ខេត្តព្រះសីហនុ ៖ ដើម្បីឲ្យស្របតាមស្ថានភាពភូមិសាស្ត្រ និងការវិវត្តរីកចម្រើន នាពេលបច្ចុប្បន្ន រាជ រដ្ឋាភិបាលបានបង្កើតរដ្ឋបាលក្រុងកោះរ៉ុង ចំណុះខេត្តព្រះសីហនុ ដែលពីមុនកោះរ៉ុងជាមូលដ្ឋានរដ្ឋបាលថ្នាក់សង្កាត់ចំណុះរដ្ឋបាលក្រុងព្រះសីហនុ ។ ក្នុងពិធីប្រកាសតែងតាំងអភិបាល-អភិបាលរងក្រុងកោះ
រ៉ុង និងប្រកាសទទួលស្គាល់ក្រុមប្រឹក្សាក្រុងកោះរ៉ុង កាលពីព្រឹកថ្ងៃទី១៩ ខែមិថុនា លោក យន្ត មីន អភិ បាលខេត្តបានថ្លែងថា ទឹកដីកោះរ៉ុងមានចម្ងាយប្រមាណ៣៦គីឡូម៉ែត្រពីដែនគោក ។
បើយើងធ្វើដំណើរតាមទូកពីក្រុងព្រះសីហនុ ឆ្ពោះទៅក្រុងកោះរ៉ុង ចំណាយពេលត្រឹមតែ៣០ ទៅ៤០នាទីប៉ុណ្ណោះហើយ ពេលនេះត្រូវបានបង្កើតជារដ្ឋបាលក្រុងកោះរ៉ុង ចំណុះឱ្យរដ្ឋបាលខេត្តព្រះសីហនុ ដែលពីមុនកោះរ៉ុងស្ថិតនៅជាមូលដ្ឋានរដ្ឋបាលថ្នាក់ សង្កាត់ ចំណុះរដ្ឋបាលក្រុងព្រះសីហនុ ។ ការបង្កើតនេះ គឺស្របតាមស្ថានភាពភូមិសាស្ត្រ និងការវិវត្តរីកចម្រើននាពេលបច្ចុប្បន្ន តាមគោលនយោបាយរបស់រាជ រដ្ឋាភិបាលនៃព្រះរាជាណាចក្រកម្ពុជា ។
លោកអភិបាលខេត្តថ្លែងទៀតថា ក្រុងកោះរ៉ុងមានសង្កាត់ចំនួន២ គឺសង្កាត់កោះរ៉ុង និងសង្កាត់កោះរ៉ុងសន្លឹម ដែលមានប្រជាពលរដ្ឋរស់នៅប្រមាណ៧០០គ្រួសារ ។ បើទោះបីជាហេដ្ឋារចនាសម្ព័ន្ធនៅក្រុងនេះមិនទាន់បានរៀបរយក្តី តែលោកនឹងជំរុញដល់ការរៀបចំហេដ្ឋារចនាសម្ព័ន្ធឲ្យបានល្អប្រសើរ ដើម្បីធានានិរន្តរភាព និងភាពងាយស្រួលក្នុងការបំពេញការងារផ្សេងៗជូនប្រជាពលរដ្ឋ ។ នាពេលអនាគត យើងសង្ឃឹមថាក្រុងកោះរ៉ុងនឹងកាន់តែល្អប្រសើរ ហើយជាទីកន្លែងគួរជាទីទាក់ទាញភ្ញៀវទេសចរមកពីជុំវិញពិភពលោក ។
លោក យន្ត មីន បានបញ្ជាក់ទៀតថា ក្រុងកោះរ៉ុងគឺជាតំបន់ទេសចរណ៍មួយប្រកដោយសក្តានុពល ។ កោះរ៉ុងមានឆ្នេរខ្សាច់ស្អាត មានទឹកសមុទ្រថ្លាឈ្វេងគួរឱ្យចង់ហែលលេងកម្សាន្ត ហើយកោះនេះគ្របដណ្ដប់ទៅដោយព្រៃឈើបៃតង មានបរិយាកាសល្អ ខ្យល់អាកាសបរិសុទ្ធគួរឱ្យចង់មកលំហែ ។ សក្តានុពលរបស់កោះរ៉ុង ធ្វើឲ្យពិភពលោកបានស្គាល់កោះរ៉ុងនៃខេត្តព្រះសីហនុថាជាកន្លែងគួរជាទីមនោរម្យចង់មកលំហែ ។ ការបង្កើតដែនដីកោះនេះឲ្យទៅជាក្រុងរដ្ឋបាល គឺជាការបង្ខិតសេវាឲ្យមកនៅកៀកកិតជាមួយប្រជាពលរដ្ឋ និងសម្រួលដល់ការលំបាករបស់ប្រជាពលរដ្ឋ ។
លោកអភិបាលខេត្ត បានផ្ដាំផ្ញើដល់គណៈអភិបាលក្រុង និងក្រុមប្រឹក្សាក្រុងកោះរ៉ុង ត្រូវខិតខំកសាងហេដ្ឋារចនាសម្ព័ន្ធក្នុងដែនដីរបស់ខ្លួន ជាពិសេសគឺបង្កើនការថែរក្សាបរិស្ថានឆ្នេរ បរិស្ថានធម្មជាតិ ដែលជាសក្តានុពលដ៏ទាក់ទាញសម្រាប់ទីក្រុងមួយនេះ និងសហការសាមគ្គីគ្នាបម្រើសេវាជូនប្រជាពលរដ្ឋឲ្យបានល្អប្រសើរ និងត្រូវធ្វើខ្លួនជាមន្ត្រីបម្រើប្រជាពលរដ្ឋពិតប្រាកដ ។ ទន្ទឹមនឹងនេះ លោកក៏បានគូសបញ្ជាក់ផងដែរថា កម្ពុជាក្រោមការដឹកនាំរបស់សម្ដេចតេជោនាយករដ្ឋមន្ត្រី ហ៊ុន សែន ធ្វើឱ្យកម្ពុជាទទួលបានសុខសន្តិភាព និងការអភិវឌ្ឍលើគ្រប់វិស័យ ជីវភាពប្រជាពលរដ្ឋបានធូរធារ អត្រានៃភាពក្រីក្រត្រូវបានកាត់បន្ថយជាលំដាប់ និងកាន់តែល្អប្រសើរថែមទៀត ។
លោក នួន ប៊ុនថុល អភិបាលក្រុង និងលោក អ៊ួង និត ប្រធានក្រុមប្រឹក្សាកោះរ៉ុង បានបង្ហាញការប្ដេជ្ញាចិត្តស្រដៀងគ្នាថា នឹងខិតខំបម្រើប្រជាពលរដ្ឋឲ្យបានល្អប្រសើរ និងរួមគ្នាខិតខំស្ដារហេដ្ឋារចនាសម្ព័ន្ធនៅលើដែនកោះមួយនេះឲ្យកាន់តែមានដំណើរការល្អប្រសើរ ឆ្លើយតបទៅនឹងតម្រូវការរបស់ប្រជាពលរដ្ឋទូទៅ និងការពារសុវត្ថិភាព សន្តិសុខ ឲ្យបានល្អជូនប្រជាពលរដ្ឋ ក៏ដូចជាភ្ញៀវទេសចរ និងអ្នកវិនិយោគ ៕
ចែករំលែកព័តមាននេះ