រាជធានីភ្នំពេញ ៖ អង្គការអ្នកប្រជាធិបតេយ្យនិយមកណ្តាលអន្តរជាតិ (CDI) ទាមទារសហភាពអឺរ៉ុបឲ្យមានយុត្តិធម៌ជាមួយកម្ពុជាពាក់ព័ន្ធទៅនឹងក្របខណ្ឌរាល់មុខទំនិញទាំងអស់លើកលែងតែអាវុធ- EBA ។ យោងតាមការចេញផ្សាយរបស់ CDI ចេញនៅថ្ងៃទី២០ មិថុនានេះ បានលើកឡើងថា កិច្ចប្រជុំគណៈកម្មាធិការប្រតិបត្តិក្រុងព្រុចសែល ប្រទេសប៊ែលស្សិក ថ្ងៃទី១០ ខែមេសា ឆ្នាំ២០១៩ យើងទាំងអស់គ្នា ជាសមាជិកអង្គការអ្នកប្រជាធិបតេយ្យនិយមកណ្តាលអន្តរជាតិ (CDI) ទាមទារសហភាពអឺរ៉ុបឲ្យមានយុត្តិធម៌ជាមួយកម្ពុជាពាក់ព័ន្ធទៅនឹងក្របខណ្ឌ រាល់មុខទំនិញទាំងអស់លើកលែងតែអាវុធ-EBA។
ប្រភពបានបន្តថា កម្ពុជា គឺជាប្រទេសក្រោយជម្លោះ និងជាប្រទេសដែលមានការអភិវឌ្ឍតិចតួចមួយបានទទួលអត្ថប្រយោជន៍ពីការផ្តល់ការអនុគ្រោះពាណិជ្ជកម្មនេះ ។ កម្មកររោងចក្រប្រមាណមួយលាននាក់ ជាពិសេសស្ត្រីមកពីជនបទបម្រើការនៅក្នុងវិស័យវាយណភណ្ឌ និង កាត់ដេរទទួលបាននូវការនាំចូលទៅកាន់ទីផ្សារអឺរ៉ុបដោយគ្មានរបាំងពន្ធ និងកូតា ។ យើងកត់សម្គាល់ប្រកបដោយការពេញចិត្តនូវកិច្ចប្រឹងប្រែងរបស់រដ្ឋាភិបាលក្នុងការប្រតិបត្តិតាមតម្រូវការ និងលក្ខខណ្ឌរបស់សហភាពអឺរ៉ុប រួមទាំងអនុសញ្ញាទាំង១៥ នៅក្រោមក្របខណ្ឌ អង្គការសហប្រជាជាតិ និងអង្គការពលកម្មពិភពលោកឆ្លើយតបទៅនឹងការអភិវឌ្ឍសេដ្ឋកិច្ច និងនយោបាយការពង្រីកសិទ្ធិការងារ និងសេរីភាពនៅប្រទេសកម្ពុជា ។
ប្រភពបានបញ្ជាក់ថា «យើងត្រូវតែដឹងថា លទ្ធិប្រជាធិបតេយ្យនីយកម្ម គឺជាដំណើរការវែងឆ្ងាយ ។ ការកើនឡើងនូវស្រទាប់វណ្ណៈប្រជាជនថ្នាក់កណ្តាលនៅកម្ពុជានឹងចូលរួមយ៉ាងសំខាន់ និងឈានទៅរកការបើកចំហរការពង្រឹងតម្លៃប្រជាធិបតេយ្យ និងការកសាងស្ថាប័នប្រជាធិបតេយ្យ ។ EBA បានចូលរួមយ៉ាងសំខាន់នៅក្នុងមូលដ្ឋានគ្រឹះប្រជាធិបតេយ្យនៅកម្ពុជា ។ យើងស្នើសុំទៅសហភាពអឺរ៉ុបធ្វើការប្រកបដោយមិត្តភាព ចំពោះការសម្រេចចិត្តថា តើគួរដកចេញ EBA ពីកម្ពុជាដែរឬទេ» ។
ប្រភពបានបន្តថា កម្ពុជាបានរងគ្រោះគ្រប់គ្រាន់ហើយ ពួកគេសាកសមនឹងទទួលបានការរស់នៅក្នុងសន្តិភាពជាមួយនឹងវិបុលភាព និងសុភមង្គល ។ យើងចង់ឃើញប្រជាធិបតេយ្យនៅកម្ពុជារីកចម្រើនដោយមានការយោគយល់ និងការគាំទ្រដោយសហគមន៍អន្តរជាតិ ៕ កែសម្រួលដោយ ៖ សុឃាក់
ចែករំលែកព័តមាននេះ