រាជធានីភ្នំពេញ ៖ ដូចការគ្រោងទុក ជនសង្ស័យជាអ្នកសមគំនិត និងចែកចាយគ្រឿងញៀននៅក្លិបកម្សាន្ត«លុច្សសារី»ចំនួន១៧នាក់ បានត្រូវនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ នៅព្រឹកថ្ងៃទី១២ ខែមិថុនា…
រាជធានីភ្នំពេញ ៖ ដូចការគ្រោងទុក ជនសង្ស័យជាអ្នកសមគំនិត និងចែកចាយគ្រឿងញៀននៅក្លិបកម្សាន្ត«លុច្សសារី»ចំនួន១៧នាក់ បានត្រូវនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ បញ្ជូនទៅសាលាដំបូងរាជធានីភ្នំពេញ ដើម្បីចាត់ការតាមច្បាប់ នៅព្រឹកថ្ងៃទី១២ ខែមិថុនា ខណៈគេដឹងថៅកែក្លិប គឺជាជនជាតិវៀតណាមកាត់ចិនមានឈ្មោះ ង្វៀន ថាញ់ទូ នៅមិនទាន់ចាប់ខ្លួនបាននៅឡើយទេ ។
ជនសង្ស័យទាំង១៧នាក់សុទ្ធតែបុរស ក្នុងចំណោមជនសង្ស័យចម្រុះជាតិសាសន៍ចំនួន៤០៨នាក់ ដែលត្រូវបានកម្លាំងនគរបាលស្នងការដ្ឋានរាជធានីភ្នំពេញ ឃាត់ខ្លួននៅក្នុងប្រតិបត្តិការបង្ក្រាបគ្រឿងញៀនយ៉ាងកក្រើក នៅក្លិបកម្សាន្ត លុច្សសារី ដែលមានអាសយដ្ឋានលេខ៤៦ ផ្លូវលេខ២១៤ សង្កាត់បឹងរាំង ខណ្ឌ ដូនពេញ ។
្រតិបត្តិការនេះ ដឹកនាំដោយលោកឧត្តមសេនីយ៍ឯក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងមានការចូលរួមសម្របសម្រួលពីលោក លី សុផាន់ណា ព្រះរាជអាជ្ញារងអមសាលាដំបូងរាជធានីភ្នំពេញ ។
សូមរំឭកថា កាលពីវេលាម៉ោង២និង៣០នាទី រំលងអធ្រាត្រឈានចូលថ្ងៃទី៨ ខែមិថុនា ឆ្នាំ២០១៩ កម្លាំងនគរបាលរាជធានីភ្នំពេញបានធ្វើការបង្ក្រាបគ្រឿងញៀនជាទ្រង់ទ្រាយធំនៅក្លិបកម្សាន្តលុច្សសារី ។ ក្នុងប្រតិបត្តិការនេះ សមត្ថកិច្ចធ្វើការឆែកឆេរចំនួន១១បន្ទប់ រួមទាំងក្លិបឌីស្កូនៅជាន់ក្រោមផងដែរ ដោយឃាត់ខ្លួន មនុស្សទាំងអស់ចំនួន៤០៨នាក់(ប្រុស២២៦នាក់ ស្រី១៨២នាក់) ក្នុងនោះដែរមានជនជាតិចិន វៀតណាម ម៉ាឡេស៊ី និងសិង្ហបុរីចំនួន១៩៧នាក់ ។
តាមរបាយការណ៍ពីការរឹបអូសសារធាតុញៀន ដោយសារតែមិនទាន់ផ្តល់ព័ត៌មានផ្លូវការ គឺគេដឹងតែគ្រឿងញៀនម៉ាទឹកកកជាង១ខាំប៉ុណ្ណោះ ។ ប៉ុន្តែតាមរបាយការណ៍ផ្លូវការបង្ហាញថា សមត្ថកិច្ចដកហូតបានថ្នាំញៀនប្រភេទម្សៅពណ៌ស កេតាមីនទម្ងន់៩៣,៦៦ក្រាម និងគ្រាប់អុិចស្តាស៊ី៣០,១៤ក្រាម ដែលជាថ្នាំគ្រវី សរុបទាំងអស់ចំនួន១៦៣,៣៤ក្រាម ព្រមទាំងសារធាតុមិនច្បាស់លាស់ចំនួន៣៩,៥៤ក្រាមផ្សេងទៀត ។
តាមនគរបាលឱ្យដឹងថា បន្ទាប់ពីឃាត់ខ្លួននគរបាលក៏បានស្រាវជ្រាវសាកសួររកឃើញជនសង្ស័យដែលពាក់ព័ន្ធនឹងការចែកចាយគ្រឿងញៀន និងសមគំនិតចំនួន១៧នាក់ ដែលត្រូវបានកសាងសំណុំរឿងបញ្ចូនទៅសាលាដំបូងរាជធានីភ្នំពេញ ចាត់ការតាមច្បាប់ ។ ដោយឡែក យុវជនចំនួន៦២នាក់មានសារធាតុញៀន ត្រូវបានឪពុកម្តាយ អាណាព្យាបាលស្នើសុំយកទៅបន្សាបគ្រឿងញៀនដោយខ្លួនឯង ។ ឯជនបរ ទេសចំនួន៣១នាក់ ត្រូវបានបញ្ជូនទៅកាន់អគ្គនាយក ដ្ឋានអន្តោប្រវេសន៍ ដើម្បីអនុវត្តនីតិវិធីតាមច្បាប់ និងមួយចំនួនទៀតមិនពាក់ព័ន្ធនិងគ្មានសារធាតុញៀន ត្រូវបានព្រះរាជអាជ្ញាធ្វើការអប់រំឲ្យត្រឡប់ទៅផ្ទះវិញ។
នេះជាលើកទី៣ហើយ ក្នុងរយៈពេលប៉ុន្មានខែកន្លងមកនេះ ដែលក្លិបកម្សាន្តចំនួន៣ ត្រូវបានកម្លាំងនគរបាលរាជធានីភ្នំពេញចុះបង្ក្រាបដោយឃាត់ខ្លួន នុស្សរាបរយនាក់ជាបន្តបន្ទាប់ ។ លើកទី១-បង្ក្រាបនៅមណ្ឌលកម្សាន្តរ៉ក់ កាលពីយប់ថ្ងៃទី២៣ ខែកុម្ភៈ ឆ្នាំ២០១៩ ឃាត់ខ្លួនជនសង្ស័យជាង៣០០នាក់ និងដកហូតបានថ្នាំញៀនជាង៥០គីឡូក្រាម ។ លើកទី២-ក្លិបម៉ៃអាមី មានទីតាំងផ្ទះ១៥៩ ផ្លូវលេខ៣៦០ សង្កាត់បឹងកេងកងទី១ ខណ្ឌចំការមន ត្រូវបានបង្ក្រាបនៅយប់ថ្ងៃទី១១ ខែមេសា ឆ្នាំ២០១៩ ឃាត់ខ្លួនជនសង្ស័យ៥០នាក់ ក្នុងនោះមានស្រី១២នាក់ និងសារធាតុញៀនមួយចំនួន ។ លើកទី៣-បង្ក្រាបគ្រឿងញៀននៅក្លិបលុច្សសារី ឃាត់ខ្លួនជនសង្ស័យចំនួន៤០៨នាក់ ព្រមទាំងថ្នាំញៀនមួយចំនួន ។
ចែករំលែកព័តមាននេះ