រាជធានីភ្នំពេញ ៖ បន្ទាប់ពីចរចារអស់រយៈពេលប្រមាណ៧ឆ្នាំរវាងក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ របស់ប្រទេសកម្ពុជា និងក្រុមហ៊ុនមួយរបស់ចិន ស្ដីពីការលើកកម្ពស់តម្លៃ និងរក្សាស្រូវរបស់ប្រជាពលរដ្ឋកម្ពុជា ទីបំផុតការចរចារក៏ទទួលបានផ្លែផ្កាហើយបន្ទាប់ពីចិនក៏យល់ព្រមក្នុងការសាងសង់ឡសម្ងួតនិងឃ្លាំងស្តុកស្រូវរបស់ប្រជាកសិករនៅ…
រាជធានីភ្នំពេញ ៖ បន្ទាប់ពីចរចារអស់រយៈពេលប្រមាណ៧ឆ្នាំរវាងក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ របស់ប្រទេសកម្ពុជា និងក្រុមហ៊ុនមួយរបស់ចិន ស្ដីពីការលើកកម្ពស់តម្លៃ និងរក្សាស្រូវរបស់ប្រជាពលរដ្ឋកម្ពុជា ទីបំផុតការចរចារក៏ទទួលបានផ្លែផ្កាហើយបន្ទាប់ពីចិនក៏យល់ព្រមក្នុងការសាងសង់ឡសម្ងួតនិងឃ្លាំងស្តុកស្រូវរបស់ប្រជាកសិករនៅ ១២កន្លែងស្ថិតនៅខេត្តចំនួន ១១ នៃប្រទេសកម្ពុជា ។
ពិធីចុះហត្ថលេខាលើកិច្ចសន្យាពាណិជ្ជកម្ម ស្តីពីគម្រោងជំរុញផលិតកម្មស្រូវ និងការនាំចេញ អង្ករ ក្នុងក្របខ័ណ្ឌឥណទានសម្បទានពីសាធារណរដ្ឋប្រជាមានិតចិន ត្រូវបានធ្វើឡើងរវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោក Chen Xiaojia ប្រធានក្រុមហ៊ុន CITIC Construction Co., Ltd, នាព្រឹកថ្ងៃទី ២០ ខែ មិថុនា ឆ្នាំ ២០១៩ នៅទីស្តីការក្រសួងសេដ្ឋកិច្ច និងហិរញ្ញវត្ថុ និងក្រោមអធិបតីរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។ បើតាមលោក ស៊ាង ថៃ អ្នកនាំពាក្យក្រសួងពាណិជ្ជកម្មកម្ពុជា បានមានប្រសាសន៍ថាគម្រោងនេះ បានចរចារអស់រយៈពេលប្រមាណពី៦ឆ្នាំ ទៅ៧ឆ្នាំរួចហើយ ដោយមានការចូលរួមជាមួយក្រសួងសេដ្ឋកិច្ច និងហិរញ្ញវត្ថុផងដែរ ទីបំផុតភាគីចិនក៏យល់ព្រមធ្វើតាមសំណើររបស់កម្ពុជា ក្នុងការបោះទុនវិនិយោគឡ សម្ងួតនិងឃ្លាំង ស្តុកស្រូវរបស់ប្រជាពលរដ្ឋនៅខេត្តចំនួន១១ ដែលជាខេត្តមានសក្ដានុពលផលិតស្រូវ ។
លោកបានមានប្រសាសន៍បន្តថា កន្លងមកនៅពេលដែលកសិក ប្រមូលផលស្រូវបានហើយ គឺពិបាកក្នុងការរកកន្លែងទុកដាក់ ដូច្នេះហើយកសិករត្រូវបង្ខំចិត្តលក់ស្រូវទាំងនៅសើម ទើបធ្វើអោយតម្លៃស្រូវដែលពួកគាត់ផលិតបានត្រូវធ្លាក់ថ្លៃយ៉ាងគំហុកតែយ៉ាងណាក៏ពលរដ្ឋត្រូវតែលក់ បើមិនលក់គឺស្រូវនឹងត្រូវខូចអស់ ។
