(រដ្ឋធានីវ៉ាស៊ីនតោន)៖ សហរដ្ឋអាមេរិកកំពុងតែមានគម្រោងដាក់ពន្ធលើផលិតផលចិនបន្ថែមទៀតដែលអាចបង្កការប៉ះពាល់ដល់ទីផ្សារនិងវិស័យធំៗជាច្រើនជុំវិញពិភពលោក។ ចំណុចមានន័យថា អាជីវកម្មធំៗនឹងមានឱកាសរយៈពេល៧ថ្ងៃក្នុងការជជែកពិភាក្សាជាមួយនឹងរដ្ឋាភិបាលចាប់ពីថ្ងៃច័ន្ទនេះទៅទៅ ក្នុងនោះវិស័យមួយចំនួនដូចជាដែកថែប និងអាលុយមីញូ៉មជាដើមទទួលបានអត្ថប្រយោជន៍ពីគោលនយោបាយលោកប្រធានាធិបតីដូណាល់ត្រាំ (Donald Trump) និងគាំទ្រឲ្យមានការដាក់ពន្ធនាំចូល។ នេះបើយោងតាមភ្នាក់ងារសារព័ត៌មាន APF រាយការណ៍កាលពីថ្ងៃច័ន្ទម្សិលមិញនេះ ។
ប៉ុន្តែអាជីវកម្មជាច្រើនកំពុងតែទាមទារឲ្យរដ្ឋាភិបាលលើកលែងពន្ធដលើផលិតផលនាំចូលដែលពួកគេពឹងផ្អែកលើ ឬបញ្ឈប់ការដាក់ពន្ធទាំងស្រុងដែលប៉ះពាល់ដល់ការលូតលាស់ពិភពលោក។ ប្រសិនបើត្រូវបានអនុម័ត ពន្ធលើផលិតផល ៣០០ប៊ីលានដុល្លារនឹងប៉ះពាល់ដល់ផលិតផលប្រមាណរាប់ទ្រីលានដុល្លារដែលប្រជាជនអាមេរិកទិញពីប្រទេសចិនជារៀងរាល់ឆ្នាំ។
ភ្នាក់ងារពាណិជ្ជកម្មធំៗគាំទ្រការរិះគន់របស់លោកត្រាំលើប្រទេសចិនដែលចោទប្រកាន់ថាបានលួចរឿងសម្ងាត់ពាណិជ្ជកម្ម និងអនុញ្ញាតឲ្យរដ្ឋាភិបាលលូកដៃចូលក្នុងទីផ្សារយ៉ាងខ្លាំង។
ក៏ប៉ុន្តែអាជីវកម្មអាមេរិករាប់រយក្រុមហ៊ុនដែលរួមមាន Target និង Walmart បានព្រមានដល់លោកប្រធានាធិបតីរូបនេះក្នុងសំបុត្រស្នើមួយកាលពីថ្ងៃព្រហស្បត្តិ៍ថាពន្ធថ្មីនឹងធ្វើឲ្យសហរដ្ឋអាមេរិកបាត់បង់ការងារ២លានកន្លែង និងកាត់បន្ថយការលូតលាស់ GDP ប្រទេសដល់ទៅ ១%ថែមទៀត។ មកដល់បច្ចុប្បន្ននេះ សហរដ្ឋអាមេរិកបានដាក់ពន្ធលើផលិតផលចិនច្រើនជាង ២៥០ប៊ីលានដុល្លារទៅទៀត ប៉ុន្តែរដ្ឋាភិបាលបានលើកលែងដល់ផលិតផលសំខាន់ៗភាគច្រើន។
យ៉ាងណាក្តី លោក William Reinsch ដែលជាអ្នកជំនាញផ្នែកគោលនយោបាយពាណិជ្ជកម្មនៅមជ្ឈមណ្ឌលយុទ្ធសាស្ត្រ និងសិក្សាអន្តរជាតិបានប្រាប់ដល់ AFP ថាពន្ធថ្មីនឹងប៉ះពាល់ដល់អតិថិជនធម្មតាច្រើនជាង។
លោកប្រធានាធិបតី ដូណាល់ ត្រាំ សង្ឃឹមថានឹងអាចដោះស្រាយបញ្ហាជម្លោះជាមួយប្រទេសចិននេះក្នុងកិច្ចប្រជុំមួយជាមួយនឹងលោកប្រធានាធិបតីស៊ីជិនពីង (Xi Jinping) នៅចុងខែនេះក្នុងកំឡុងកិច្ចប្រជុំ G20 ក្នុងប្រទេសជប៉ុន៕ (កែសម្រួលដោយ ៖ បុប្ផា)
ចែករំលែកព័តមាននេះ