រាជធានីភ្នំពេញ ៖ ក្នុងរយៈកាលប៉ុន្មានឆ្នាំចុងក្រោយនេះ មានអ្នកសិល្បៈជាបន្តបន្ទាប់ បានហ៊ានបញ្ចេញនូវ អត្តសញ្ញាណគូស្នេហ៍រៀបការ និងស្ថានភាពគ្រួសារ ដោយមិនខ្លាចបាត់បង់នូវប្រជាប្រិយភាពដូចកាលពីពេលមុនឡើយ ។ គេនៅមិនទាន់ច្បាស់ថា…
រាជធានីភ្នំពេញ ៖ ក្នុងរយៈកាលប៉ុន្មានឆ្នាំចុងក្រោយនេះ មានអ្នកសិល្បៈជាបន្តបន្ទាប់ បានហ៊ានបញ្ចេញនូវ អត្តសញ្ញាណគូស្នេហ៍រៀបការ និងស្ថានភាពគ្រួសារ ដោយមិនខ្លាចបាត់បង់នូវប្រជាប្រិយភាពដូចកាលពីពេលមុនឡើយ ។
គេនៅមិនទាន់ច្បាស់ថា ការផ្លាស់ប្តូរនូវឥរិយាបថខុសពីមុនទាំងស្រុងពីសំណាក់អ្នកសិល្បៈជុំវិញ បញ្ហាខាង លើនេះ អាចមានអ្វីដែលជម្រុញឲ្យពួកគេសម្រេចធ្វើបែបនេះឡើយ។
រឿងរ៉ាវមួយចំនួនទំនងអាចជាឧទាហរណ៍ជាក់ស្តែងមួយសម្រាប់ពួកគេ ក្នុងពេលដែលតារាល្បីៗមួយចំនួនដូចជាលោក ព្រាប សុវត្ថិ លោក ខេមរៈ សិរីមន្ត និងលោក ខាត់ ជេម ។ល។ ដែលពួកគេហ៊ានបញ្ចេញពីស្ថានភាពមានគ្រួសារ តែពួកគេនៅតែទទួលបានការគាំទ្រមិនថមថយឡើយ រហូតមកដល់បច្ចុប្បន្ន ។
ជាការកត់សម្គាល់ កំពូលតារាចម្រៀងលោក ព្រាប សុវត្ថិ ត្រូវបានគេដឹងជាយូរណាស់មកហើយថា លោក មានប្រពន្ធកូន ខណៈពេលដែលតារារូបនេះ ហាក់មិនបានប្រកែកចំពោះបញ្ហានេះឡើយ ។ ប៉ុន្តែចាប់ពីពេលនោះ រហូតមកដល់បច្ចុប្បន្ន កេរ្តិ៍ឈ្មោះនៅក្នុងវិស័យសិល្បៈចម្រៀងរបស់លោក នៅតែមិនថមថយឡើយ ពោលតារារូបនេះ នៅតែមានឈ្មោះបោះសម្លេង និងមានទីផ្សារខ្ពស់ដដែលនៅក្នុងវិស័យសិល្បៈ។
ដោយឡែក សម្រាប់លោក ខេមរៈ សិរីមន្ត និងលោក ខាត់ ជេម តែងតែបង្ហាញពីស្ថានភាពគ្រួសារ និងកូនរបស់ខ្លួនជាបន្តបន្ទាប់ផងដែរ ប៉ុន្តែប្រជាប្រិយភាពរបស់ពួកគេនៅតែមិនមានការថមថយឡើយ។
តារាចម្រៀងស្រីលំដាប់ជួរមុខ ក្នុងផលិតកម្មហង្សមាស អ្នកនាង ឱក សុគន្ធកញ្ញា ក៏បានសម្រេចចូល រោងការយ៉ាងបើកជំហរ ជាមួយប្អូនប្រុសថៅកែផលិតកម្មហង្សមាសកាលពីពេលថ្មីៗនេះ ។ ការសម្រេចរៀបការ ដោយបើកចំហររបស់ ឱក សុគន្ធកញ្ញា នាពេលនេះ គឺស្របពេលដែល នាងកំពុងតែហក់ឡើងកប់ កំពូលនូវប្រជាប្រិយភាព ប៉ុន្តែនាងហាក់មិនបានចាប់អារម្មណ៍ពីការបាត់បង់ប្រជាប្រិយភាពពេលចូល រោងការនេះឡើយ ។