អ្នកនាំពាក្យក្រសួងពាណិជ្ជកម្មកម្ពុជារូបនេះបានបន្តថា « នៅពេលដែលគម្រោងសាងសង់ឃ្លាំងនិងឡសម្ងួត សាងសង់រួច យើងសង្ឃឹមថាតម្លៃស្រូវនឹងត្រូវរក្សាបានកម្រិតមួយថេរ ព្រោះពលរដ្ឋមិនចាំបាច់លក់ស្រូវទាំងនៅសើមទៀតទេ ពួកគាត់អាចយកស្រូវនោះ មកសម្ងួតនិងដាក់ក្នុងឃ្លាំងដែលចិនបានសាងសង់ ហើយនៅពេលដែលស្រូវស្ងួត និងពេលរួចរាល់ពីការងារចាំលក់បន្តទៅឈ្មួញក៏បាន ដូច្នេះហើយ វាមិនអាចធ្វើអោយតម្លៃស្រូវរបស់ពលរដ្ឋធ្លាក់ថ្លៃទៀតឡើយ » ។ លោកបានបន្ថែមថាគម្រោងសាងសង់ឡសម្ងួត និងឃ្លាំងស្តុកស្រូវដែលជាការវិនិយោគរបស់ចិន នឹងចាប់ផ្ដើមនៅអំឡុងឆ្នាំក្រោយនេះហើយ ហើយរយៈពេលនេះការសាងសង់អាចត្រឹម២ឆ្នាំ ដូច្នេះ នៅឆ្នាំ២០២២ ឡសម្ងួត និងឃ្លាំងស្តុកស្រូវនឹងចាប់ផ្ដើមដំណើរ អោយពលរដ្ឋយកស្រូវដែលប្រមូលផលបានមកសម្ងួត និងទុកដាក់នៅក្នុងឃ្លាំងទាំងនោះបាន ដោយសប្បាយចិត្ត ហើយនៅពេលដែលរួចការងារចាំលក់បន្តទៅ ឈ្មួញ ។
លោក ស៊ាង ថៃ បានមានប្រសាសន៍បន្តថា « សម្រាប់ឃ្លាំងនេះ គឺមិនមែនជាម៉ាស៊ីនកិនស្រូវនោះទេ ហើយឃ្លាំងនេះ ក៏មិនមែនស្តុកស្រូវ សម្រាប់តែនាំចេញទៅកាន់ទីផ្សារប្រទេសចិនមួយប៉ុណ្ណោះទេ ពាណិជ្ជករអាចទិញស្រូវពីកសិករចូលក្នុងរោងម៉ាស៊ីន ហើយកិនចង់នាំចេញទៅណាក៏បានដែរ ដោយមិនសំដៅតែលើប្រទេសចិន » ។
បើតាមសេចក្តីប្រកាសព័ត៌មានរបស់ក្រសួងពាណិជ្ជកម្មកម្ពុជា និងក្រសួងសេដ្ឋកិច្ចនិងហិរញ្ញវត្ថុបានអោយដឹងថាគម្រោងជំរុញផលិតកម្ម ស្រូវ និងការនាំចេញអង្ករនេះរៀបចំឡើងក្នុងគោលដៅដើម្បីជួយដល់ កសិករ ធុរជន និងក្រុមហ៊ុននាំចេញអង្ករ ព្រមទាំងរួមចំណែកគាំទ្រដល់យុទ្ធសាស្ត្ររបស់រាជរដ្ឋាភិបាលលើការជំរុញការនាំចេញអង្ករឱ្យបានយ៉ាងតិច ១ លានតោន ក្នុងមួយឆ្នាំ តាមរយៈការសាងសង់ឃ្លាំងស្តុក និងឡសម្ងួតនៅតាមទីតាំងយុទ្ធសាស្ត្រ និងការដាក់ឱ្យអនុវត្តយន្តការយកស្រូវ-អង្ករស្តុកក្នុងឃ្លាំងជាវត្ថុបញ្ចាំសម្រាប់ខ្ចីប្រាក់ពីធនាគារឯកជន ។
