ខេត្តបន្ទាយមានជ័យ ៖ យ៉ាងហោចណាស់ បុរសស្ត្រីជាង១០០នាក់ បានត្រូវកម្លាំងនគរបាលប្រឆាំងគ្រឿងញៀននៃស្នងការដ្ឋានខេត្ត និងអធិការដ្ឋានក្រុងប៉ោយប៉ែត ដែលសម្របសម្រួលនីតិ វិធីដោយលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្ត ចុះធ្វើការបង្ក្រាបនិងឃាត់ខ្លួនសួរនាំ ពាក់ព័ន្ធនឹងករណីគ្រឿងញៀន នៅទីតាំងមួយកន្លែងសង្ស័យជ្រកក្រោមស្លាកកាស៊ីណូឡាក់គី ស្ថិតក្នុងភូមិប៉ោយប៉ែត សង្កាត់ប៉ោយប៉ែត ក្រុងប៉ោយប៉ែត ។
ប្រតិបត្តិការបង្ក្រាបនេះ ធ្វើឡើងកាលពីថ្ងៃទី១៨ ខែមិថុនា និងពេញ១យប់ឈានដល់ព្រឹកថ្ងៃទី១៩ ខែ មិថុនា ដែលក្រៅពីលោកព្រះរាជអាជ្ញាគេឃើញមានវត្តមានលោក ញៀន សុជា ស្នងការរងនគរបាលខេត្ត ទទួលផែនប្រឆាំងគ្រឿងញៀន លោកអធិការនគរបាលក្រុងប៉ោយប៉ែតលោក សាង សុខុម និងលោក កែវ ដូល អធិការរងទទួលផែនប្រឆាំងគ្រឿងញៀននៃអធិការ ដ្ឋាននគរបាលក្រុងប៉ោយប៉ែត និងកងកម្លាំងរាប់សិបនាក់ទៀត ។
នៅថ្ងៃទី១៨ ខែមិថុនា សមត្ថកិច្ចបានឆ្មក់ចូលក្រសោបអ្នកប្រើប្រាស់ថ្នាំញៀនជិត៣០នាក់ តែសមត្ថកិច្ចមិនអាចផ្តល់ព័ត៌មានលម្អិតបានទេ ព្រោះត្រូវបន្តប្រតិបត្តិការនេះ ខណៈមានការឆ្មក់ចូលទីតាំងដដែលស្ទើរពេញមួយយប់ដែលបានបញ្ចប់នៅវេលាម៉ោង៤ទៀបភ្លឺថ្ងៃទី១៩ ខែមិថុនា និងក្រសោបបានជនសង្ស័យជាង១០០នាក់បន្ថែមទៀត ជាមួយសារធាតុញៀនមួយចំនួនផងដែរ ។
តាមប្រភពព័ត៌មានថា ករណីបង្ក្រាបនេះសមត្ថកិច្ចឃាត់ខ្លួនសាកសួរដំបូងជិត១៨០នាក់ក្នុងនោះជាង២០នាក់មិនពាក់ព័ន្ធនឹងគ្រឿងញៀន ទេ ដោយខ្លះជាអ្នកគ្រប់គ្រងទូហ្គេមនិងស្លុតម៉ាស៊ីន ខ្លះជាអ្នកចូលទៅលេងល្បែង និងខ្លះជាជនសង្ស័យជួញដូរ ។ ប្រតិបត្តិការនេះសមត្ថកិច្ចបានធ្វើតេស្តទឹកនោមជនសង្ស័យភ្លាមៗហើយក្រោយការបង្ក្រាបក៏បាននាំយកជនសង្ស័យ និងវត្ថុតាង ទៅកាន់ស្នងការដ្ឋាននគរបាលខេត្តដោយដឹកតាមរថយន្តក្រុងទាំងយប់តែម្តង ។
លោកវរសេនីយ៍ឯក ធិន ស៊ិនដេត អធិការនគរបាលក្រុងប៉ោយប៉ែត បានប្រាប់តាមទូរស័ព្ទថា ករណីបង្ក្រាបនេះធ្វើឡើងទាំងថ្ងៃទាំងយប់ ជាប្រតិបត្តិការក្តៅគគុកមួយមិនធ្លាប់មាន ដែល មនុស្សប្រុសស្រីសរុប១៤៥នាក់រកឃើញថា ជាប់ពាក់ព័ន្ធគ្រឿងញៀន ក្នុងនោះ១៤៤នាក់ប្រើប្រាស់ និងម្នាក់ជាអ្នកជួញដូរ ហើយក៏បានឃាត់ខ្លួនអ្នកគ្រប់គ្រងហ្គេមនិងស្លុតម៉ាសុីនប្រុសស្រីចំនួន២នាក់នាំយកទៅសាកសួរដែរ ។
នៅក្នុងប្រតិបត្តិការបង្ក្រាបនេះ សមត្ថកិច្ចដកហូតបានថ្នាំញៀនយ៉ាម៉ាប្រភេទពណ៌ក្រហមមានអក្សរWYចំនួន៥៤គ្រាប់ ម៉ាទឹកកក៥កញ្ចប់តូច ម្សៅពណ៌សសង្ស័យជាសារធាតុញៀន១កូនថង់ និងថ្នាំគ្រវី១គ្រាប់ ទូបាញ់ត្រីនិងស្លុតម៉ាសុីនសរុប១២គ្រឿង ម៉ូតូចម្រុះ៨គ្រឿង ព្រមទាំងបិទទ្វារទីតាំងខាងលើតាមបញ្ជាលោកព្រះរាជអាជ្ញាទៀតផង ។
ពេលសាកសួរថា តើទីតាំងដែលបង្ក្រាបជារបស់កាស៊ីណូឡាក់គី ឬយ៉ាងណា លោកអធិការប្រាប់ថា មិនទាន់ដឹងទេ ព្រោះរឿងនេះសមត្ថកិច្ចជំនាញកំពុងសាកសួរអ្នកគ្រប់គ្រងទូហ្គេមនិងស្លុតម៉ាសុីននៅឡើយ ៕
ចែករំលែកព័តមាននេះ