ខេត្តប៉ៃលិន ៖ បុរសម្នាក់ស្លាប់ភ្លាមៗនៅនឹងកន្លែងគួរឱ្យអាណោចអាធ័ម ខណ:ទៅស៊ីឈ្នួលជម្រះស្មៅនៅក្នុងចម្ការដំឡូងមីឱ្យថៅកែម្នាក់ ស្រាប់តែប៉ះចំគ្រាប់យុទ្ធភ័ណ្ឌ១គ្រាប់ប្រភេទបេ៤០ ដែលសេសសល់ពីសម័យសង្គ្រាម បណ្តាលឱ្យផ្ទុះយ៉ាងកក្រើកស្លាប់ភ្លាមៗនៅនឹងកន្លែងតែម្តង ។ ហេតុការណ៍ខាងលើនេះបានកើងឡើងកាលពីវេលាម៉ោង៣និង២៥នាទីរសៀលថ្ងៃទី១៣ ខែមិថុនា…
ខេត្តប៉ៃលិន ៖ បុរសម្នាក់ស្លាប់ភ្លាមៗនៅនឹងកន្លែងគួរឱ្យអាណោចអាធ័ម ខណ:ទៅស៊ីឈ្នួលជម្រះស្មៅនៅក្នុងចម្ការដំឡូងមីឱ្យថៅកែម្នាក់ ស្រាប់តែប៉ះចំគ្រាប់យុទ្ធភ័ណ្ឌ១គ្រាប់ប្រភេទបេ៤០ ដែលសេសសល់ពីសម័យសង្គ្រាម បណ្តាលឱ្យផ្ទុះយ៉ាងកក្រើកស្លាប់ភ្លាមៗនៅនឹងកន្លែងតែម្តង ។
ហេតុការណ៍ខាងលើនេះបានកើងឡើងកាលពីវេលាម៉ោង៣និង២៥នាទីរសៀលថ្ងៃទី១៣ ខែមិថុនា ឆ្នាំ២០១៩ ស្ថិតនៅចំណុចចំការដំឡូងមីមួយកន្លែងក្បែរមាត់ស្ទឹង ក្នុងភូមិថ្នល់បត់ ឃុំអូរអណ្ដូង ស្រុកសាលាក្រៅ ខេត្តប៉ៃលិន ។
ជនរងគ្រោះដែលស្លាប់ឈ្មោះ វិន ភេទប្រុស អាយុ២១ ឆ្នាំ ជាកសិករ រស់នៅភូមិស្ទឹងត្រង់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន។
តាមនគរបាលនៃអធិការដ្ឋានស្រុកសាលាក្រៅបានឲ្យដឹងថា មុនពេលកើតហេតុ គេឃើញជនរងគ្រោះធ្វើដំណើរចេញពីផ្ទះរបស់ខ្លួនទៅស៊ីឈ្នួលជម្រះស្មៅដំឡូងមីឲ្យម្ចាស់ចំការម្នាក់ ឈ្មោះ សឿន ក្នុងនោះក៏មានកម្មករចំនួនជិត១០នាក់ផងដែរ ។ ស្របពេលដែលជនរងគ្រោះកំពុងតែធ្វើការជម្រះស្មៅ ខណៈកម្មករដទៃទៀត គេធ្វើការលឿនជាង ក៍ដើរទៅមុខអស់ នៅសល់តែជនរងគ្រោះម្នាក់ឯងកំពុងជម្រះស្មៅនៅតាមគល់ដំឡូងមី ។
តាមនគរបាលនៃអធិការដ្ឋានស្រុកសាលាក្រៅបានបន្តឲ្យដឹងថា លុះពេលជនរងគ្រោះកំពុងតែជម្រះស្មៅនៅតាមគល់ដំឡូងមី ស្រាប់តែចុងកណ្តៀវជ្រុលទៅប៉ះនឹងគ្រាប់បេប្រភេទ៤០ ដែលសេសសល់ពីសង្គ្រាម បណ្ដាលឱ្យផ្ទុះលាន់យ៉ាងកក្រើក ធ្វើឱ្យកំទេចអំបែងខ្ទាតចំមុតសុសពេញខ្លួន ហើយជនរងគ្រោះក៏បានស្លាប់ភ្លាមៗនៅនឹងកន្លែងតែម្តង ។
តាមនគរបាលនៃអធិការដ្ឋានស្រុកសាលាក្រៅបានបន្តទៀតថា ក្រោយពេលកើតហេតុ កម្លាំងសមត្ថកិច្ចនគរបាលនៃអធិការដ្ឋាននគរបាលស្រុកសាលាក្រៅ ក៏ចុះដល់កន្លែងកើតហេតុ ដើម្បីត្រួតពិនិត្យ និងធ្វើរបាយការណ៍បញ្ជូនទៅថ្នាក់លើ ។ ចំណែកសពជនរងគ្រោះ ត្រូវបាននគរបាលជំនាញប្រគល់ជូនក្រុមគ្រួសារដើម្បីយកទៅធ្វើបុណ្យតាមប្រពៃណី ។
សូមបញ្ជាក់ផងដែរថា កន្លែងដែលជនរងគ្រោះជម្រះស្មៅដំឡូងមី ហើយប៉ះចំគ្រាប់យុទ្ធភ័ណ្ឌបណ្តាលឱ្យផ្ទុះស្លាប់នេះ គឺជាដីចម្ការដែលម្ចាស់ធ្វើជារៀងរាល់ឆ្នាំ មិនធ្លាប់ឃើញមានគ្រាប់អ្វីនោះទេ ស្រាប់តែពេលនេះ សង្ស័យភ្លៀងធ្លាក់ហូរដីពីចម្ការចេញ បណ្តាលឱ្យផុសឡើងនូវគ្រាប់មិនផ្ទុះ លុះជនរងគ្រោះជម្រះស្មៅតាមគល់ដំឡូងមីប៉ះចំក៏ផ្ទុះបណ្តាលឱ្យស្លាប់តែម្តង ។ ម្យ៉ាងវិញទៀត នៅចំណុចកើតហេតុខាងលើ គេមិនទាន់ដឹងថា អង្គភាពកំចាត់មីនកម្ពុជាចូលទៅរាវរកគ្រាប់មីនហើយ ឬនៅទេ ៕ (កែសម្រួលដោយ ៖ ធីតា)
ចែករំលែកព័តមាននេះ