រាជធានីភ្នំពេញ ៖ ក្រសួងសុខាភិបាលនឹងអនុវត្តការចុះទិដ្ឋាការបញ្ជិកាឱសថ ឧបករណ៍បរិក្ខាពេទ្យ និងចុះប្រវេទន៍គ្រឿងសម្អាង តាមប្រព័ន្ធអនឡាញ ចាប់ពីខែសីហា ឆ្នាំ២០១៩នេះតទៅ ។ ការចុះរបស់ក្រសួងសុខាភិបាលនេះ…
រាជធានីភ្នំពេញ ៖ ក្រសួងសុខាភិបាលនឹងអនុវត្តការចុះទិដ្ឋាការបញ្ជិកាឱសថ ឧបករណ៍បរិក្ខាពេទ្យ និងចុះប្រវេទន៍គ្រឿងសម្អាង តាមប្រព័ន្ធអនឡាញ ចាប់ពីខែសីហា ឆ្នាំ២០១៩នេះតទៅ ។ ការចុះរបស់ក្រសួងសុខាភិបាលនេះ ដើម្បីពង្រឹងការងារគ្រប់គ្រងឱសថ ឧបករណ៍បរិក្ខាពេទ្យ និងគ្រឿងសម្អាងឲ្យកាន់តែមានភាពល្អប្រសើរបន្ថែមទៀត ។
យោងតាមសេចក្ដីជូនដំណឹងរបស់ក្រសួងសុខាភិបាលស្ដីពីការចុះទិដ្ឋាការបញ្ជិកាឱសថ ឧបករណ៍បរិក្ខាពេទ្យ និងចុះប្រវេទន៍គ្រឿងសម្អាងតាមប្រព័ន្ធអនឡាញ នៅថ្ងៃទី២០ ខែមិថុនា ឆ្នាំ២០១៩ បានឲ្យដឹងថា ការចុះទិដ្ឋាការ បញ្ជិកាឱសថ ឧបករណ៍បរិក្ខាពេទ្យ និងចុះប្រវេទន៍គ្រឿងសម្អាង តាមប្រព័ន្ធអនឡាញធ្វើឡើងមានគោលបំណងជាច្រើនរួមមាន ធានាបាននូវតម្លាភាពជូនអតិថិជន និងប្រសិទ្ធភាពនៃការចុះទិដ្ឋាការ បញ្ជិកា និងប្រវេទន៍ បង្កលក្ខណៈងាយស្រួល និងឆាប់រហ័សក្នុងការផ្ដល់សេវាជូនអតិថិជន ផ្ដល់ព័ត៌មានត្រឡប់ដល់អតិថិជនបានទាន់ពេលវេលា កាត់បន្ថយការចំណាយពេលវេលា និងថវិការបស់អតិថិជន គ្រប់ឯកសារទាំងអស់របស់អតិថិជនត្រូវបានរក្សាទុកជាការសម្ងាត់ និងមានសុវត្ថិភាពខ្ពស់ អាជ្ញាធរមានសមត្ថកិច្ចក្នុងការគ្រប់គ្រងឱសថ និងអតិថិជនអាចទទួលបានព័ត៌មានឆាប់រហ័ស ។
ក្រសួងនឹងអនុវត្តប្រព័ន្ធ QR Code នៅលើប្រអប់ផលិតផលឱសថ ឧបករណ៍បរិក្ខាពេទ្យ និងគ្រឿងសម្អាងដែលប្រព័ន្ធនេះធានាបាននូវព័ត៌មានជាក់លាក់របស់ផលិតផលដូចជា លេខទិដ្ឋាការ បញ្ជិកា ឬប្រវេទន៍ ប្រភពផលិតផល កាលបរិច្ឆេទផលិត និងផុតកំណត់ការប្រើប្រាស់ ឈ្មោះក្រុមហ៊ុនដែលនាំចូល និងចែកចាយ ។ ប្រព័ន្ធនេះបង្កលក្ខណៈ ងាយស្រួល ដល់ភ្នាក់ងារត្រួតពិនិត្យឱសថក៏ដូចជា អ្នកប្រើប្រាស់អាចតាមដាននូវផលិតផលឱសថ និងគ្រឿងសម្អាង ក្លែងក្លាយ ឬក្លែងបន្លំ ឬគ្មានច្បាប់អនុញ្ញាតពីក្រសួងសុខាភិបាល នៅលើទីផ្សារនៃប្រទេសកម្ពុជា ។
ក្រសួងសុខាភិបាលនឹងពិភាក្សាជាមួយវិស័យឯកជនបន្ថែម និងកំណត់ពេលវេលាជាក់លាក់ សម្រាប់អនុវត្តចំពោះប្រព័ន្ធ QR Codeនៅឆាប់ៗនេះ ៕ កែសម្រួលដោយ ៖ សុឃាក់
ចែករំលែកព័តមាននេះ