រាជធានីភ្នំពេញ ៖ ស្ត្រីម្នាក់ខណៈកំពុងជិះម៉ូតូជាមួយបុរសម្នាក់ ក៏ត្រូវបុរសម្នាក់ទៀតឃាត់សួរទើបដឹងថា បុរស-ស្ត្រីដែលជិះម៉ូតូឌុបគ្នានោះជាសហាយស្មន់ ហើយអ្នកដែលចាប់ឃាត់ម៉ូតូគឺជាប្តី ។ ដោយមានការចោទប្រកាន់ថា ប្រពន្ធលួចជិះម៉ូតូដើរលេងជាមួយប្រុសសហាយ ក៏ក្លាយជាជម្លោះតឹងសរសៃកដាក់គ្នា និងបង្កឱ្យមានការភ្ញាក់ផ្អើល កាលពីវេលាម៉ោងប្រមាណ៦និង២០នាទីល្ងាចថ្ងៃទី១៨ មិថុនា នៅមុខមន្ទីរ
ពហុព្យាបាល ហុង អុិន ជិតស្ពានអាកាសស្ទឹងមានជ័យ វិថីព្រះមុនីរ៉េត សង្កាត់ទំនប់ទឹក ខណ្ឌចំការមន ។
បុរសដែលអះអាងថា ជាប្តីស្របច្បាប់ឈ្មោះ នីម អាយុ៣១ឆ្នាំ មុខរបរជួយលក់ម៉ូតូគេ ស្នាក់នៅផ្ទះជួលម្តុំផ្សារកាណាឌីយ៉ា សង្កាត់ចោមចៅ៣ ខណ្ឌពោធិ៍សែនជ័យ មានស្រុកកំណើតនៅភូមិសៀនអង្គ្រង ឃុំចំណារលើ ស្រុកស្ទោង ខេត្តកំពង់ធំ ។ ចំណែកស្ត្រីដែលថាជាប្រពន្ធឈ្មោះ ចក់ ណែត អាយុ២៦ឆ្នាំ ជាកម្មការិនីរោងចក្រ មានស្រុកកំណើតនៅភូមិក្អិន ឃុំចំណារលើ ស្រុកស្ទោង មានកូនស្រីម្នាក់អាយុ៥ឆ្នាំ ។ ដោយឡ ែក បុរសដែលជាប់ចោទថាជាសហាយ ត្រូវបានឱ្យដឹងថាឈ្មោះ ឆែន មានស្រុកកំណើតនៅភូមិស្រង់ ស្រុកគងពិសី ខេត្តកំពង់ស្ពឺ និងមានប្រពន្ធនៅខេត្តកំពង់ធំ ។
តាមបុរសជាប្តីឱ្យដឹងថា រូបគាត់និងប្រពន្ធបានចាប់ដៃគ្នារយៈពេលជាង១០ឆ្នាំមកហើយ និងមានចំណងស្នេហ៍កូនស្រីម្នាក់ បច្ចុប្បន្នអាយុ៥ឆ្នាំ រស់នៅជាមួយជីដូន ។ រូបគាត់និងប្រពន្ធបានមកជួលផ្ទះនៅរាជធានីភ្នំពេញ ដើម្បីប្រកបរបររកស៊ីផ្សេងគ្នា ដោយប្រពន្ធធ្វើការនៅរោងចក្រ ចំណែករូបគាត់រកស៊ីជួយលក់ម៉ូតូគេនៅម្តុំគិរីរម្យ ខណ្ឌ៧មករា ។ ប្រភពដដែលរៀបរាប់ទៀតថា ដោយសារតែរវល់ការងារមិនសូវមានពេលយល់ចិត្តប្រពន្ធឱ្យបានគ្រប់គ្រាន់ គឺគិតតែពីការងាររកស៊ីទើបបណ្តាលឱ្យប្រពន្ធរបស់គាត់យកពេលវេលាលេងហ្វេសបុ៊កទាក់ទងគ្នា ជាមួយនឹងបុរសជាសហាយនេះរហូតដល់ស្គាល់គ្នាស្អិតរមួត ។
