ និងរងរបួសដល់នៃឧប្បត្តិហេតុនៃការបាក់អគារនៅខេត្តព្រះសីហុ ។
យោងតាមសារដ៏ដល់កម្ររបស់អតីតមេបក្សប្រឆាំងសរសេរលើបណ្តាញសង្គមកាលពីថ្ងៃទី២៣ ខែមិថុនា បានលើកឡើងយ៉ាងដូច្នេះថា «ខ្ញុំ កឹម សុខា និងភរិយា មានសេចក្តីរន្ធត់ និ ងសោកស្តាយយ៉ាងខ្លាំងក្រៃលែងចំពោះកម្មករសំណង់ខ្មែរក្រីក្រដែលទទួលរងគ្រោះស្លាប់ និងរងរបួសយ៉ាងច្រើនដោយបណ្តាលមកពីការរលំបាក់អគារសំណង់របស់ចិននៅខេត្តព្រះសីហនុ នាព្រឹកថ្ងៃទី២២ ខែមិថុនា ឆ្នាំ២០១៩នេះ»។
លោកបញ្ជាក់ថា «ខ្ញុំសូមចូលរួមរំលែកទុក្ខចំពោះជនរងគ្រោះ និងក្រុមគ្រួសារសពទាំងអស់ដោយក្តីក្រៀមក្រំបំផុត។ ខ្ញុំក៏សូមអំពាវនាវឲ្យមានការផ្តល់យុត្តិធម៌ជូនជនរងគ្រោះដោយផ្តល់សំណង និងផ្តន្ទាទោសចំពោះអ្នកទទួលខុសត្រូវទាំងឡាយដែលពាក់ព័ន្ធឲ្យបានសមរម្យ ហើយក៏សូមឲ្យរកមូលហេតុដែលបង្កឲ្យមានគ្រោះថ្នាក់ និងមានវិធានការបង្ការទប់ស្កាត់កុំឲ្យហេតុការណ៍បែបនេះកើតមានដដែលៗតទៅទៀត»។
សូមជម្រាបថា អ្នកដែលស្លាប់ដោយសារការបាក់អគារនៅខេត្តព្រះសីហនុ គិតមកត្រឹមម៉ោង ៦កន្លះ ថ្ងៃទី២៤ ខែមិថុនា មានគេបានរកឃើញអ្នកស្លាប់នៅក្នុងគំនរ នៃបំណែកអគារមានចំនួន២៤នាក់ និងរងរបួសចំនួន២៤នាក់ នេះបើតាមរដ្ឋបាលខេត្តព្រះសីហនុ៕ (កែសម្រួលដោយ ៖ បុប្ផា)
ចែករំលែកព័តមាននេះ