រាជធានីភ្នំពេញ ៖ បុរសម្នាក់ជាមន្ត្រី PM ពាក់សក្ដិ៤កន្លះ ស្រវឹងស្រាបើករថយន្តក្នុងល្បឿនយ៉ាងលឿន ហើយជិះបញ្ច្រាសទិសដៅចរាចរណ៍ទៅបុករះម៉ូតូចំនួន៤គ្រឿង និងកង់បីឥណ្ឌាមួយគ្រឿង បណ្តាលអោយរងរបួសធ្ងន់ស្រាលចំនួន៦នាក់ ដែលហេតុការណ៍នេះបានកើតឡើង កាលពីវេលាម៉ោង៨យប់ ថ្ងៃទី១៣ ខែមិថុនានេះ តាមបណ្តោយផ្លូវសហព័ន្ធរុស្សី នៅចំណុចក្តាន់ពីរ ស្ថិតនៅក្នុងសង្កាត់មិត្តភាព ខណ្ឌ៧មករា ។
សាក្សីដែលឃើញហេតុការណ៍បានអោយដឹងថា មុនពេលកើតហេតុគេបានឃើញបុរសម្នាក់គ្រាន់តែដឹងថា ជាមន្ត្រី PM ពាក់សក្តិ៤កន្លះ ស្រវឹងស្រាបើករថយន្តបង្កមួយគ្រឿងម៉ាកឡិចស៊ីស 470 ពណ៌ខ្មៅ ពាក់ស្លាកលេខភ្នំពេញ 2K-1668 បើកបរតាមបណ្តោយផ្លូវ R6 បឹងកក់ ក្នុងទិសដៅពីជើងទៅត្បូង ។
ខណៈពេលបើកមកដល់ចំណុចកើតហេតុខាងលើនេះ ក៏ស្រាប់តែបើកលឿនបួងចង្កូតជ្រុលចូលម្ខាងផ្លូវទៀត បុករះម៉ូតូទាំងអស់ចំនួន៤គ្រឿង ម៉ាកវីវ៉ា ពណ៌ក្រហម ពាក់ស្លាកលេខរដ្ឋ ៣៦1-0912 ពណ៌ស ពាក់ស្លាកលេខភ្នំពេញ 1CR-3065 ម៉ាកហុងដាឌ្រីម ពណ៌ខ្មៅ ពាក់ស្លាកលេខភ្នំពេញ1BC-5328 និងម៉ាកស៊ុយសុគីនិច ពណ៌ស មិនចាំស្លាកលេខ ព្រមទាំងម៉ូតូកង់បីឥណ្ឌា ពណ៌ស ធ្វើឲ្យខូចខាតម៉ូតូទាំងស្រុង៣គ្រឿង រីឯម្ចាស់ម៉ូតូរងរបួសធ្ងន់២នាក់ និងស្រាល៤នាក់ ។
ភ្លាមៗនោះដែលជនរងគ្រោះទាំងអស់ត្រូវបានរថយន្តសង្គ្រោះរបស់គ្លីនិកហុងហាក់ដឹកយកទៅព្យាបាលបាត់ទៅ ដោយឡែកអ្នកបើករថយន្តបង្កវិញត្រូវបានសមត្ថកិច្ចខណ្ឌ៧មករា ធ្វើការឃាត់ខ្លួនយកទៅអធិការដ្ឋាននគរបាលខណ្ឌ៧មករា ដើម្បីសួរនាំ ។
ក្រោយពេលកើតហេតុខាងលើនេះរថយន្តបង្ក និងម៉ូតូរងគ្រោះទាំងអស់ត្រូវបានសមត្ថកិច្ចធ្វើការវាស់វែងយកទៅរក្សាទុកនៅការិយាល័យចរាចរណ៍ផ្លូវគោក ដើម្បីរងចាំធ្វើការដោះស្រាយគ្នានៅពេលក្រោយទៀត ៕ កែសម្រួលដោយ ៖សុឃាក់
ចែករំលែកព័តមាននេះ