ប្រទេសជប៉ុន ៖ ប្រទេសកម្ពុជា និងប្រទេសអាស៊ានមួយចំនួនទៀតក្លាយជាគោលដៅដ៏សំខាន់សម្រាប់ការវិនិយោគរបស់ចិន ខណៈប្រទេសដែលមានប្រជាជនច្រើនជាងគេបំផុតនេះ កំពុងតែមានសង្គ្រាមពាណិជ្ជកម្មជាមួយសហរដ្ឋអាមេរិក។ នេះបើយោងតាមការចុះផ្សាយរបស់ភ្នាក់ងារសារព័ត៌មានជប៉ុន Nikkei Asian Review ។
ប្រទេសចិនបច្ចុប្បន្នគឺមានការវិនិយោគច្រើនជាងគេបំផុតនៅក្នុងប្រទេស កម្ពុជា។ តាមរបាយការណ៍បានបង្ហាញថាចិនបានវិនិយោគជាសាច់ប្រាក់ចំនួន ១២,៦០០លានដុល្លារអាមេរិកនៅប្រទេសកម្ពុជាចាប់តាំងពីឆ្នាំ១៩៩៤ មកហើយ ការវិនិយោគបានកើនឡើងខ្លាំងនៅក្នុងរយះពេលប៉ុន្មានឆ្នាំចុងក្រោយនេះ។
ប្រទេសកម្ពុជាត្រូវបានចាត់ទុកថាជាប្រទេសដែលមានទំនាក់ទំនងជិតស្និទ្ឋជាងគេជាមួយប្រទេសចិនក្នុងចំណោមប្រទេសអាស៊ានទាំង១០។ ចិនមិនត្រឹមតែជាប្រទេសវិនិយោគច្រើនជាងគេទេ ប៉ុន្តែថែមទាំងជាប្រទេសដែលបានផ្តល់ជំនួយច្រើនជាគេបំផុតដល់កម្ពុជាផងដែរ។ ទំនាក់ទំនងផ្នែកយោធារវាងប្រទេសទាំងពីរ ក៏បានកើនឡើងគួរអោយកត់សម្គាល់ដោយជំរុញអោយមានការតាមដានជាពិសេសពីប្រទេសអាមេរិកដែលព្រួយបារម្ភអំពីឥទ្ឋិពលរបស់ចិននៅតំបន់អាស៊ីអគ្នេយ៍ ពិសេសនៅកម្ពុជា។
ប៉ុន្តែមិនមែនតែប្រទេសកម្ពុជាទេដែលចិនបានបង្កើនការវិនិយោគនោះ។ សូម្បី ប្រទេសវៀតណាមដែលមានទំនាក់ទំនងមិនសូវល្អជាមួយចិនក៏ជាគោលដៅវិនិយោគ របស់ចិនដែរ។
សារព័ត៌មាន Nikkei Asian Review របស់ជប៉ុនបានរាយការណ៍ថាការវិនិយោគរបស់ចិននៅវៀតណាម បានកើនឡើងដល់ទៅ៥ទៅ៦ដងមកដល់ចំនួន១,៥៦០លានដុល្លារអាមេរិកពីដើមឆ្នាំ២០១៩ដល់ថ្ងៃទី២០ខែឧសភានេះ។ ចំណែកតួលេខវិនិយោគចន្លោះខែមករាដល់ខែមេសាឆ្នាំ២០១៩ក៏បាន មានចំនួនលើស ការ វិនិយោគឆ្នាំ២០១៨ទាំងមូលផងដែរ។ អាជីវកម្មភាគច្រើនរបសចិនបានផ្លាស់ទៅប្រទេសវៀតណាមជាពិសេសដោយសារភាពជិតស្និទ្ធភូមិសាស្ត្រនិងពលកម្មថោក។
របាយការណ៍របស់ក្រុមហ៊ុន Nomura Holdings ចេញផ្សាយកាលពីថ្ងៃច័ន្ទបានឱ្យដឹងថា ប្រទេសវៀតណាមជាប្រទេសទទួលបានអត្ថប្រយោជន៍ធំបំផុតនៃ សង្គ្រាមពាណិជ្ជកម្មដោយមានកំណើនសេដ្ឋកិច្ចស្មើនឹង ៧,៩% នៃផលិតផលក្នុងស្រុកសរុបគិតត្រឹមឆ្នាំ ២០១៩ គិតត្រឹមត្រីមាសទីមួយនៃឆ្នាំនេះ។ តៃវ៉ាន់ឈរនៅលំដាប់ទី ២ ដោយទទួលបានកំណើន ២,១% ខណៈដែលប្រទេសឈីលីបានឈរនៅលំដាប់លេខ ៣ គឺ ១,៥% ។
ប្រទេសថៃក៏ជាប្រទេសអាស៊ានមួយទៀតដែលបានស្រូបយកការវិនិយោគពីប្រទេសចិននៅក្នុងអំឡុងពេលនៃសង្គ្រាមពាណិជ្ជកម្មនេះ។ ទិន្ន័យរបស់រដ្ឋាភិបាលថៃបានបង្ហាញថាការវិនិយោគរបស់ចិននៅប្រទេសថៃនៅត្រីមាសដំបូងឆ្នាំ១០១៩ គឺចន្លោះពីខែមករាដល់មីនាមានតម្លៃជាទឹកប្រាក់ចំនួន៩៣៣លានដុល្លារអាមេរិក ។ ធនាគារអភិវឌ្ឍន៍អាស៊ីបាននិយាយថាចិនបានបង្កើនការវិនិយោគជាមួយប្រទេសអាស៊ីដែលកំពុងមានការអភិវឌ្ឍន៍ប៉ុន្តែសន្ទុះហាក់កើនឡើងដោយសារជម្លោះពាណិជ្ជកម្ម៕ (កែសម្រួលដោយ ៖ បុប្ផា)
ចែករំលែកព័តមាននេះ