ខេត្តបន្ទាយមានជ័យ ៖ ពេលឡើងផ្សារដែកស្រាប់តែបាក់រន្ទាធ្លាក់ពលករម្នាក់បណ្តាលឱ្យរងរបួសធ្ងន់ ក្រោយមកក៏បានស្លាប់ក្នុងមន្ទីរពេទ្យក្រុងបាងកក ប្រទេសថៃ ។
ជនរងគ្រោះដែលស្លាប់ឈ្មោះម៉ន ម៉េត ភេទប្រុស អាយុ៤២ឆ្នាំ ជាពលករផ្នែកផ្សារដែកធ្វើការនៅក្រុងបាងកក ប្រទេសថៃ និងមានស្រុកកំណើតក្នុងភូមិត្រពាំងតាម៉ូក ឃុំពានរោង ស្រុកស្វាយអន្ទរ ខេត្តព្រៃវែង។
តាមប្រភពពីក្រុមគ្រួសារសាច់ញាតិរបស់ជនរងគ្រោះបានប្រាប់ឱ្យដឹងថា គ្រោះថ្នាក់ខាងលើបានកើតឡើងកាលពីម៉ោងជាង៣រសៀលថ្ងៃទី១៦ មិថុនា ឆ្នាំ២០១៩ ខណៈពេលដែលជនរងគ្រោះកំពុងឡើងផ្សារដែកកំពស់ប្រហែល៧ទៅ៨ម៉ែត្រនៅក្នុងការដ្ឋានសំណង់មួយ ស្រាប់តែបាក់រន្ទាធ្លាក់មកដី បណ្តាលឲ្យជនរងគ្រោះរងរបួសធ្ងន់ ហើយក្រោយមកក៏បានស្លាប់នៅយប់ថ្ងៃដដែលក្នុងមន្ទីរពេទ្យក្រុងបាងកក។
សពជនរងគ្រោះត្រូវបានភាគីថៃបញ្ជូនមកវិញតាមច្រកទ្វារអន្តរជាតិប៉ោយប៉ែតកាលពីយប់ថ្ងៃទី១៨ មិថុនា ហើយត្រូវសាច់ញាតិជួលរថយន្តដើម្បីដឹកបន្តទៅលំនៅដ្ឋានធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