គាត់ធ្លាប់តាមទាន់ម្តងហើយ និងបានឱ្យសមត្ថកិច្ចធ្វើការអប់រំណែនាំឱ្យប្រពន្ធឈប់ទាក់ទងជាមួយនឹងបុរសម្នាក់នេះទៀត ពីព្រោះរូបគាត់អាណិតនិងស្រឡាញ់ប្រពន្ធកូន មិនចង់បែកបាក់គ្នាទេ ទោះបីបេះដូងប្រពន្ធលែងបរិសុទ្ធសម្រាប់រូបគាត់ជាប្តីក្តី ។ រហូតមកដល់ថ្ងៃទី១៨ ខែមិថុនា រូបគាត់បានទៅអង្គុយផឹកទឹកត្នោតជូរនៅកន្លែងមួយម្តុំផ្លូវវ៉េងស្រេងជាមួយនឹងមិត្តភក្តិ ស្រាប់តែឃើញ ប្រពន្ធគាត់ជិះម៉ូតូជាមួយនឹងបុរសជាសហាយនេះ ទើបរូបគាត់ជិះម៉ូតូដេញតាមរហូតដល់ជិតស្ពានអាកាសស្ទឹងមានជ័យ ក៏តាមទាន់ឃាត់សួរនាំ។ ពេលនោះ ក៏ផ្ទុះជាជម្លោះនឹងគ្នាតឹងសរសៃករវាងប្រពន្ធនិងបុរសជាសហាយ ផ្អើលប្រជាពលរដ្ឋចោមរោមមើលព្រោងព្រាត ។
ក្នុងហេតុការណ៍នេះ ស្ត្រីជាប្រពន្ធមិនបាននិយាយបកស្រាយច្រើនទេ ដោយគ្រាន់តែនិយាយថា រូបគាត់និងបុរសនេះជិះម៉ូតូឌុបគ្នាក្នុងគោលបំណងទៅស្រុកឯខេត្តកំពង់ធំ ហើយក៏បានហៅប្តីទៅដោះស្រាយគ្នាឱ្យដាច់ស្រេច តែប្តីថាមិនបានទៅតាមការណាត់នោះទេ ។ ក្រោយពេលកើតហេតុ បន្ទាប់ពីឈ្លោះគ្នាពេញផ្លូវរួចមក បុរសជាប្តីបានទូរស័ព្ទទៅអ្នកផ្ទះនៅខេត្តកំពង់ធំឱ្យដឹងរឿង ហើយក៏បានឱ្យស្ត្រីជាប្រពន្ធ និងបុរសជាសហាយជិះម៉ូតូទៅស្រុកមុន ឯរូបគាត់ជាប្តីនឹងជិះរថយន្តតាក់ស៊ីទៅតាមក្រោយ ដើម្បីធ្វើការដោះ ស្រាយគ្នាឱ្យចប់សព្វគ្រប់តែម្តង គឺមានតែដើរផ្លូវរៀងៗខ្លួនទេទើបបញ្ចប់វិបត្តិនេះបាន ។
គេមិនដឹងថា រវាងប្តីប្រពន្ធនេះមានបញ្ហាជាមួយគ្នាតាំងពីពេលណាមកនោះទេ ហើយបុរសដែលជាប់ចោទថាជាសហាយក៏ដឹងថា ខ្លួនមានប្រពន្ធហើយ ហេតុអ្វីមកបង្កាត់ភ្លើងស្នេហ៍ជាមួយប្រពន្ធគេបែបនេះ ? ការបែកបាក់ប្តីប្រពន្ធមិនមែនជាការល្អទេ ព្រោះជះឥទ្ធិពលអាក្រក់ដល់កូនៗ ។
ចែករំលែកព័តមាននេះ