តារាចម្រៀង មាស សុខសោភា ក៏មិនបានបាត់បង់ប្រជាប្រិយភាពខុសពីប៉ុន្មានឆ្នាំមុនឡើយ បើទោះបីជាពេល នេះនាងបានបង្ហាញមុខគូស្នេហ៍ដោយបើកចំហរ និងរងចាំតែថ្ងៃកាន់ដៃគ្នាចូល រោងការនោះក៏ដោយ។ តារារូបនេះ នៅតែមានប្រជាប្រិយភាព និងមានទីផ្សារសិល្បៈខ្ពស់ដដែល ទាំងក្នុងស្រុកនឹងក្រៅស្រុក ជាពិសេស តារារូបនេះ នៅតែរក្សាបាននូវអ្នកគាំទ្រច្រើនដដែល។
តារាចម្រៀងអ្នកនាង ពេជ្រ សោភា បានឈោងភាពល្បីល្បាញអស់ជាច្រើនឆ្ នាំរហូតមកដល់ពេលនេះ បើទោះបីជានាងត្រូវបានគេដឹងថា បានបែកបាក់គ្រួសារម្តងជាពីរដងក៏ដោយ។ ជាក់ស្តែង នៅអំឡុង
ពេលនេះ នាងក៏បានបង្ហាញពីការទំនាក់ទំនងស្នេហ៍ ដោយបើកចំហរជាមួយតារាសម្តែងវ័យក្មេងលោក
ឈឹម សក្តា ដោយមិនបានគិតពីការបាត់បង់នូវប្រជាប្រិយភាព ដែលនាងបានរក្សាអស់ជាច្រើនឆ្នាំនោះមកឡើយ ។ ពេជ្រ សោភា ត្រូវបានគេមើលឃើញថា នៅតែរក្សាតំណែងតួឯកនៅក្នុងផលិតកម្មដដែល បើទោះបីជាមាន តារាថ្មីៗ ចូលមកជាបន្តបន្ទាប់ក៏ដោយ ខណះពេលដែលបទចម្រៀងដែលនាង បានចេញម្តងៗនៅតែផ្ទុះក្នុងទីផ្សារដដែល។
តារាចម្រៀងនាង សួស វីសា ដែលបានចាប់ឈោងភាពល្បីល្បាញក្នុងរយះ ពេលប៉ុន្មាន ឆ្នាំចុង ក្រោយនេះ ក៏បានបើកចំហរ ពីទំនាក់ទំនងស្នេហ៍ជាមួយតារាសម្តែងលោក ថម មី។ មិនត្រឹមបង្ហាញ ពីទំនាក់ទំនងប៉ុណ្ណោះទេ ប៉ុន្តែនាងនៅបានបង្ហាញពីការភ្ជាប់ពាក្យផ្លូវការដោយ មិនក្រែងញញើត ពីការបាត់បង់ប្រជា ប្រិយភាពដែលកំពុងល្បីនោះឡើយ។
ជាការកត់សម្គាល់ មិនមែនតែតារាចម្រៀងប៉ុន្មាននាក់ខាងលើនេះ ដែលហ៊ានបញ្ចេញមុខគូស្នេហ៍ និងស្ថានភាពគ្រួសារ ជាសាធារណៈ ដោយមិនខ្លាចបាត់បង់ប្រជាប្រិយភាពនោះឡើយ ពោលគឺមានតារាសម្តែង ពិធីករ និងតារាកំប្លែងជាច្រើនទៀត ក៏មានស្ថានភាពដូចគ្នានេះ ។
ទោះជាយ៉ាងណា ក៏មានអ្នកសិល្បៈមួយចំនួនទៀត ដោយសារសម្រេចចិត្តរៀបការហ៊ានលះបង់ប្រជាប្រិយភាព និងបានបញ្ចប់អាជីពសិល្បៈរបស់ខ្លួនចោលទាំងស្រុង ដើម្បីកសាងជីវភាពគ្រួសារ ៕ (សម្រួលដោយ៖ ស្រីណា)
ចែករំលែកព័តមាននេះ