រាជធានីភ្នំពេញ ៖ សមាជិកក្រុមប្រឹក្សាធម្មនុញ្ញបានបើកកិច្ចប្រជុំបន្តបោះឆ្នោតជ្រើសតាំងលោក អ៊ឹម ឈុនលឹម ជាប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជាអាណត្តិ៣ឆ្នាំលើកទី៨ (២០១៩- ២០២២) ។ លោក អ៊ឹម ឈុនលឹម ដែលជាបេក្ខជនឈរឈ្មោះជាប្រធានក្រុមប្រឹក្សាធម្មនុញ្ញសម្រាប់អាណត្តិ៣ឆ្នាំលើកទី៨ (២០១៩-២០២២) ត្រូវបានកិច្ចប្រជុំពេញអង្គក្រុមប្រឹក្សាធម្មនុញ្ញបោះឆ្នោតជាសម្ងាត់ជ្រើសតាំងជាប្រធានក្រុមប្រឹក្សាធម្មនុញ្ញនៃព្រះរាជាណាចក្រកម្ពុជាសម្រាប់អាណត្តិ៣ឆ្នាំ លើកទី៨ (២០១៩-២០២២) ដោយ០៩ សំឡេង លើ០៩សំឡេង ។
ថ្លែងក្នុងកិច្ចប្រជុំបោះឆ្នោតជ្រើសតាំងប្រធានក្រុមប្រឹក្សាធម្មនុញ្ញសម្រាប់អាណត្តិ៣ឆ្នាំ លើកទី៨ នាព្រឹកថ្ងៃទី២១ ខែមិថុនានេះ នៅក្រុមប្រឹក្សាធម្មនុញ្ញលោក អ៊ឹម ឈុនលឹម ប្រធានក្រុមប្រឹក្សាធម្មនុញ្ញដែលទើបនឹងជាប់ឆ្នោតថ្មីសម្រាប់អាណត្តិ៣ឆ្នាំ លើកទី៨ (២០១៩-២០២២) បានធ្វើការប្តេជ្ញាចិត្តថានឹងគោរពតាមរដ្ឋធម្មនុញ្ញច្បាប់បទបញ្ជាផ្ទៃក្នុងរបស់ក្រុមប្រឹក្សាធម្មនុញ្ញ និងខិតខំបំពេញតួនាទីដែលជាសមត្ថកិច្ចរបស់ក្រុមប្រឹក្សាធម្មនុញ្ញ គឺការពាររបបរាជានិយមអាស្រ័យរដ្ឋធម្មនុញ្ញការកសាងការពារព្រះរាជាណាចក្រកម្ពុជាឱ្យក្លាយទៅជានីតិរដ្ឋ និងអភិវឌ្ឍន៍ ។
សូមជម្រាប់មុននឹងឈានដល់ការបោះឆ្នោតនៅវេលាម៉ោង១០និង០០នាទី នៅដដែលនៅទីស្ដីការក្រុមប្រឹក្សាធម្មនុញ្ញ (អគារស-វិមានរដ្ឋចំការមន) មានរៀបចំពិធីផ្ទេតំណែងសមាជិក សមាជិកា ក្រុមប្រឹក្សាធម្មនុញ្ញចំនួន០៣រូប ដែលបានចប់អាណត្តិ (២០១០-២០១៩) គឺសម្ដេចនរោត្តមសិរីវុឌ្ឍលោក មឹន ស៊ាន និងលោក ហ៊ី សោភា (ដែលចប់អាណត្តិ២ឆ្នាំ ជំនួសលោកជំទាវ ចែម វេយ្យរិទ្ធ) និងចូលកាន់តំណែងជាសមាជិកសមាជិកាក្រុមប្រឹក្សាធម្មនុញ្ញអាណត្តិថ្មី ២០១៩- ២០២៨ ចំនួន៣រូប គឺទី១ លោកហ៊ី សោភា ដែលត្រូវបានឧត្តមក្រុមប្រឹក្សានៃអង្គចៅក្រមបោះឆ្នោតជ្រើសតាំងជាថ្មីជាសមាជិកក្រុមប្រឹក្សាធម្មនុញ្ញសម្រាប់អាណត្តិ៩ឆ្នាំ (២០១៩-២០២៨) ទី២ លោកជំទាវ លី វួចឡេង ដែលត្រូវរដ្ឋសភាជាតិបោះឆ្នោតជ្រើសតាំងជាសមាជិកក្រុមប្រឹក្សាធម្មនុញ្ញសម្រាប់អាណត្តិ៩ឆ្នាំ (២០១៩-២០២៨) និងទី៣ ឯកឧត្ដម កែវ ពុធរស្មី ដែលបានតែងតាំងដោយអង្គព្រះមហាក្សត្រជាសមាជិកក្រុមប្រឹក្សាធម្មនុញ្ញសម្រាប់ អាណត្តិ៩ឆ្នាំ (២០១៩-២០២៨) ។
គូរបញ្ជាក់ក្រុមប្រឹក្សាធម្មនុញ្ញមានសមាជិកចំនួន៩រូប គឺ ៖ ១- លោក អ៊ឹម ឈុនលឹម ប្រធាន ២-លោក អ៊ឹម សួស្តី សមាជិក ៣- លោក កែវ ពុធរស្មី ៤-លោក អ៊ុក ឈន ៥- លោក ហ៊ី សោភា ៦- លោកជំទាវ លី វួចឡេង ៧- សម្តេច ចក្រពង្ស ៨- សម្តេចនរោត្តម បុប្ផាទេវី និង៩-លោក សំ ព្រហ្មនា ៕ កែសម្រួលដោយ ៖ សុឃាក់
ចែករំលែកព័តមាននេះ