ខេត្តព្រះសីហនុ ៖ អភិបាលនៃគណអភិបាលខេត្តព្រះសីហនុដឹកនាំមន្ត្រីមានមន្ទីរបរិស្ថាន មន្ទីរឧស្សាហកម្ម និងសិប្បកម្ម អភិបាលស្រុកស្ទឹងហាវ ចុះពិនិត្យទីតាំងរោងចក្របំលែងកាក សំណល់ផេះធ្យូងថ្ម ស៊ីម៉ាវ នៅថ្ងៃទី១៧…
ខេត្តព្រះសីហនុ ៖ អភិបាលនៃគណអភិបាលខេត្តព្រះសីហនុដឹកនាំមន្ត្រីមានមន្ទីរបរិស្ថាន មន្ទីរឧស្សាហកម្ម និងសិប្បកម្ម អភិបាលស្រុកស្ទឹងហាវ ចុះពិនិត្យទីតាំងរោងចក្របំលែងកាក សំណល់ផេះធ្យូងថ្ម ស៊ីម៉ាវ នៅថ្ងៃទី១៧ ខែមិថុនា ស្ថិតនៅក្រុម៤ ភូមិ២ ឃុំអូរត្រះ ស្រុកស្ទឹងហាវ ខេត្តព្រះសីហនុ ។
ថ្មីៗនេះមានប្រជាពលរដ្ឋចំនួន៤២គ្រួសារ រស់នៅតំបន់ជុំវិញរោងចក្របំលែងកាកសំណល់ផេះធ្យូងថ្ម (ស៊ីម៉ាវ) ដែលប្រមូលផេះចេញពីរោងចក្រផលិតអគ្គិសនីដើរដោយធ្យូងថ្មយកមកសម្ងួត ដើម្បីផ្គត់ផ្គង់ទៅឱ្យរោងចក្រក្រឡុកស៊ីម៉ងដែលបង្កផលប៉ះពាល់ដល់ប្រជាពលរដ្ឋរស់នៅជុំវិញរោងចក្រ ។
ឯកឧត្តម យន្ត មីន បានមានប្រសាសន៍ថា ប្រជាពលរដ្ឋ៤២គ្រួសារ រស់នៅជុំវិញរោងចក្រសម្ងួកាកសំណល់ធ្យូងថ្ម ស្នើរសុំឲ្យរដ្ឋបាលខេត្តស្រុកជួយអំពីបរិស្ថាន (ផេះ) ដែលពួកគាត់ពិបាករស់នៅ ។ អភិបាលខេត្ត អភិបាលស្រុក មន្ទីរបរិស្ថាន មន្ទីរឧស្សាហកម្ម និងសិប្បកម្មឃុំ ភូមិ ដើម្បីចុះមកពិនិត្យសកម្មភាពជាក់ស្តែងនៅរោងចក្រផលិតកាកសំណល់ផេះពីរោងចក្រធ្យូងថ្ម ជាវត្ថុធាតុដើម ។
ឯកឧត្តមបន្តថា រោងចក្រនេះមានច្បាប់អនុញ្ញាតត្រឹមត្រូវពីក្រសួង ក៏ប៉ុន្តែបច្ចុប្បន្នវាមានផលប៉ះពាល់ដល់ប្រជាពលរដ្ឋរស់នៅជុំវិញបង្កផលប៉ះពាល់បរិស្ថាន និងសុខមាលភាពប្រជាពលរដ្ឋ ការចុះពិនិត្យរបស់ក្រុមការងារពិនិត្យឃើញថា រោងចក្រមិនបង្កផលប៉ះពាល់អាក្រក់ពេកនោះទេ ព្រោះផេះនេះយកចេញមកពីរោងចក្រអគ្គិសនីធ្យូងថ្ម ដើម្បីកែឆ្នៃជាប្រយោជន៍ យកទៅផ្គត់ផ្គង់ឱ្យរោងចក្រក្រឡុកបេតុង ។
ដំណោះស្រាយយើងបានឯកភាពឱ្យរោងចក្រនេះកែលម្អលក្ខណបច្ចេកទេសធ្វើយ៉ាងណាកុំឱ្យមានផេះហុយមកលើផ្ទះបងប្អូនប្រជាពលរដ្ឋបន្តទៀតកាត់បន្ថយផលប៉ះពាល់ និងបំបាត់ផលប៉ះពាល់ដោយទុករយៈពេល២ ឬ៣ខែបន្តទៀត ប្រសិនរោងចក្រមិនអាចអនុវត្តតាមការណែនាំរបស់ក្រុមការងារទេ និងត្រូវបញ្ឈប់ដំណលរការ ឬក្រុមហ៊ុនរកទីតាំងថ្មី ដែលនៅឆ្ងាយពីប្រជាពលរដ្ឋ ។ ប្រសិនបើគាត់កែលម្អបានល្អ យើងនឹងឱ្យគាត់បន្តអាជីវកម្ម ។ ព្រោះដំណោះស្រាយ គឺយើងធ្វើដើម្បីឈ្នះឈ្នះទាំងអស់គ្នា អ្នកវិនិយោគក៏ទទួលបានផលប្រយោជន៍ ប្រជាពលរដ្ឋក៏ទទួលបានការងារពីរកាវិនិយោគនៅនឹងកន្លែង ព្រោះក្រុមហ៊ុនបានបង់ពន្ធចូលថវិការដ្ឋ ហើយប្រជាពលរដ្ឋបានការងារធ្វើទទួលបានផលប្រយោជន៍ទៅវិញទៅមក ។
ឯកឧត្តមបានសំណូមពរប្រជាពលរដ្ឋមានការយោគយល់ បើមិនមានផលប៉ះពាល់ធ្ងន់ធ្ងរទេ ត្រូវចេះយោគយល់ ព្រោះប្រជាពលរដ្ឋក៏ទទួលបានផលប្រយោជន៍ពីការវិនិយោគ និងទទួលបានការងារផងដែរ ។
ដោយឡែកលោក Chen Song អ្នកគ្រប់គ្រងរោងចក្រកែឆ្នៃកាកសំណល់ធ្យូងថ្មបានមានប្រសាសន៍ឲ្យដឹងថា បច្ចុប្បន្នរោងចក្ររបស់លោកធ្វើការសម្ងួតកាកសំណល់ពីរោងចក្រធ្យូងថ្ម ដើម្បីយកទៅផ្គត់ផ្គង់ដល់រោងចក្រក្រឡុកស៊ីម៉ង់ក្នុងមួយថ្ងៃ១០០តោន ។ លោកក៍បានសន្យាថា និងកែលម្អបរិស្ថាននៅក្នុងរោងចក្រកុំឱ្យហុយចេញមកក្រៅបន្តទៀតបង្កផលប៉ះពាល់ដល់ប្រជាពលរដ្ឋ ហើយសន្យាធានាកាត់បន្ថយ មិនឱ្យមានផលប៉ះពាល់ដល់បរិស្ថាន និងសុខមាលភាពប្រជាពលរដ្ឋដែលរស់នៅជុំវិញតំបន់រោងចក្រនេះ ៕ កែសម្រួលដោយ ៖ សុឃាក់
ចែករំលែកព័តមាននេះ