មាតាបិតាជាព្រះព្រហ្ម
មាតាបិតាប្រៀបបាននឹងព្រះព្រហ្មព្រោះមានធម៌បួនប្រការជាធម៌របស់ព្រះព្រហ្មគឺ មេត្តា សេចក្តីរាប់អាន សេចក្តីប្រោសប្រណី, ករុណា ការអាណិតអាសូរ, មុទិតា សេចក្តីត្រេកអរតាម និងឧបេក្ខា ចិត្តជាកណ្តាល…
មាតាបិតាប្រៀបបាននឹងព្រះព្រហ្មព្រោះមានធម៌បួនប្រការជាធម៌របស់ព្រះព្រហ្មគឺ មេត្តា សេចក្តីរាប់អាន សេចក្តីប្រោសប្រណី, ករុណា ការអាណិតអាសូរ, មុទិតា សេចក្តីត្រេកអរតាម និងឧបេក្ខា ចិត្តជាកណ្តាល ។ ធម៌បួនប្រការនេះតែងស្ថិតនៅក្នុងសន្តានរបស់ឪពុកម្តាយគ្រប់រូប ។
ដូច្នេះកូនប្រុសស្រីត្រូវចាំទុកក្នុងចិត្តជានិច្ចថា មាតាបិតាជាព្រះព្រហ្មរបស់បុត្រធីតា ការដែលធ្វើឱ្យមាតាបិតាលំបាកចិត្ត តឹងណែនក្នុងទ្រូង យំបង្ហូរទឹកភ្នែក គឺជាបាបកម្មដ៏ធ្ងន់ណាស់កូន ។ ខាងក្រោមនេះជាចំណុចសំខាន់ដែលកូនប្រុសស្រីត្រូវចងចាំជានិច្ច៖
១-ការជឿស្តាប់ដំបូន្មានល្អរបស់មាតាបិតា កូនរមែងមិនមានការសាបសូន្យឡើយ ពោលគឺមិនចចេសរឹងរូសតែម្យ៉ាង កូននឹងបានល្អគ្រប់យ៉ាងហើយ ។
២-ការតបស្នងព្រះគុណដល់អ្នកមានគុណ គឺតាំងតែពីអ្នកមានគុណនៅមានជីវិតរហូតដល់ចែកឋាន ។
៣-ការបំពេញតួនាទីជាកូនល្អ គឺជាការបដិបត្តិធម៌ កូនល្អត្រូវភ្ញាក់ខ្លួន ត្រូវរហ័សរហួនរវៀសរវៃ ត្រូវឈានទៅមុខ ត្រូវធ្វើការងារប្រជែងជាមួយពេលវេលា ដើម្បីកសាងខ្លួន និងដើម្បីការរីកចម្រើនដល់សង្គមជាតិ ។
៤-អបាយមុខ គ្រឿងញៀន ជាផ្លូវនៃសេចក្តីវិនាសសម្រាប់ជីវិតកូនត្រូវចេះពិចារណាដោយខ្លួនឯង ដាស់តឿនខ្លួនឯង កុំឡេះឡោះកុំទម្រន់ ត្រូវឆ្ងាយពីអបាយមុខ ស្រី ស្រា ល្បែង និងបាបមិត្ត ត្រូវដើរនៅក្នុងផ្លូវធម៌ជានិច្ច ។
៥-កូនកុំប្រមាទក្នុងជីវិត ផ្លូវនេះនៅជិតក្បែរមាត់ជ្រោះ ចិញ្ចឹមជីវិតឱ្យបានរស់ កូនត្រូវស្គាល់គ្រោះឱ្យជាក់លាក់ ឱ្យពិតប្រាកដ ។
៦-បាបមិត្តស្រីស្រានិងល្បែងភ្នាល់ ព្រមទាំងមិនខ្វល់នឹងធុរៈ ជាជ្រោះគ្រោះថ្នាក់ប្រាកដជាក់ ជ្រោះជ្រៅមិនរាក់ធ្លាក់បាក់កណាកូន ។
គោលធម៌ទាំង៦ប្រការនេះជាទិសដៅយ៉ាងសំខាន់ដឹកនាំជីវិតកូនប្រុសស្រីឱ្យបានរុងរឿង ចៀសផុតពីគ្រោះថ្នាក់ក្នុងដំណើរជីវិតនៅក្នុងសង្គម ។
ចែករំលែកព័តមាននេះ