ប្រទេសអេហ្ស៊ីប ៖ អតីតប្រធានាធិបតីអេហ្ស៊ីបមកពីក្រុមបងប្អូនអុីស្លាម លោកម៉ូហាម៉េដម័រស៊ីអាយុ៦៧ឆ្នាំ បានទទួលមរណភាពហើយកាលពីថ្ងៃទី១៧ មិថុនា ក្រោយពីបើកសវនាការនៅមុខតុលាការមួយនៃទីក្រុងគែរ ជិត៦ឆ្នាំក្រោយការកម្ចាត់លោក ចេញពីតំណែង ដោយប្រធានាធិបតីបច្ចុប្បន្ន…
ប្រទេសអេហ្ស៊ីប ៖ អតីតប្រធានាធិបតីអេហ្ស៊ីបមកពីក្រុមបងប្អូនអុីស្លាម លោកម៉ូហាម៉េដម័រស៊ីអាយុ៦៧ឆ្នាំ បានទទួលមរណភាពហើយកាលពីថ្ងៃទី១៧ មិថុនា ក្រោយពីបើកសវនាការនៅមុខតុលាការមួយនៃទីក្រុងគែរ ជិត៦ឆ្នាំក្រោយការកម្ចាត់លោក ចេញពីតំណែង ដោយប្រធានាធិបតីបច្ចុប្បន្ន លោកអាប់ដែលហ្វាតាហ៍អាល់ស៊ីសស៊ី ដែលកាលនោះជាប្រមុខយោធា។
អគ្គអយ្យការអេហ្ស៊ីបក្នុងសេចក្ដីប្រកាសមួយគូសបញ្ជាក់ថា តុលាការផ្ដល់ឱកាសឲ្យលោកម័រស៊ីនិយាយ៥នាទី។ ពេលនោះលោកក៏ដួលក្នុងទ្រុងឃុំឃាំង ហើយលោកត្រូវបញ្ជូនភា្លមៗទៅមន្ទីរពេទ្យ រួចលោកក៏ទទួលមរណភាពនៅទីនោះ។ យោងតាមទូរទស្សន៍រដ្ឋអេហ្ស៊ីបថា លោកម័រស៊ីបានស្លាប់ដោយគាំងបេះដូង។
អតីតប្រធានាធិបតីរូបនោះជាប់ឃុំឃាំងចាប់តាំងពីខែកក្កដាឆ្នាំ២០១៣មក កាលពីថ្ងៃទី១៧មិថុនាត្រូវនាំមកកាន់តុលាការ។ មេធាវីម្នាក់របស់លោកនិយាយថា យើងមិនទាំងអាចបានឃើញលោកនៅតុលាការផង ដោយសាររបាំងកញ្ចក់ការពារគ្រាប់។ ប៉ុន្តែបណ្ដាអ្នកជាប់ឃុំឃាំងឯទៀតៗបានផ្ដល់សញ្ញាថា ជីពចរលោកលែងមានទៅហើយ។
ទាំងមេធាវីទាំងសាច់ញាតិគ្រួសាររបស់អតីតប្រធានាធិបតីរូបនោះមិនទាំងត្រូវបានគេប្រាប់ថា តើបញ្ជូនលោកទៅមន្ទីរពេទ្យណាផង។ តាមមេធាវីរូបនោះថា សពរបស់លោកម័រសីុនឹងបញ្ចុះនៅMEDINAT NASR ជាសង្កាត់មួយនាភាគខាងកើតក្រុងគែរ តែគេពុំដឹងថានាពេលណាឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