សេចក្តីប្រកាសបញ្ជាក់ថា «គម្រោងខាងលើនេះ គឺដើម្បីទប់ស្កាត់កុំឱ្យឈ្មួញទុច្ចរិត អាចឆ្លៀតឱកាសបង្ខូចថ្លៃស្រូវ ក៏ដូចជាដើម្បីជួយឱ្យកសិករទុកស្រូវបានយូរ អាចលក់ស្រូវបានតាមថ្លៃសមរម្យ និងមានលទ្ធភាពទទួលបានឥណទាន ពេលត្រូវការចាំបាច់ តាមរយៈការយកស្រូវស្តុកក្នុងឃ្លាំងជាវត្ថុបញ្ចាំ ។ គម្រោងនេះ មិនមានសេវាកិនស្រូវទេ ដើម្បីការពារកុំឱ្យមានការប្រកួតប្រជែងជាមួយរោងម៉ាស៊ីនកិនស្រូវក្នុងស្រុក ។បន្ទាប់ពីគម្រោងនេះដាក់ឱ្យប្រតិបត្តិការ, កសិករ និងរោងម៉ាស៊ីនកិនស្រូវ នឹងមានឡសម្ងួត ឃ្លាំងស្តុក និងទុនបង្វិលបន្ថែម ព្រមទាំងជួយបន្ថយចំណាយ (ថ្លៃដើម)ចាប់ពីដំណាក់កាលប្រមូលផលដល់ដំណាក់កាលលក់អង្ករ »។
តាមរយៈកិច្ចសន្យាពាណិជ្ជកម្មនេះក្រុមហ៊ុន CITIC Construction និងក្រុមហ៊ុនហ្គ្រីនត្រេដ នឹង ធ្វើការសាងសង់ឃ្លាំងស្តុកស្រូវ-អង្ករ ចំនួន ១២ កន្លែង (សមត្ថភាពស្តុកសរុប ៨២៧ ០០០ តោន) និងឡ សម្ងួត ចំនួន ១០ កន្លែង (សមត្ថភាពសម្ងួតស្រូវបាន ១៣.០០០ តោន ក្នុងមួយថ្ងៃ) នៅក្នុងខេត្តពោធិ៍សាត់, បាត់ដំបង ,តាកែវ, បន្ទាយមានជ័យ, សៀមរាប, កំពង់ធំ, កំពង់ចាម, ព្រៃវែង, កណ្តាល, កំពង់ស្ពឺ និងខេត្ត ព្រះសីហនុ ។
លោកឧកញ្ញ៉ា សុង សារ៉ន អគ្គនាយកក្រុមហ៊ុន អេមរុ រាយស៍មានប្រសាសន៍ថា វាជាសញ្ញាវេជ្ជមានធ្វើឱ្យវិស័យស្រូវអង្ករពង្រីកវិសាលភាពទីផ្សារបានទូលាយ មានលទ្ធភាពរកទីផ្សារល្អជូនកសិករ។លោកឧកញ្ញ៉ាបានបន្តថា «ការនាំំចេញអង្កររបស់យើងវាអាស្រ័យទៅលើសេចក្តីត្រូវការនិងតម្រូវការរបស់ប្រទេសនាំចូល។បើយើងមានឃ្លាំងនិងមានឡសម្ងួតវាជាឱិកាសមួយធំសម្រាប់យើង ដើម្បីឱ្យកម្ពុជាមានលទ្ធភាពផ្គត់ផ្គង់ល្អជាងមុន។ ដូចនេះវាជាឱកាសធំមួយសម្រាប់កម្ពុជា ពង្រីកទីផ្សារបន្ថែម»។
លោក យន់ សុវណ្ណ អគ្គនាយកក្រុមហ៊ុនបាយ័ន ស៊ារៀលបានឱ្យដឹងថា បច្ចុប្បន្នអង្ករកម្ពុជា កំពុងមានទីផ្សារ និងត្រូវបានទទួលស្គាល់នៅបណ្ដាប្រទេសជាច្រើនទាំងក្នុងតំបន់និងក្រៅតំបន់ ដែលជាឱកាសល្អ សម្រាប់កសិករនិងពាណិជ្ជករ ក្នុងការផលិតស្រូវ និងអង្ករនាំចេញទៅកាន់ប្រទេសដែលកំពុងមានតម្រូវការខ្ពស់ ។ លោកបានស្នើរអោយកសិករ ងាកទៅរកការដាំដុះពូជស្រូវណាដែលមានទីផ្សារនិងមានតម្លៃខ្ពស់សម្រាប់នាំចេញផងដែរ ដូចជាស្រូវសែនក្រអូប និងអង្ករផ្កាម្លិះជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