ខេត្តព្រះសីហនុ ៖ ដើម្បីកាត់បន្ថយគ្រោះថ្នាក់បើកបរបុកក្បាលនាគពុះទ្រូងផ្លូវជាតិលេខ៤ ត្រង់ចំណុចប្រជុំជនវាលរេញ នៅព្រឹកថ្ងៃទី១២ មិថុនា ឆ្នាំ២០១៩នេះ អាជ្ញាធរបានបំពាក់បន្ថែមអំពូលភ្លើងសូឡាមួយពីលើភ្លើងលឿងដែលមានស្រាប់ នៅត្រង់របាំងក្បាលនាគ ដើម្បីជួយបំភ្លឺបន្ថែម សម្រាប់អ្នកបើកបរនៅពេលយប់ និងជាការកាត់បន្ថយគ្រោះថ្នាក់ចរាចរណ៏ដែលមានរថយន្តមួយចំនួនបើកបុករបាំងក្បាលនាគពុះទ្រូងផ្លូវជាតិលេខ៤នេះជាបន្តបន្ទាប់កាលពីកន្លងមក។
ការដាក់ភ្លើងបំភ្លឺបន្ថែមនេះ គឺឆ្លើយតបទៅនឹងសំណូមរបស់មហាជនដែលថា កន្លែងនេះងងឹតទើបនាំអោយមានរថយន្តបើកបុក។ ជាមួយគ្នានេះ មន្ត្រីចរាចរណ៍បានអំពាវនាវដល់អ្នកបើកបរឱ្យបន្ថយល្បឿនតាមច្បាប់កំណត់ ពេលបើកបរក្នុងទីប្រជុំជនវាលរេញ និងសង្ឃឹមថា បញ្ហាបុករបាំងក្បាលនាគនៅទីនេះនឹងលែងកើតមានជាបន្តទៀត ៕ (កែសម្រួលដោយ ៖ ធីតា)
ចែករំលែកព័តមាននេះ