រាជធានីភ្នំពេញ ៖ ខណៈដែលអ្នកនាង សារីណា ភរិយា អតីតារាសម្ដែងលោក ស៊ុក សុភា បានបង្ហោះខ្លឹមសារមួយចំនួនពាក់ព័ន្ធនឹងនារីពាក់អាវសិចស៊ី និងស្ត្រីវ័យចំណាស់ស្រគត់ស្រគំតែចិត្តខ្មៅចំពោះចៅនោះ ហើយគេឃើញមានអ្នកលេងហ្វេសប៊ុកមួយចំនួន បានសរសេររិះគន់អ្នកនាង ដែលអ្នកនាងចាត់ទុកថា ការរិះគន់នោះ កើតឡើងពីការភាន់ច្រឡំ។
អ្នកនាងបញ្ជាក់ថា ខ្លួនមិនមែនកាន់ជើងមនុស្សសិចស៊ីនោះទេ ប៉ុន្តែអ្នកនាងក៏ស្នើកុំឱ្យប្រទេចផ្ដាសាចំពោះអ្នកតែងខ្លួនសិចស៊ី ដោយប្រើភាសាអគតិដូចដែលបានផ្ទុះឡើងនៅក្នុងបណ្ដាញហ្វេសប៊ុកប៉ុន្មានថ្ងៃនោះទេ ។
ដោយអ្នកនាងបន្តថា សំបកខាងក្រៅរបស់មនុស្ស គឺមិនអាចឆ្លុះបញ្ចាំងពីចិត្តខាងក្នុងរបស់មនុស្សបានទេ។ ហេតុផលដែលនាំឱ្យមានការរិះគន់ចំពោះអ្នកនាងនោះ គឺបន្ទាប់ពីអ្នកនាងសរសេរបង្ហោះថា «យើងមិនអាចវិនិច្ឆយគេពីខាងក្រៅបានទេ អ្នកខ្លះស្លៀកពាក់ជិតៗ មើលទៅឃើញសុភាព តែធាតុពិតពិសពុល អ្នកខ្លះគេស្លៀកពាក់ sexy តែទឹកចិត្តអាចទូលំទូលាយ បើកចិត្តទទួលយកបាននៃភាពជឿនលឿន នេះហើយធ្វើឱ្យគេឆ្លាតវៃ ក្លាហ៊ាន អាចដោះស្រាយរឿងចំពោះមុខដោយភាពប៉ុនប្រសព្វ។ យើងល្មមជឿនលឿនខ្លះៗហើយ ដើម្បីភាពរីកចំរើនសម្រាប់សង្គមយើងខ្លះ តែសូមជឿនលឿន តែអ្វីដែលមានប្រយោជន៍»។
ក្រោយការបង្ហោះរបស់អ្នកនាង គេឃើញមានការលើកឡើងមួយចំនួនថា អ្នកនាងគាំទ្រភាពចំពោះភាពសិចស៊ី ដោយខ្លះរិះគន់ថា អ្នកនាងចង់លើកទឹកចិត្តឱ្យមានសកម្មភាពប្រាស់ចាកពីវប្បធម៌របស់ខ្មែរ។
ភ្លាមៗក្រោយការរិះគន់ពីបុគ្គលមួយចំនួនតូច អ្នកនាងបញ្ជាក់ថា អ្វីដែលអ្នកនាងបញ្ចេញយោបល់ មិនមែនគាំទ្រអ្នកលេចលើលេចក្រោមទាំងឡាយនោះទេ ប៉ុន្តែអ្នកនាងគ្រាន់តែចង់ឱ្យមានការបញ្ឈប់ការជេរប្រមាថចំពោះនារីម្នាក់នោះ និងស្នើឱ្យធ្វើការប្រៀបធៀបចំពោះដូនចាស់ម្នាក់ ដែលស្លៀកសារ៉ុង ស្លៀកពាក់ស្រគត់ស្រគំ តែបែរជាចិត្តអាក្រក់ ចិត្តមារចំពោះក្មេងតូចជាចៅរបស់ខ្លួន យ៉ាងឃោឃៅនោះផង។
