កំពង់ចាម៖ ទីក្រុងរណបថ្មីមួយក្រោមការវិនិយោគរបស់ជនជាតិចិន បានចាប់ផ្ដើមដំណើរការសាងសង់ជាផ្លូវការហើយ ហើយនឹងត្រូវលេចចេញជារូបរាងនៅរយៈពេល២ឆ្នាំខាងមុខទៀតសម្រាប់ដំណាក់កាលទី១ ដែលវានឹងជំរុញសក្ដានុពលខេត្តមួយនេះ កាន់តែខ្លាំងឡើងនៅពេលអនាគត ។ លោកឧកញ៉ា ចេង…
កំពង់ចាម៖ ទីក្រុងរណបថ្មីមួយក្រោមការវិនិយោគរបស់ជនជាតិចិន បានចាប់ផ្ដើមដំណើរការសាងសង់ជាផ្លូវការហើយ ហើយនឹងត្រូវលេចចេញជារូបរាងនៅរយៈពេល២ឆ្នាំខាងមុខទៀតសម្រាប់ដំណាក់កាលទី១ ដែលវានឹងជំរុញសក្ដានុពលខេត្តមួយនេះ កាន់តែខ្លាំងឡើងនៅពេលអនាគត ។
លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាបានអោយដឹងថា ខេត្តកំពង់ចាមជាខេត្តមួយដែលមានអំណោយផលល្អ ជាក់ស្ដែង ខេត្តនេះមានសក្ដានុពលទៅលើដំណាំកសិកម្មនិងកសិឧស្សាហកម្មជាច្រើន ដែលធ្វើអោយប្រជាជនខេត្តនេះ មានជីវភាពធូរធារច្រើន តែចំនុចខ្វះខាតសម្រាប់ខេត្តនេះ គឺទីក្រុងរណបរបស់ខេត្ត ដែលនឹងលើកមុខមាត់ខេត្ត ក៏ដូចជាភាពស៊ីវិល័យប្រជាជនក្នុងខេត្តទាំងមូល ។ លោកឧកញ៉ាបន្តថា ដោយសារតែមើលពីសក្ដានុពល និងទីផ្សារអចលនទ្រព្យនៅក្នុងខេត្តកំពង់ចាម ក្រុមហ៊ុនយៀកថៃ បានបោះទុនវិនិយោគលើគម្រោងទីក្រុងរណបមួយ ឈ្មោះថា យៀកថៃស៊ីធី មានទំហំផ្ទៃដីប្រមាណជាង៥៣ហិចតា នៅទីរួមខេត្តកំពង់ចាមផ្ទាល់តែម្ដង និងរំពឹងថានឹងអាចទទួលបានជោគជ័យ ព្រមទាំងមានាករគាំទ្រពីប្រជាជនក្នុងខេត្តកំពង់ចាម និងប្រជាជនពីបណ្ដារាជធានី ខេត្តដទៃទៀតផងដែរ។ លោកឧកញ៉ាបញ្ជាក់ថា វិស័យអចលនទ្រព្យនៅកម្ពុជា នាពេលបច្ចុប្បន្ននេះ គឺនៅតែមានសញ្ញាមួយល្អប្រសើរណាស់ ពីព្រោះកម្ពុជា មិនមានជួបគ្រោះធម្មជាតិធ្ងន់ធ្ងរដូចនៅបណ្ដាប្រទេសរីកចម្រើននោះ ដូចជារញ្ជួយដី ផ្ទុះភ្នំភ្លើង ស៊ុយណាមិឡើយ ដូច្នេះហើយវិនិយោគិនមកពីគ្រប់ទិសទី នឹងមកកម្ពុជា ស្វែងរកការអភិ វឌ្ឍន៍លើវិស័យអចលនទ្រព្យបន្ថែមទៀត ។
លោកពេជ្រ សុខបញ្ញា ប្រធានយុទ្ធសាស្ត្រជាន់ខ្ពស់នៃក្រុមហ៊ុនអចលនទ្រព្យស៊ីភីអិល បានមានប្រសាសន៍ថា នៅថ្ងៃអនាគត វិស័យអចលនទ្រព្យនឹងក្លាយជាវិស័យនាំមុខគេក្នុងការចូលរួមកំណើនសេដ្ឋកិច្ចជាតិ ហើយនឹងជំរុញសេដ្ឋកិច្ចកម្ពុជាកាន់តែមានសន្ទុះ។ មានហេតុផលមួយចំនួនដែលវិនិយោគិនបរទេសត្រូវមកបណ្ដាក់ទុនវិនិយោគនៅកម្ពុជា ដូចជាកម្ពុជា ជាចំណុចកណ្ដាលនៃអាស៊ាន ដែលបរទេស ចាប់អារម្មណ៍និងចង់វិនិយោគ ព្រោះវាងាយស្រួលក្នុងការតភ្ជាប់ទៅបណ្ដាប្រទេសក្នុងតំបន់អាស៊ាន ។
លោកបានបន្តថា «ទៅថ្ងៃអនាគតមានគម្រោងធំៗជាច្រើន ដែលកម្ពុជាសហការជាមួយបណ្ដាប្រទេសដើម្បីអភិវឌ្ឍន៍ ដូចជាគម្រោងផ្លូវរថយន្តឆ្លងកាត់ប្រទេសអាស៊ានជាដើម ។ ក្រៅពីនោះ កម្ពុជាក៏នឹងទទួលបានផលប្រយោជន៍ ជាច្រើនទៀតផងដែរពីខ្សែក្រវ៉ាត់មួយ ផ្លូវមួយរបស់ចិនផងដែរ ដែលនឹងធ្វើអោយកំណើនវិនិយោគិនក្នុងតំបន់នោះ កាន់តែបេតីលើទឹកដីប្រទេសកម្ពុជា» ។ លោកបន្តថា មូលហេតុដែលវិនិយោគិនចង់មកបណ្ដាក់ទុនវិនិយោគ នៅកម្ពុជា ដោយសារតែ គាត់មើលឱកាសចំណេញច្រើន ជាពិសេសក្នុងវិស័យអចលនទ្រព្យតែម្ដង ជាក់ស្ដែងបើប្រៀបធៀបនឹងប្រទេសជិតខាង តម្លៃអលចនទ្រព្យនៅក្នុងប្រទេសកម្ពុជា នៅមានកម្រិតទាបជាប្រទេសជិតខាងដូចជាវៀតណាម ថៃ សឹង្ហបុរីជាដើម ដូច្នេះគេអាចមានឱកាសចំណេញច្រើនពីការវិនិយោគវិស័យនេះ ។
គួរបញ្ជាក់ថា ក្នុងរយៈពេល៤ខែ ដើមឆ្នាំ ២០១៩ កម្ពុជាទទួលបានទុនវិនិយោគសរុបក្នុងវិស័យសំណង់មានប្រមាណ ២.៧៤២លានដុល្លារអាមេរិកមានកំណើ៦៧ភាគរយ បើធៀបនឹងរយៈពេលដូចគ្នាកាលពីឆ្នាំ ២០១៨ ។ ក្នុងនោះដែរ វិនិយោគិនដែលបាននិងកំពុងបោះទុនវិនិយោគ ក្នុងគម្រោងអចលនទ្រព្យនានាក្នុងប្រទេសកម្ពុជា ភាគច្រើនគឺកាន់កាប់ដោយវិនិយោគិនចិន ជាក់ស្ដែងនៅខេត្តព្រះសីហនុ និងរាជធានីភ្នំពេញ ៕ កែសម្រួលដោយ ៖ សុឃាក់
ចែករំលែកព័តមាននេះ