រាជធានីភ្នំពេញ ៖ បើតាមស្ត្រីឈ្មោះ វង្ស សុខន ជាអ្នកទទួលគ្រឿងញៀនពីមេខ្លោងធំម្នាក់នៅខេត្តស្ទឹងត្រែង ហើយដឹកយកមកលក់ឱ្យឈ្មោះ សៅ សំណាង ជាមេខ្លោងនៅរាជធានីភ្នំពេញ ដែលភាគច្រើនណាត់ ប្រគល់ ឬទិញ-លក់នៅតាមចំណតរថយន្តមុខមន្ទីរពេទ្យកាល់ម៉ែត ក្នុងទឹកដីខណ្ឌដូនពេញ ។
ក្រោយតាមការណែនាំរបស់នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងនាយឧត្តមសេនីយ៍ ម៉ក់ ជីតូ អគ្គស្នងការរងទទួលការងារប្រយុទ្ធប្រឆាំងគ្រឿងញៀន នៅអំឡុងចុងខែឧសភា និងដើមខែមិថុនានេះ កម្លាំងនគរបាលនៃមន្ទីរប្រឆាំងគ្រឿងញៀន ក្រសួងមហាផ្ទៃ បានបើកប្រតិបត្តិការបង្ក្រាបនិងកាត់ផ្តាច់បណ្តាញសកម្មភាពពាក់ព័ន្ធនឹងករណីជួញដូរគ្រឿងញៀនឆ្លងដែន និងឈានដល់ឃាត់ខ្លួនជនសង្ស័យចំនួន៧នាក់ ក្នុងនោះប្រុស៣នាក់ និងចាប់យកវត្ថុតាងថ្នាំញៀនជាង១០គីឡូក្រាម ។ មនុស្ស៣នាក់ថ្មីទៀត ដែលជាខ្សែបណ្តាញក្រុមជួញដូរគ្រឿងញៀន បានត្រូវសមត្ថកិច្ចឃាត់ខ្លួន កាលពីវេលាម៉ោងប្រមាណ៦និង៤០នាទីរសៀលថ្ងៃទី៤ ខែមិថុនា នៅខាងមុខការិយាល័យប្រៃសណីយ៍ ក្នុងសង្កាត់វត្តភ្នំ ខណ្ឌដូនពេញ ដោយសមត្ថកិច្ចដកហូតបានថ្នាំញៀនប្រភេទមេតំហ្វេតាមីន(ICE) ឬម៉ាទឹក
កកទម្ងន់ជាង២គីឡូក្រាម ។
ការចាប់ឃាត់ខ្លួនក្រុមជួញដូរគ្រឿងញៀន៣នាក់នេះ សមត្ថកិច្ចអះអាងថា ពួកគេសុទ្ធតែជាបណ្តាញឲ្យមេខ្លោងធំម្នាក់ដែលនាំចេញពីប្រទេសឡាវ ចូលមកលក់និងចែកចាយក្នុងប្រទេសកម្ពុជា ។ ជនទាំង៣នាក់នេះមាន ១-ឈ្មោះ វង្ស សុខន ភេទស្រី អាយុ៥០ឆ្នាំ ២-ឈ្មោះ សៅ សំណាង ភេទប្រុស អាយុ៣២ឆ្នាំ និង៣-ឈ្មោះ សោម សារ៉ាវ័ន្ត ភេទប្រុស អាយុ៣៥ឆ្នាំ ។
ជនសង្ស័យបានសារភាពប្រាប់សមត្ថកិច្ចថា ក្រុមខ្លួន ឬហៅថាបណ្តាញរបស់ពួកគេ បាននាំគ្រឿងញៀនមកលក់ក្នុង១លើកៗ មិនក្រោម២គីឡក្រាមទៅ១០គីឡូក្រាមទេ ។ គ្រឿងញៀនទាំងអស់នោះត្រូវបានឈ្មោះ សៅ សំណាង យកទៅបែងចែកលក់ទៅឲ្យបណ្តាញរបស់ពួកគេទៀត ដូចជានៅម្តុំផ្លូវរថភ្លើង ម្តុំរោងចក្រឆ្នាំង ម្តុំត្រឡោកបែក ម្តុំទំនប់ទួលគោក ទំនប់កប់ស្រូវ ផ្លូវ៦០ម៉ែត្រ ម្តុំបឹងត្របែក និងជាច្រើនទីតាំងទៀតមានតាម ក្លិប ខារ៉ាអូខេ និងផ្ទះសំណាក់ក្នុងរាជធានីភ្នំពេញ ។ ក្នុងនោះដែរ ឈ្មោះ សៅ សំណាង និងបក្សពួកឈ្មោះ សោម សារ៉ាវ័ន្ត បានលក់និងចែកចាយបន្តទៅតាមបណ្តាខេត្ត មានដូចជាខេត្តកំពង់ស្ពឺ ខេត្តតាកែវ ខេត្តកណ្តាល តាមរយៈបណ្តាញតូចៗរបស់ខ្លួន ។
លោកឧត្តមសេនីយ៍ឯក ឡឹក វណ្ណៈ នាយកមន្ទីរប្រឆាំងគ្រឿងញៀន បានថ្លែងថា យើងពិតជាបានកាត់ផ្តាច់បណ្តាញជួញដូរគ្រឿងញៀនមួយក្រុមនេះមែន ដោយបានឃាត់ខ្លួនមេខ្លោង និងសមាជិកចែកចាយចំនួន៧នាក់ ដកហូតថ្នាំញៀនបានជាង១០គីឡូក្រាម និងបានបញ្ជូនទៅតុលាការរួចហើយ ។
ជាក់ស្តែង ដូចជាការចាប់ខ្លួនជនសង្ស័យ៣នាក់ខាងលើ និងក្រៅពីនេះ មានឈ្មោះ ផន ពិសី ជាប្រពន្ធរបស់ឈ្មោះ សៅ សំណាង ក៏ត្រូវបានចាប់ខ្លួននិងដកហូតថ្នាំញៀនបានជាង១គីឡូក្រាម កាលពីថ្ងៃទី១៣ ខែកក្កដា ឆ្នាំ២០១៨កន្លងមក ។ ចំណែកស្ត្រីខ្មែរអ៊ិស្លាម២នាក់បងប្អូនឈ្មោះ ហ៊ីម ពៅ និងឈ្មោះ ហ៊ីម ជុ ត្រូវបានចាប់ខ្លួនកាលពីថ្ងៃទី២៦ ខែឧសភា ឆ្នាំ២០១៩ នៅសង្កាត់ទួលសង្កែ ខណ្ឌឫស្សីកែវ ដកហូតថ្នាំញៀនជាង៧គីឡូក្រាម ក៏ជាបណ្តាញរបស់ពួកគេដែរ ៕ (សម្រួលដោយ៖ ស្រីណា)
ចែករំលែកព័តមាននេះ