ពេលខ្លះរឿងថវិកា គឺជាបញ្ហាធំជាងគេ ដែលបង្កឲ្យគូស្នេហ៍មានជម្លោះ និងថែមទាំងអាច បង្កឲ្យស្វាមីភរិយាមួយចំនួនជ្រើសរើសការលែងលះគ្នាថែមទៀត ។ អត្ថបទនេះនឹងរៀបរាប់ពីកំហុសឆ្គងធំៗនៅក្នុងរឿងលុយកាក់ដែលអាចប៉ះពាល់ដល់ស្នេហារបស់ពួកគេ ។
១. មិនចែករំលែកគោលដៅហិរញ្ញវត្ថុ
ការសាងសង់ជីវិត និងគ្រប់គ្រងផ្ទះមួយ ជាមួយមនុស្សម្នាក់មានន័យថា អ្នកគួរតែមានគោលដៅហិរញ្ញវត្ថុរួមមួយ ។ ប្រសិនបើអ្នកទាំងពីរសន្សំថវិកាសម្រាប់អនាគតដែលមានរូបភាពខុសគ្នានោះ អ្នកនឹងជួបជម្លោះហើយ ។ អ្នកមិនគួរគិតថា ដៃគូមានគោលដៅ ឬសុបិនដូចខ្លួនទេ ។ អ្នកទាំងពីរគួរតែចំណាយពេលវេលា ដើម្បីអង្គុយចុះ និងនិយាយពិភាក្សាពីគម្រោងសន្សំថវិកា ឬចំណាយជាមួយគ្នាវិញ ។
អ្នកអាចបំបែកគម្រោងទៅតាមខែ និងឆ្នាំ ដើម្បីងាយស្រួលក្នុងការសម្រេចដែរ ។ ការសហការគ្នាក៏ជួយពង្រឹងដល់ទំនាក់ទំនងរបស់អ្នកទាំងពីរជំរុញដល់ការយល់ដឹងរឿងហិរញ្ញវត្ថុគ្នាទៅវិញទៅមក និងមើលឃើញច្បាស់ពីអនាគតដែលអ្នកទាំងពីរចង់បាន ។
២. ការលាក់បាំងរឿងចំណូល និងបំណុល
ការលាក់បាំងរឿងប្រាក់ចំណូល គឺជាកត្តាដែលប៉ះពាល់ដល់ស្នេហា និងទំនាក់ទំនងយ៉ាងធ្ងន់ធ្ងរ ។ ពេលដែលដៃគូម្នាក់លាក់បាំង ដូច្នេះ វាប្រៀបបានជាការក្បត់ និងសុបិន្ត និងគោលដៅហិរញ្ញវត្ថុដែល អ្នកទាំងពីរបានសម្រេចជាមួយគ្នាដែរ ។ បំណុលអាចជារឿងដែលគួរឲ្យខ្មាសអៀនសម្រាប់មនុស្សជាច្រើន ប៉ុន្តែអ្នកមិនអាចរក្សាវា ជារឿងសម្ងាត់រហូតទេ ព្រោះដៃគូអ្នកនឹងដឹងពីវានៅថ្ងៃណាមួយ ។
ប្រសិនបើអ្នកកំពុងតែជួបឧបសគ្គបំណុល កុំព្យាយាមឆ្លងកាត់វាដោយម្នាក់ឯង ។ អ្នកគួរតែចាប់ផ្តើមស្មោះត្រង់ជាមួយនឹងដៃគូអ្នកមិនថា វាអាចបង្កជាការភ្ញាក់ផ្អើលប៉ុណ្ណាទេ ។ ពេលខ្លះអ្នកត្រូវការអ្នកគាំទ្រក្នុងការសងបំណុលឲ្យអស់ផងដែរ ។
៣. មិននិយាយឲ្យច្បាស់ពីទម្លាប់ចាយវាយ
ពេលដែលអ្នកទាំងពីរប្រើគណនីរួម ឬមានភាគីម្ខាងជាអ្នកទុក និងគ្រប់គ្រងចំណូល អ្នកគួរតែនិយាយគ្នា និងព្រមព្រៀងគ្នាលើទម្លាប់ការចាយវាយមួយចំនួន ។
ការធ្វើដូច្នេះរក្សាឲ្យភាគីទាំងពីរអាចពិចារណាពីគ្នាទៅវិញទៅមកមុននឹងធ្វើការចាយវាយធំៗ ដូច្នេះអ្នកទាំងពីរ អាចជៀសវាងជម្លោះនៅថ្ងៃអនាគតបាន ។ ការធ្វើការសម្រេចចិត្តរួមគ្នាក៏អាចជួយកាត់បន្ថយការចាយ វាយខ្ជះខ្ជាយដែរ និងធានាថា អ្នកទាំងពីរនៅតែអាចសម្រេចគោលដៅហិរញ្ញវត្ថុរួមដដែល ៕ កែសម្រួលដោយ ៖ សុឃាក់
ចែករំលែកព័តមាននេះ