រាជធានីភ្នំពេញ ៖ តាមរយៈវេទិការសាធារណៈនៅតាមស្រុកភូមិឃុំសង្កាត់ទាំងអស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានប្រកាសឲ្យមន្ត្រីថ្នាក់ជាតិចុះមូលដ្ឋានទទួលយកមតិរិះគន់គ្រប់មជ្ឈដ្ឋានជាជាងយកមតិលើកជើង ។ សម្តេច ស ខេងបានលើកឡើងនៅថ្ងៃទី១២ ខែមិថុនាយ៉ាងដូច្នេះថា ៖«យើងត្រូវពង្រឹងសមត្ថភាពមន្ត្រីយើងដែលទៅស្តាប់នៅក្នុងវេទិការសាធារណៈជាមួយប្រជាពលរដ្ឋយកបញ្ហាដែលគាត់លើកឡើងមកដោះស្រាយ ហើយទីបំផុតយើងរក្សាបានស្ថេរភាព ។
ព្រោះយើងសុខចិត្តស្តាប់មតិជំទាស់ជាជាងមតិបញ្ជោរយើង ។ ខ្ញុំគិតថា អីញ្ចឹង! យើងស្តាប់មតិជំទាស់បានច្រើនជួយយើងបានច្រើនណាស់ ឯការស្តាប់មតិបញ្ជោរយើង បានគ្រាន់តែបញ្ជោរយើងប៉ុណ្ណោះ ហើយគ្មានអីទេ ។ មិនស្រួលដើរខុសទៀត» ។ សម្តេចបានបន្ថែមថាយើងត្រូវបើកវេទិការសាធារណៈធ្វើយ៉ាងណាឲ្យមានភាពសាមញ្ញ ហើយឲ្យប្រជាពលរដ្ឋមានមតិចូលរួម ដោយឲ្យគាត់និយាយឲ្យអស់ ។ ករណីនេះក៏បានជាការពង្រឹងសមត្ថភាពនៃការយល់ដឹងរបស់យើងផងដែរ ។
សម្តេចថា៖ «នេះជាសាលារៀនមួយ ហើយយើងនឹងដោះស្រាយបញ្ហាជាក់ស្តែង ។ យើងត្រូវធ្វើវេទិការឲ្យគ្រប់ភូមិ ឃុំ សង្កាត់ ទាំងសង្កាត់តូចធំក្តី» ។ សម្តេច ស ខេង ក៏បានស្នើឲ្យមន្ត្រីថ្នាក់ជាតិដែលចុះជួយមូលដ្ឋានត្រូវបង្កើតវេទិការ ឬចូលរួមវេទិការ ដើម្បីស្តាប់ពីផលពិបាករបស់ប្រជាពលរដ្ឋ ដើម្បីដោះស្រាយជូនពួកគាត់ផងដែរ ។ សម្តេចថា ត្រូវចុះស្តាប់ពីមតិរបស់ប្រជាពលរដ្ឋពីបញ្ហាគ្រឿងញៀនយ៉ាងម៉េចចោរលួច ចោរប្លន់យ៉ាងម៉េច ល្បែងស៊ីសង ចរាចរណ៍ បរិស្ថាន និងបញ្ហាភ្លើងទឹកយ៉ាងម៉េច សុខភាព…? ។
សម្តេចក៏បានស្តីឲ្យមន្ត្រីមួយចំនួនថា កុំបានតែមកស្តាប់គោលការណ៍ពីថ្នាក់ដឹកនាំ ហើយយកទៅបាត់ ដោយមិនបានចុះអនុវត្តជាក់ស្តែងនោះទេ ។ ករណីនេះនៅតែកើតមានបញ្ហានៅក្នុងមូលដ្ឋានដដែល ៕ កែសម្រួលដោយ ៖ សុឃាក់
ចែករំលែកព័តមាននេះ