អ្នកនាងថា នៅក្នុងសម័យនេះហើយ បងប្អូនអ្នកលេងហ្វេសប៊ុកគួរតែបើកចិត្តទូលាយទទួលយកបរិយាកាសទំនើបមួយ ដោយកុំគិតតែជេរប្រទេចផ្ដាសា ហើយមើលឃើញល្អតែមួយជ្រុងងប់ងល់ខ្លាំងពេក ដោយភ្លេចគិតពីសភាពខាងក្នុងរបស់បុគ្គលម្នាក់ៗ។ អ្នកនាងថា នារីដែលសិចស៊ី ហើយរងការជេរប្រទេច គឺដ្បិតថាមើលទៅហួសហេតុបន្តិចមែន ប៉ុន្តែនាងស្រស់ស្អាត ហើយក៏មិនប្រាកដទឹកចិត្តរបស់នារីម្នាក់នោះអាក្រក់នោះដែរ ដោយអ្នកនាងបញ្ជាក់ថា អ្នកធ្វើការរិះគន់ មិនគួរគ្រាន់តែឃើញបុគ្គលណាម្នាក់បញ្ចេញភាពសិចស៊ី ហើយជេរផ្កាប់មុខធ្វើឱ្យសង្គមកម្ពុជា ពោរពេញការមាក់ងាយនោះអុីចឹងទេ។
អ្នកនាងថា ខ្លួនក៏ជានារីខ្មែរ ប្រកាន់ភ្ជាប់ទំនៀមទម្លាប់ខ្មែរនោះដែរ ប៉ុន្តែបើនារីណាស្អាត ហើយសិចស៊ីទៅសម គឺអ្នកនាងគាំទ្រ ដើម្បីឱ្យក្រសែភ្នែកខាងក្រៅមើលឃើញថា នារីកម្ពុជា ក៏ស្រស់ស្អាតផង និងប្លែកភ្នែកផង កុំឃើញតែដដែលៗខ្លាំងពេក។ យ៉ាងណាមិញអ្នកនាងថា មិនទទួលយកដាច់ខាតចំពោះទង្វើសិចស៊ីហួសហេតុ ហើយធ្វើឱ្យបាត់តម្លៃជាតិ។ អ្នកនាងលើកឧទាហរណ៍ថា បវរកញ្ញាកម្ពុជា ដោយសារតែខ្លាចចំពោះការជេរប្រទេចពីអ្នករិះគន់ដែលតែងកើតមាននោះហើយ ទើបនារីទាំងនោះ មិនហា៑នធ្វើអ្វីឱ្យលេចធ្លោដូចបេក្ខនារីមកពីប្រទេសផ្សេងៗ ដែលអ្នកនាងយល់ថា ជាការបាត់ឱកាសស្ទើរគ្រប់ការប្រកួតលើឆាកអន្តរជាតិ។
ការលើករបស់អ្នកនាង គឺជាការពន្យល់ដល់អ្នក Comment រិះគន់សំណេរប្រៀបធៀបរបស់អ្នកនាងមួយចំនួន ដើម្បីបញ្ចប់ការយល់ច្រឡំ ដែលមានការយល់ច្រឡំ និងដើម្បីឱ្យបើកចិត្ត ទូលាយជាងនឹង កុំឱ្យការសម្គាល់តែលើសំបកខាងក្រៅ ក្លាយជារឿងអគតិចំពោះបុគ្គលណាម្បាក់។ អ្នកនាងថា អ្នករិះគន់ផ្កាប់មុខមួយចំនួនគួរបង្វែររិះគន់ និងបំពាក់ទឹកចិត្តទង្វើររបស់មនុស្សអគតិ និងមនុស្សចិត្តឃោរឃៅទាំងឡាយ ដើម្បីកែប្រែបុគ្គលទាំងនោះឱ្យមានឆន្ទៈល្អ ជាជាងនាំគ្នាមាក់ងាយ និងមើលងាយសំបកខាងក្រៅរបស់បុគ្គលណាម្នាក់ ហើយក្លាយជាការបញ្ចេញមតិឈ្លោះទាស់គ្នាឯង។ (កែសម្រួលដោយ ៖ បុប្ផា)
ចែករំលែកព័តមាននេះ