រាជធានីភ្នំពេញ ៖ កម្ពុជា បានស្នើភាគីចិន ឱ្យជួយបណ្ដុះបណ្ដាលធនធានមនុស្សលើវិស័យបច្ចេកវិទ្យា និងវិទ្យាសាស្ត្រ ក្នុងពេលដែលវិស័យបច្ចេកវិទ្យាកំពុងដើរតួនាទីសំខាន់នៅក្នុងចំណែកការងារនៅកម្ពុជា ជាពិសេស គឺដើម្បីជំរុញដល់ដំណើរការបដិវដ្ដន៍ឧស្សាហកម្មទី៤របស់ពិភពលោកផងដែរ ។…
រាជធានីភ្នំពេញ ៖ កម្ពុជា បានស្នើភាគីចិន ឱ្យជួយបណ្ដុះបណ្ដាលធនធានមនុស្សលើវិស័យបច្ចេកវិទ្យា និងវិទ្យាសាស្ត្រ ក្នុងពេលដែលវិស័យបច្ចេកវិទ្យាកំពុងដើរតួនាទីសំខាន់នៅក្នុងចំណែកការងារនៅកម្ពុជា ជាពិសេស គឺដើម្បីជំរុញដល់ដំណើរការបដិវដ្ដន៍ឧស្សាហកម្មទី៤របស់ពិភពលោកផងដែរ ។
នៅក្នុងជំនួបទ្វេរភាគីរវាងសម្ដេចអគ្គមហាសេនាបតីតេជោហ៊ុន និងលោកវ៉ាន កាង អនុប្រធានសភាប្រឹក្សាប្រជាជនចិន និងជាអតីតរដ្ឋមន្ត្រីក្រសួងវិទ្យាសាស្ត្រ និងបច្ចេកវិទ្យាចិន កាលពីព្រឹកថ្ងៃទី១៩ មិថុនា ២០១៩ សម្ដេចតេជោ បានស្នើទៅកាន់ភាគីចិន ជួយបណ្ដុះបណ្ដាលធនធានមនុស្សបន្ថែមដោយផ្ដោតលើបច្ចេកវិទ្យា និងវិទ្យាសាស្ត្រ ។
សម្ដេចតេជោមានប្រសាសន៍ថា សុំអោយភាគីចិន ជួយសហការជាមួយកម្ពុជា បណ្ដុះបណ្ដាលធនធានមនុស្សវិស័យស្រាវជ្រាវ ក៏ដូចជាវិស័យដទៃទៀតដែលពាក់ព័ន្ធទៅនឹងបច្ចេកវិទ្យា និងវិទ្យាសាស្ត្រនេះ ។ សម្ដេចសុំអោយសភាប្រឹក្សាប្រជាជនចិន សហការជាមួយនឹងរាជ្យបណ្ឌិតសភាកម្ពុជា ក្រសួងអប់រំ ក៏ដូចជាក្រសួងការងារបណ្ដុះបណ្ដាលវិជ្ជាជីវៈកម្ពុជា ដើម្បីបណ្ដុះបណ្ដាលធនធានមនុស្សកម្ពុជាឱ្យកាន់តែមានប្រសិទ្ធភាពខ្លាំងឡើង ។
សម្ដេចបានមានប្រសាសន៍បន្ថែមថា កិច្ចសហប្រតិបត្តិការ លើវិស័យវិទ្យាសាស្ត្រ និងបច្ចេកវិទ្យាគឺចាំបាច់ត្រូវការ ធនធានមនុស្ស ការស្រាវជ្រាវនិងជំរុញការអភិវឌ្ឍ ក្នុងយុគសម័យឌីជីថល ឬក៏ក្នុងសម័យបដិវត្តន៍ឧស្សាហ កម្មទី៤នេះ គឺចាំបាច់ណាស់ត្រូវមានការសិក្សា ការស្រាវ ជ្រាវនិងការប្រើប្រាស់បច្ចេកវិទ្យា ព័ត៌មានវិទ្យា ប្រើប្រាស់បច្ចេកវិទ្យានិងវិទ្យាសាស្ត្រដទៃទៀត ។ សម្ដេចបានបញ្ជាក់ថា « កម្ពុជាកំពុងតែតម្រង់ទិសរបស់ខ្លួន ដើម្បីធ្វើយ៉ាងណាឲ្យសម្របស្របទៅតាមចរន្តនៃយុគសម័យឌីជីថល និងបដិវត្តន៍ឧស្សាហកម្មទីបួននេះ» ។
សូមរំលឹកថានៅពេលថ្មីៗកន្លងទៅនេះ លោកប៉ាន សូរស័ក្ដិ រដ្ឋមន្ត្រីក្រសួងពាណិជ្ជកម្មកម្ពុជា បានស្នើម្ដងរួចហើយទៅកាន់ភាគីចិន ជាពិសេសទៅកាន់ មូលនិធិស៊ិនជិន ដែលជាទីក្រុងមួយសំបូរទៅដោយបច្ចេកវិទ្យារីកចម្រើន ។ លោកប៉ាន សូរស័ក្តិបានស្នើរទៅលោកស្រីតៅយីតាវ អនុប្រធានមូលនិធិស៊ិនជិន ដើម្បីទទួលយកនិស្សិតពីកម្ពុជាទៅបន្ដការសិក្សាផ្នែកបច្ចេកវិទ្យានៅទីក្រុងស៊ិនជិន ព្រោះទីក្រុងនេះ មានសាលាបណ្ដុះបណ្ដាលបច្ចេកវិទ្យាល្បីមួយ និងបានបណ្ដុះបណ្ដាលធនមនុស្សរបសចិនបានខ្លាំងៗជាច្រើន ជាក់ស្ដែងចិនមានបច្ចេកវិទ្យាខ្លាំងមួយ ដូចជាការផលិតទូរសព្ទស្មាតហ្វូន Huawei ទូរសព្ទស្មាតហ្វូន OPPO ជាដើម។
លោករដ្ឋមន្ត្រី បានមានប្រសាសន៍បន្តថា បើសិនជាអាចកម្ពុជាចង់អោយវិនិយោគិនមកបណ្ដាក់ទុនវិនិយោគ វិស័យបច្ចេកវិទ្យានេះ នៅក្នុងប្រទេសកម្ពុជាផ្ទាល់តែម្ដង ដែលអាចបង្រៀនដល់បុគ្គលិកកម្ពុជាផង និងវិនិយោគដើម្បីអភិវឌ្ឍន៍កម្ពុជាផង ។
លោកបាននិយាយថា « ដោយសារតែស៊ិនជិន ជាទីក្រុងដែលសំបូរដោយបច្ចេកវិទ្យាល្បីនិងជាទីក្រុងដែល បណ្ដុះបណ្ដាលធនធានមនុស្សដ៏មានសក្ដានុពលមួយ នៅក្នុងប្រទេសចិន បើសិនជាវិនិយោគិនស៊ិនជិនមកបណ្ដាក់ទុនវិនិយោគ នៅកម្ពុជា វាពិតជាល្អប្រសើរណាស់ ក្នុងការអភិវឌ្ឍវិស័យបច្ចេកវិទ្យានៅក្នុងប្រទេសកម្ពុជា » ៕ កែសម្រួលដោយ ៖ សុឃាក់
ចែករំលែកព័តមាននេះ