ខេត្តកំពង់ឆ្នាំង ៖ ត្រាក់ទ័រ៥គ្រឿងត្រូវបានកម្លាំងនគរបាលការិយាលយ័ប្រឆាំងបទល្មើសសេដ្ឋកិច្ចខេត្តកំពង់ឆ្នាំងធ្វើការបង្ក្រាបបាន ខណៈដែលពួកគេកំពុង់ធ្វើសកម្មភាពភ្ជួររុករានទន្ទ្រានដីព្រៃលិចទឹកនៅក្នុងតំបន់៣ ។ កិច្ចប្រតិបត្តិការធ្វើឡើងនៅរសៀលថ្ងៃទី១៦ មិថុនា ២០១៩ នៅចំណុចម៉ៅពុល ស្ថិតក្នុងភូមិកង្កែប ឃុំច្រណូកស្រុកកំពង់លែង ខេត្តកំពង់ឆ្នាំង ។
លោក ជុន ថារិទ្ធ ស្នងការរងនគបាលខេត្តទទួលបន្ទុកប្រឆាំងបទល្មើសសេដ្ឋកិច្ចបានអោយដឹងថា មុនឈានដល់ការបង្ក្រាបដោយមានការណែនាំ និងចង្អុលបង្ហាញពីគណៈបញ្ជាការឯកភាពខេត្តក៏ដូចជា ទទួលបទបញ្ជាពេលលោកឧត្តមសេនីយ៍ស្នងការនគរបាលខេត្តលោកបានដាក់កម្លាំងឃ្លាំមើលក៏បានឃើញសកម្មភាពបទល្មើសមានត្រាក់ទ័រ កំពុងឈូសឆាយដីព្រៃលិចទឹកនៅចំណុចខាងលើចំនួន៥ គ្រឿង រួចក៏បានរាយការណ៍ និងបានការអនុញ្ញាតិពីលោកព្រះរាជអាជ្ញាអមសាលាដំបូងខេត្តកំពង់ឆ្នាំង ក៏ធ្វើការឃាត់និងនាំយកមកកាន់ស្នងការណ៍នគបាលធ្វើការសាកសួរ ដើម្បីកសាងសំណុំរឿងតាមនីតិវិធី ។
ស្នងការនគបាលខេត្តបានអោយដឹងថា កន្លងមកក្រុមជនល្មើស និងឈ្មួញប្រើគ្រប់រូបភាពបន្លំភ្នែកសមត្ថកិច្ចដោយមានការឈូសឆាយនៅពេលយប់ និងមានអ្នកចាំមើលផ្លូវ និងមានការឃុបឃិតគ្នាគ្រប់រូបភាព ដែលសមត្ថកិច្ចពិបាក និងការបង្ក្រាប ។ ជាមួយ និងការឃាត់ត្រាក់ទ័រចំនួន៥គ្រឿង មនុស្ស៧នាក់ ក៏ត្រូវបានឃាត់ខ្លួនផងដែរ ក្នុងនោះមានអ្នកបើកត្រាក់ទ័រ៥នាក់ និងមេការចំនួន២នាក់ផងដែរ ។ ចំពោះទំហំនៃការខូចខាត ឬ ដីព្រៃលិចទឹកប្រមាណ ៤ហិកតា ។
សូមរំលឹកផងដែរដីតំបន់៣ ស្ថិតនៅភូមិសាស្ត្រ ស្រុកកំពង់លែង ត្រូវបានមន្ត្រីខិលខូចក្នុងនោះក៏មានសមាសភាពស្នងការរងនគរបាលខេត្តកំពង់ឆ្នាំងម្នាក់ បានលួចឈូសឆាយយកធ្វើកម្មសិទ្ធិប្រមាណជាង 1.000 ហិកតា ដោយប្រើរូបភាពយកឈ្មោះប្រជាពលរដ្ឋឈរឈ្មោះ ជាម្ចាស់ដីស្រែ ហើយពួកគេជាមន្ត្រីខិលខូចជាអ្នកជួលធ្វើស្រែទៅវិញ ។
ជុំវិញព័ត៌មាននៃការឃុបឃិតបំផ្លាញដីព្រៃលិចទឹក នៅតំបន់៣ខាងលើនេះដែរត្រូវបានសារព័ត៌មានជាច្រើនបានចុះផ្សាយជាបន្តបន្ទាប់ទើបឃើញមានការបង្ក្រាបលើកនេះ ដែលជាលើកទីមួយហើយ និងមានទ្រង់ទ្រាយធំជាងគេដែលមិនធ្លាប់មានពីមុនមក ៕ កែសម្រួលដោយ ៖ សុឃាក់
ចែករំលែកព័តមាននេះ