ខេត្តស្វាយរៀង ៖ គួរអោយអាណិតអាសូរជាពន់ពេក ពេលឃើញទាំងលោកតា និងលោកយាយ ដែលមានវ័យ៨៣ឆ្នាំទៅហើយ រស់នៅក្រលំបាកតោកយ៉ាកក្នុងផ្ទះខ្ទមតូច ជញ្ជាំងបាំងស្លឹកត្នោត និងដំបូលប្រក់ស័ង្កសី រនាបឫស្សី…
ខេត្តស្វាយរៀង ៖ គួរអោយអាណិតអាសូរជាពន់ពេក ពេលឃើញទាំងលោកតា និងលោកយាយ ដែលមានវ័យ៨៣ឆ្នាំទៅហើយ រស់នៅក្រលំបាកតោកយ៉ាកក្នុងផ្ទះខ្ទមតូច ជញ្ជាំងបាំងស្លឹកត្នោត និងដំបូលប្រក់ស័ង្កសី រនាបឫស្សី ។
ម្យ៉ាងពួកគាត់ទាំង២នាក់ចាស់ជរាធ្វើការងារអ្វីក៏មិនកើត ហើយគ្មានកូនចៅនៅជាមួយមើលថែឬរៀបចំបាយទឹកនំចំណីឲ្យនោះទេ គឺរស់នៅដោយអ្នកជិតខាងហុចបាយសម្លបន្តិចបន្តួចគ្រាន់បានហូបមួយថ្ងៃរស់មួយថ្ងៃ ជួនកាលក៏មានកូនស្រីម្នាក់រស់នៅក្នុងភូមិនោះដែរបានយកបាយម្ហូបឲ្យពិសារ ជួនកាលក៏អត់មានអីពិសា គឺគួរអាណិតអាសូរដល់ពួកគាត់ខ្លាំងណាស់ខ្វះម្ហូបអាហារពិសារ ពេលចាស់ជរាហើយថែមទាំងចៅយកឪពុកដែលមានជម្ងឺដេកដួលនឹងកន្ទេលម្នាក់ទៀតឲ្យពួកគាត់មើលថែ តែគ្មានផ្តល់អាហារ ឬថ្នាំសង្កូវព្យាបាលទៀត តើពិបាកយ៉ាងណា។
លោកយាយឈ្មោះសឹង យ៉ា អាយុ៨៣ឆ្នាំ បានឲ្យដឹងថា ប្តីរបស់គាត់មានអាយុ៨៣ដូចគ្នា ពួកគាត់ទាំង២នាក់រស់នៅក្នុងភូមិ រាមជោ ឃុំស្វាយតាយាន ស្រុកកំពង់រោទិ៍ខេត្តស្វាយរៀង។
លោកយាយបាននិយាយរៀបរាប់ទាំងទឹកភ្នែកប្រាប់ឱ្យដឹងថា គាត់មានកូន៤នាក់ ក្នុងនោះស្រីម្នាក់មានទីលំនៅជិតផ្ទះលោកយាយ ហើយកូនប្រុសរបស់គាត់ដែលដេកឈឺនឹងកន្ទេលនោះមានឈ្មោះ កឹម ព្រុន អាយុ៥៥ឆ្នាំ មានប្រពន្ធនិងកូន៦នាក់ ហើយកូនប្រុសរបស់ពួកគាត់នេះមានជំងឺលើសឈាមស្លាប់មួយចំហៀងខ្លួនអស់រយៈពេលជាង៣ឆ្នាំមកហើយ។
ចាប់តាំងពីកូនប្រុសរបស់គាត់ធ្លាក់ខ្លួនឈឺមក ប្រពន្ធនិងកូនៗបានយកមកដាក់ចោលអោយនៅជាមួយពួកគាត់ដែលជាមនុស្សចាស់ជរាមើលថែទៅវិញ ហើយមិនបានផ្តល់អង្ករ ឬម្ហូបអាហារប្រចាំថ្ងៃនោះទេ។ រាល់ថ្ងៃពួកគាត់រស់ដោយសារមានអ្នកជិតខាង ហើយនិងកូនស្រីបានហុចបាយសម្លអោយពួកគាត់ហូបប៉ុណ្ណោះ។
លោកយាយបានអោយដឹងទៀតថា ចំពោះកូនចៅទាំងអស់ មិនសូវគិតគូរដល់ពួកគាត់នោះទេ រាប់ឆ្នាំមកហើយ សឹងតែមិនមកអើតមើលពួកគាត់ឡើយ ទំនងពួកគេប្រហែលបំភ្លេច ហើយគិតថាគ្មានម៉ែឪនៅរស់ទេមើលទៅ។
លោកយាយ សឹង យ៉ា បានអំពាវនាវសុំអោយសប្បុរសជនមេត្តាជួយដល់ពួកគាត់ទាំង៣នាក់ដែលកំពុងជួបទុក្ខវេទនា ណាមួយពួកគាត់ចាស់ជរាធ្វើអ្វីក៏មិនកើតថែមទាំងត្រូវមើលថែកូនប្រុសមានជំងឺដេកដួលនៅលើកន្ទេលទៀត ។ សូមសប្បុរសជនមេត្តាជួយផ្តល់ម្ហូបអាហារ អង្ករ ឬគ្រឿងបរិភោគនិងឧបភោគនិងថវិកាជូនដល់លោកតានិងយាយបានផ្គត់ផ្គង់ជីវភាពនូវជីវិតចុងក្រោយនេះផង៕ (កែសម្រួលដោយ ៖ ធីតា)
ចែករំលែកព័តមាននេះ