ខេត្តកំពង់ចាម៖ «មានមេភូមិម្នាក់នៅក្នុងក្រុងកំពង់ចាម បានរត់ការសេវាឱ្យពលរដ្ឋម្នាក់នៅក្នុងភូមិរបស់ខ្លួន ហើយដល់ថ្ងៃត្រូវមកយកឯកសារ បែរជាមិនបាន ហើយមេភូមិនោះថែមទាំងបានបង្គាប់ថា បើចង់
បានលឿនបង់ថែម៥០ដុល្លារទៀតនឹងឆាប់បានហើយ»។ នេះជាប្រសាសន៍របស់លោក គួច ចំរើន អភិ បាលនៃគណៈអភិបាលខេត្ត ថ្លែងនៅព្រឹកថ្ងៃទី១៣ មិថុនា ក្នុងកម្មវិធីសម្ពោធដាក់ឲ្យប្រើប្រាស់ការិយា ល័យច្រកចេញ-ចូលតែនៅស្រុកកំពង់សៀម ដោយបានគំរាមដកលោកមេភូមិរូបនោះទៀតផង ។
លោកគួច ចំរើន បានមានប្រសាសន៍ថា ការបង្កើតការិយាល័យច្រកចេញ-ចូលតែមួយ រហូតមកដល់ពេលនេះ បានចំនួន៣ហើយ ក្នុងនោះ មានស្រុកជើងព្រៃ ក្រុងកំពង់ចាម និងស្រុកកំពង់សៀម ដែលកំពុងតែប្រារព្ធកម្មពិធីសម្ពោធដាក់ឲ្យប្រើប្រាស់ ។ ក្នុងឆ្នាំ២០១៩ដដែលគ្រោង នឹងពង្រីកឲ្យបានចំនួន៣ស្រុកទៀតមានបាធាយ ព្រៃឈរ ចំការលើ ហើយនៅឆ្នាំ២០២០ខាងមុខ ដោយបានឯកភាពគ្នា ហើយរង់ចាំនីតិវិធីធ្វើផែនការហិរញ្ញវត្ថុ ដើម្បីកសាងច្រកចេញចូលតែមួយឲ្យបាន៤ស្រុកទៀត ងាយស្រួលដល់អ្នកមកទទួលសេវាសាធារណៈនេះ។
លោកគួច ចំរើន បន្តថា រាជរដ្ឋាភិបាលក្រោមការដឹកនាំរបស់សម្តេចតេជោសែន នាយករដ្ឋមន្ត្រីនៃព្រះរា ជាណាចក្រកម្ពុជា ដោយមើលឃើញនូវសេចក្តីត្រូវការបស់ប្រជាពលរដ្ឋនោះ រដ្ឋបាលខេត្តបានប្តេជ្ញាខិតខំ ធ្វើយ៉ាងណា ឲ្យកាន់តែមានលក្ខណៈងាយស្រួល កាន់តែខិតជិតទៅរកពលរដ្ឋនោះ ។ ការិយាល័យច្រកចេញចូលតែមួយនេះ មាន១៤វិស័យ ក្នុងនោះមានៈ អប់រំ សុខាភិបាលពាណិជ្ជកម្ម ដីធ្លីនិងផ្សេងៗទៀតមានចំនួន២១១សេវា ត្រូវបំរើដល់ពលរដ្ឋ កាលពីមិនទាន់មានច្រកចូលចូលតែមួយនោះមានការលំបាកច្រើន អ្នកដែលមកត្រូវរកសេវាត្រូវដើររកជំនាញច្រើននៅឆ្ងាយពីគ្នាតែពេលនេះមិនពិបាកដូចមុនទៀតទេ មន្ត្រីបំរើការងារនៅប្រចាំច្រកត្រូវចេញប័ណ្ណឲ្យពលរដ្ឋដែល មករកសេវានៅច្រកចេញចូលតែមួយ ។
លោកប៊ិន ឡាដា អភិបាលស្រុកកំពង់សៀមឱ្យដឹងថា ការិយាល័យច្រកចេញ-ចូលតែមួយ បានដាក់ឱ្យអនុវត្តសាកល្បងតាមអនុសាសន៍របស់លោក គួច ចំរើន អភិបាលខេត្តនូវសេវាចំនួនពីរប៉ុណ្ណោះ គឺសេវានីត្យានុកូលកម្ម និងឯកសារអត្រានុកូលដ្ឋានជាលទ្ធផល ក្នុងដំណាក់កាលសាកល្បងនេះ ការិយាល័យច្រកចេញ-ចូលតែមួយ ទទួលបានសេវានិត្យានុកុលកម្ម (សៀវភៅគ្រួសារ សៀវភៅស្នាក់នៅអត្តសញ្ញាប័ណ្ណ សញ្ញាប័ត្រ និងលិខិតបទដ្ឋានផ្សេងៗទៀត) សរុបចំនួន២.៤៩៨សេវា ក្នុងនោះ សេវាដែលតម្រូវឲ្យបង់កម្រៃមានចំនួន៥២៣សេវា ទទួលបានថវិការសរុបចំនួន៥២៣.០០០រៀល(ហាសិបពីរម៉ឺន៣ពាន់រៀល) និងសេវាអត្រានុកូលដ្ឋានសរុបចំនួន២.៣០៧សេវា ។ (សម្រួលដោយ៖ ស្រីណា)
ចែករំលែកព័តមាននេះ