ខេត្តបន្ទាយមានជ័យ ៖ កាស៊ីណូឡាក់គីវីងក្រុងប៉ោយប៉ែត ត្រូវបានអាជ្ញាធរបិទអាជីវកម្មក្រោយពេលរកឃើញជនសង្ស័យ១៥៥នាក់ មានសារធាតុញៀនចំនួន១៤៤នាក់ ហើយសុំណំរឿងនេះកំពុងត្រូវបានអនុវត្តទៅតាមច្បាប់ ។ លោកវរសេនីយ៍ទោ ង៉េង សុជា ស្នងការរងនគរបាលខេត្ត ទទួលផែនប្រឆាំងគ្រឿងញៀនថ្លែងថា ដោយមានការដឹកនាំផ្ទាល់ពីលោកឧត្តមសេនីយ៍ទោ អាត់ ខែម ស្នងការនគរបាលខេត្ត និងលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត កម្លាំងនគរបាលខេត្ត សហការជាមួយនគរបាលក្រុងប៉ោយប៉ែត បានចុះបង្ក្រាប គ្រឿងញៀននៅកាស៊ីណូឡាក់គីវីង កាលពីវេលាម៉ោងប្រមាណ៣និង៣០នាទីរសៀលថ្ងៃទី១៨ដល់ថ្ងៃ១៩ ខែមិថុនា ដែលកាស៊ីណូនេះមានទីតាំងក្នុងសង្កាត់ប៉ោយប៉ែត ក្រុងប៉ោយ
ប៉ែត។
លោកស្នងការរងបញ្ជាក់ថា ប្រតិបត្តិការបង្ក្រាបគ្រឿងញៀននៅកាស៊ីណូឡាក់គីវីង ក្នុងក្រុងប៉ោយប៉ែតនេះ នគរបាលបានឃាត់ខ្លួនជនសង្ស័យជាបន្តបន្ទាប់ចំនួន១៥៥នាក់ក្នុងនោះស្រីចំនួន២នាក់ និងមានទាំងមេការកាស៊ីណូ២នាក់ បុគ្គលិកកាស៊ីណូចំនួន៤នាក់ និងដកហូតវត្ថុតាងគ្រឿងញៀន ប្រភេទមេតំហ្វេតាមីនហៅយ៉ាម៉ាចំនួន៥៤គ្រាប់ និងម៉ាទឹកកកចំនួន៧ថង់តូច កេតាមីន១កូនថង់ ។
លោកវរសេនីយ៍ទោ ង៉េង សុជា បន្តថា ក្រោយពេលឃាត់ខ្លួនជនសង្ស័យចំនួន១៥៥នាក់ និងវត្ថុតាងគ្រឿងញៀន ត្រូវបានបញ្ជូនមកស្នងការដ្ឋាននគរបាលខេត្ត ដើម្បីសាកសួរនិងធ្វើតេស្តរកឃើញសារធាតុញៀនចំនួន១៤៤នាក់ ដែលក្នុងនោះមានមេការកាស៊ីណូ២នាក់ គឺឈ្មោះ ស៊ុន សៀងហេង ភេទប្រុស អាយុ៤៧ឆ្នាំ មានស្រុកកំណើតនៅភ្នំពេញ ស្នាក់នៅក្រុងប៉ោយប៉ែត និងឈ្មោះ ពួន គឹមហេង ភេទប្រុស អាយុ៣១ឆ្នាំ មានស្រុកកំណើតខេត្តបាត់ដំបង ស្នាក់នៅក្រុងប៉ោយប៉ែត ។
តាមចម្លើយរបស់ឈ្មោះ ស៊ុន សៀងហេង ជាមេការ និងឈ្មោះ ពួន គឹមហេង ជាមេការរងថា ពួកគេគ្រាន់ តែជាអ្នកស៊ីឈ្នួលនិងទទួលប្រាក់ខែធ្វើជាមេការនិងមេការរងក្នុងកាស៊ីណូនេះប៉ុណ្ណោះ ។ ថៅកែកាសុីណូឈ្មោះ ធារ៉ារស់នៅក្រុងប៉ោយប៉ែត ដែលរកស៊ីបើកខារ៉ាអូខេនិងក្លិបកម្សាន្ត តែថៅកែឈ្មោះ ធារ៉ា បានបដិសេធថា កាស៊ីណូឡាក់គីវីងនេះខ្លួនបាន ជួលឱ្យទៅឈ្មោះ ស៊ុន សៀងហេង ដោយមានលិខិតស្នាមជាលាយលក្ខណ៍អក្សរ និងមានមេធាវីដឹងឮទៀតផង ។
លោកស្នងការ អាត់ ខែម បញ្ជាក់ថា ប្រតិបត្តិការបង្ក្រាបគ្រឿងញៀននៅកាស៊ីណូឡាក់គីវីងនេះ ជនសង្ស័យនឹងត្រូវកសាងសំណុំរឿងបញ្ជូនទៅសាលាដំបូងខេត្តដើម្បីចាត់ការតាមច្បាប់ និងសម្រេចបិទទ្វារកាស៊ីណូនេះជាស្ថាពរ ។គណៈកម្មាធិការប្រយុទ្ធប្រឆាំងគ្រឿងញៀនដាក់វិធានការ៥ចំណុចដើម្បីបង្ក្រាបគ្រឿងញៀនតាមក្លិបកម្សាន្ត ។
ចែករំលែកព័តមាននេះ