ប្រទេសកូរ៉េទាំងពីរ ៖ យោងតាមYONHAPថា ប្រធានាធិបតីកូរ៉េខាងត្បូងលោកMOON JAE IN កាលពីថ្ងៃទី១២មិថុនាបានសម្ដែងក្ដីសង្ឃឹមថា នឹងមានការជួបគ្នាកំពូលអន្តរកូរ៉េថ្មី ជាមួយមេដឹកនាំកូរ៉េខាងជើងលោកគីមជុងអ៊ុននាខែនេះ។
ក្នុងសុន្ទរកថាមួយក្នុងវេទិកាក្រុងអូស្លូប្រទេសន័រវែស លោកMOONរំឭកថា ប្រធានាធិបតីអាមេរិកលោកដូណាល់ត្រាំ នឹងមកកាន់កូរ៉េខាងត្បូងនាឱកាសលោកមកចូលរួមក្នុងកិច្ចប្រជុំកំពូលG20 ក្នុងទីក្រុងអូសាកាជប៉ុនពីថ្ងៃទី២៨ទៅ២៩មិថុនា។ លោកបន្តថាលោកយល់ថាលោកចង់ជួបគ្នាកំពូលថ្មីជាមួយលោកគីមជុងអ៊ុន មុនទស្សនកិច្ចរបស់លោកត្រាំនៅកូរ៉េខាងត្បូង។ ការសម្រេចស្ថិតលើលោកគីម ដែលលោកត្រៀមជួបនៅទីណាឬពេលណាក៏បាន។
ស្ដីពីសារលិខិតរបស់លោកគីមផ្ញើជូនលោកត្រាំ លោកMOONថាលោកត្រូវគេប្រាប់ពីរឿងនោះមុនរួចហើយ។ លោកបន្តថា ទោះជាអវត្តមាននៃការចរចាផ្លូវការរវាងកូរ៉េទាំង២និងរវាងកូរ៉េខាងជើងនិងសហរដ្ឋអាមេរិក ក៏សារលិខិតប្រភេទនោះត្រូវបានផ្ញើឲ្យគ្នាទៅវិញទៅមករវាងមេដឹកនាំទាំង២។ លោកដឹងពីបំណងរបស់លោកគីមបញ្ជូនលិខិតទៅឲ្យលោកត្រាំ រួចបន្ទាប់មកក្រុងវ៉ាសិុនតោន បានប្រាប់លោកពីរឿងនេះ។ គេក៏ប្រាប់ពីខឹ្លមសារនៃលិខិតនោះដែរ ព្រោះអាមេរិកនិងកូរ៉េខាងត្បូងជាទូទៅតែងចែករំលែកព័ត៌មានគ្នា។
ប្រធានាធិបតីកូរ៉េខាងត្បូងបន្តទៀតថាដោយសារមេដឹកនាំអាមេរិកនិងកូរ៉េខាងជើងបន្តផ្លាស់ប្ដូរសារលិខិតគ្នាបែបនេះ មានន័យថាជំហរនៃការចរចានៅតែមាន តែវាអាចរលាយទៅវិញប្រសិនបើភាពទ័លច្រកលើការចរចារំសាយនុយក្លេអ៊ែរ ចេះតែអូសបន្លាយពេលយូរ។លោកសង្ឃឹមថានឹងមានការជួបគ្នាកំពូលថ្មី រវាងលោកគីមនិងលោកត្រាំក្នុងពេលឆាប់ខាងមុខ៕ (កែសម្រួលដោយ ៖ បុប្ផា)
ចែករំលែកព័តមាននេះ