វត្ដវ៉ា និង ស្រាបៀរ
– ទំនៀមទម្លាប់ភ្ជាប់ប្រពៃណី ជាតិខ្មែរប្រុសស្រីមិនដែលបោះបង់
ទោះនៅទីណាជ្រះថ្លាត្រាប់ត្រង់ បំពេញចំណង់ជាពុទ្ធសាសនិក ។
– ទំនៀមទម្លាប់ភ្ជាប់ប្រពៃណី ជាតិខ្មែរប្រុសស្រីមិនដែលបោះបង់
ទោះនៅទីណាជ្រះថ្លាត្រាប់ត្រង់ បំពេញចំណង់ជាពុទ្ធសាសនិក ។
– បុណ្យចូលឆ្នាំថ្មីមានន័យធំធេង ប្រុសស្រីចាស់ក្មេងសប្បាយពន្លឹក
ក្រោកពីព្រលឹមដាំបាយដាំទឹក ប្រគេនរំលឹកបុព្វការីគាត់ ។
– ល្បែងប្រពៃណីលេងជាហូរហែរ នៅក្នុងស្រុកខ្មែរស្ទើរតែគ្រប់វត្ដ
ឯអ្នកអាមេរិកមិនភ្លេចភ្លាំងភ្លាត់ ប្រមូលគ្នាគាត់ទៅវត្ដមួយថ្ងៃ ។
– មិនថាកឋិន ភ្ជុំបិណ្ឌ ចូលឆ្នាំ មានជាប្រចាំតន្ដ្រីសម័យ
ជួលមកកំសាន្ដសប្បាយអស់ដៃ រាំវង់ប្រពៃរាំក្បាច់សារ៉ាវ៉ាន់ ។
– រីម្ហូបចំណីមានឆីតាមចិត្ដ រួបរួមមូលមិត្ដដោយឥតប្រកាន់
វាតវង់ជុំគ្នាក្រោយពេលលោកឆាន់ ញុំាគ្រប់ចង្ហាន់ចំអាប បង្អែម ។
– តែនៅតិចសាស់វត្ដខ្លះបែរជា ដាក់លក់ស្រាបៀរលក់ទាំងគ្រឿងក្លែម
ផឹកស៊ីក្នុងវត្ដជាប់មាត់ផ្អែមល្ហែម អស់ថែមៗ សាច់ក្លែមសុរា ។
– វត្ដគឺជាទីគោរពបូជា ទីផ្ដល់សទ្ធាតាមផ្លូវសាសនា
គួរតែអស់លោកគណះកម្មការ គាត់ពិចារណាមុននឹងផ្ដល់សិទ្ធ ។
– ថ្វីបើពួកគាត់រស់ឆ្ងាយស្រុកខ្មែរ ពួកគាត់នៅតែជាខ្មែរពិតៗ
មិនគួរណាភ្លេចវប្បធម៍ព្រេងព្រឹទ្ធ មិនគួរប្រព្រឹត្ដខុសប្រពៃណី ។
តាមសំណូមពររបស់បងស្រីម្នាក់ដែលរស់នៅរដ្ឋតិចសាស់ សហរដ្ឋអាមេរិក។
ដោយ ព្រុំ គឹម ជឿន prumkimchoeun@gmail.com
ចែករំលែកព័តមាននេះ