រាជធានីភ្នំពេញ ៖ ក្នុងពេលបំពេញទស្សនកិច្ចនៅប្រទេសអឺរ៉ុបរយៈពេលប៉ុន្មានថ្ងៃនេះសម្ដេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានជួបជាមួយបណ្ដាមេដឹកនាំប្រទេសអឺរ៉ុបជាច្រើនក្នុងនោះសម្ដេចក៏បានជួបជាមួយមេដឹកនាំប្រទេសតួកគីផងដែរ ។
នៅក្នុងជំនួបទ្វេភាគីប្រទេសទាំងពីរបានប្ដេជ្ញាពង្រីកទំហំពាណិជ្ជកម្មអោយកើនឡើងដល់១ប៊ីលានដុល្លារក្នុងមួយឆ្នាំ ខណៈបច្ចុប្បន្នប្រទេសទាំងពីរមានទំហំពាណិជ្ជកម្មត្រឹមតែ៩១លានដុល្លារអាមេរិកប៉ុណ្ណោះ ។ ការជំរុញពាណិជ្ជកម្មអោយបាន១ប៊ីលាននេះប្រទេសទាំងពីរមិនទាន់បានកំណត់ថា នឹងទទួលបានជោគជ័យនៅឆ្នាំណានោះទេ ។
លោកតាយយីប អ៊ែរដូហ្កាន ប្រធានាធិបតីតួកគីបានអោយដឹងថា បច្ចុប្បន្នទំហំពាណិជ្ជកម្មប្រទេសទាំងពីរមានត្រឹម៩១លានដុល្លារអាមេរិកប៉ុណ្ណោះ ហើយវាស្ថិតក្នុងកម្រិតទាបនៅឡើយ ។ បានស្នើឱ្យជំរុញការធ្វើពាណិជ្ជកម្មរវាងប្រទេសទាំងពីរឡើងទៅដល់៥០០លាន ឬ ១ពាន់លានដុល្លារអាមេរិកក្នុងមួយឆ្នាំ ។ លោកថា ៖« ដើម្បីសម្រេចបាននូវផែនការ និងយុទ្ធសាស្ត្រទំហំពាណិជ្ជកម្មនេះភាគីទាំងពីរគួរតែជំរុញឱ្យអ្នកវិនិយោគ និងពាណិជ្ជករតួកគី និងកម្ពុជារកស៊ីជាមួយគ្នាឱ្យកាន់តែច្រើនឡើង» ។
សម្តេចតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាបានអោយដឹងថា កម្ពុជាក៏ចង់ឃើញការជំរុញទំហំពាណិជ្ជកម្មនេះឱ្យដល់១ពាន់លានដុល្លារអាមេរិកផងដែរ ។ ដើម្បីជំរុញការងារភាគីទាំងពីរកម្ពុជា តួកគី គួរធ្វើបញ្ជីមុខទំនិញដែលអាចនាំចេញនាំចូលរវាងប្រទេសទាំងពីរ ពោលគឺ ទំនិញអ្វីដែលកម្ពុជាអាចនាំទៅតួកគីបាន ហើយតួកគីអាចនាំទំនិញអ្វីពីកម្ពុជាបាន ។
បច្ចុប្បន្ននេះតួកគីបានបើកស្ថានទូតរបស់ខ្លួន រួចហើយនៅរាជធានីភ្នំពេញ ហើយកម្ពុជាក៏កំពុងដំណើរការបើកស្ថានទូតរបស់ខ្លួន នៅទីក្រុងអង់ការ៉ា ប្រទេសតួកគីផងដែរ ។ តាមរយៈដំណើរការស្ថានទូតរវាងប្រទេសទាំងពីរនឹងជំរុញអោយការធ្វើពាណិជ្ជកម្មរវាងគ្នាកាន់តែរលូន នឹងជំរុញអោយមានការធ្វើវិនិយោគទៅវិញទៅមកផងដែរ ហើយក៏អាចជំរុញឱ្យទំហំពាណិជ្ជកម្មរវាងប្រទេសទាំងពីរនឹងអាចឆាប់ដល់គោលដៅផងដែរ ។ ប្រទេសតួកគីក៏មានបំណងស្នើសុំអោយខ្លួន ក្លាយពីប្រទេសដៃគូសន្ទនាតាមវិស័យទៅជាប្រទេសដៃគូរសន្ទនារបស់អាស៊ានពេញសិទ្ធិផងដែរ ។ សម្តេចតេជោនាយករដ្ឋមន្ត្រីបានសម្តែងការគាំទ្រ ហើយបានសន្យាធ្វើការជាមួយប្រទេសដទៃទៀត ដើម្បីគាំទ្រលើកកម្ពស់ដៃគូរបស់តួកគីជាមួយអាស៊ាន ៕ កែសម្រួលដោយ ៖ សុឃាក់
ចែករំលែកព័តមាននេះ