រាជធានីភ្នំពេញ ៖ ខណៈសហគ្រាសធុនតូច និងមធ្យម ឬហៅកាត់ថា (SME) ជាចលករដ៏សំខាន់ក្នុងចំណែកសេដ្ឋកិច្ចកម្ពុជា ស្ថាប័នពាក់ព័ន្ធមួយចំនួន ដូចជាធនាគារពិភពលោក និងធនាគារក្នុងស្រុកជាច្រើនផងដែរ បានបន្តគាំទ្រ និងជ្រោមជ្រែងវិស័យ SME អោយកាន់តែច្រើន ដើម្បីជំរុញអោយវិស័យនេះបានចូលរួមចំណែកបន្តទៀត ដល់ការជួយផ្ដល់ការងារដល់ពលរដ្ឋក្នុងស្រុក និងកំណើនសេដ្ឋកិច្ច។
ប្រាកដណាស់ ដើម្បីគាំទ្រដល់អាជីវកម្មធុនតូចនៅកម្ពុជា សាជីវកម្មហិរញ្ញវត្ថុអន្តរជាតិ (International Finance Corporation-IFC) ដែលជាផ្នែកមួយនៃធនាគារពិភពលោកនោះ បានសម្រេចសហការជាមួយជាមួយធនាគារក្នុងស្រុក ដើម្បីផ្ដល់កម្ចី ឥណទានដល់សហគ្រាសធុនតូច ដើម្បីអោយសហគ្រាសនេះ មានទុនក្នុងការពង្រីកអាជីវកម្មបន្ថែមទៀត ។
បើតាមលោកស្រី អេង លីគង់ ប្រធានសមាគមសហគ្រិនស្ត្រីកម្ពុជា បានមានប្រសាសន៍ថា លោកស្រីរំពឹងថា សហគ្រិនក្នុងវិស័យ SME ជាពិសេសសហគ្រិនស្ត្រផ្ទាល់ នឹងអាចមានច្រកបន្ថែម ក្នុងការទទួលបាននូវទុនសម្រាប់ពង្រីកអាជីវកម្មបន្ថែម ខណៈកន្លងមកការស្វែងរកប្រភពទុនដើម្បីពង្រីកអាជីវកម្មជាបញ្ហាចំបងមួយរបស់សហគ្រិនក្នុងស្រុក ។ លោកស្រីបានបន្តថា « នៅពេលដែលយើងមានទុនបន្ថែមសម្រាប់ពង្រីកអាជីវកម្មនោះ យើងក៏រំពឹងថា វិស័យSME នឹងមានការរីកចម្រើនបានមួយកម្រិតទៀត ហើយវានឹងចូលរួមចំណែកកាន់តែធំ ជាមួយរដ្ឋាភិបាលក្នុងការជំរុញ កំណើនសេដ្ឋកិច្ច តាមរយៈការផ្ដល់ការងារដល់ពលរដ្ឋផ្ដល់ប្រាក់ចំណូលសម្រាប់ផ្គង់ផ្គត់គ្រួសាររបស់ពួកគេជាដើម » ។
យោងតាមសេចក្តីប្រកាសព័ត៌មានរបស់ IFC បានអោយដឹងថា កន្លងមកសហគ្រាសធុនតូច នៅកម្ពុជាពុំទាន់បានទទួលហិរញ្ញប្បទានគ្រប់គ្រាន់ឡើងសម្រាប់ពង្រីកអាជីវកម្ម ដែលជាហេតុធ្វើអោយប៉ះពាល់ដល់ការសម្រេចចិត្តក្នុងការផ្ដល់កម្ចីប្រកបដោយការទទួលខុស ។ នេះជាឧបសគ្គ សម្រាប់សហគ្រាស ក្នុងការពង្រីកអាជីវកម្មបន្ថែមទៀត ។
លោក Vivek Pathak នាយកប្រចាំតំបន់អាស៊ីបូព៌ានិងប៉ាស៊ីហ្វិករបស់សាជីវកម្មហិរញ្ញវត្ថុអន្តរជាតិ បានមានប្រសាសន៍ផងដែរថា សហគ្រាសធុនតូច និងមធ្យម បានជួយជំរុញកំណើនសេដ្ឋកិច្ចនិងបង្កើតការងារក្នុងបណ្ដាប្រទេសដែលមានចំណូលទាប ប៉ុន្តែសហគ្រាសទាំងនេះ ជួបការលំបាកក្នុងការទទួលបានកម្ចី ព្រោះតែសហគ្រាសទាំងនេះមានទំហំតូច បទពិសោធន៍តិចតួច និងកត្តារួមផ្សំផ្សេងៗទៀត ។
លោក Shin Chang Moo អគ្គនាយកធនាគារភ្នំពេញពាណិជ្ជ ជាធនាគារក្នុងស្រុកមួយយល់ព្រមសហការជាមួយសាជីវកម្មហិរញ្ញវត្ថុអន្តរជាតិ ICF បានមានប្រសាសន៍ថា សហគ្រាសធុនតូចនៅកម្ពុជា នាពេលបច្ចុប្បន្នកំពុងមានសក្ដានុពល និងជាវិស័យដែលបានចូលរួមចំណែកដល់កំណើនសេដ្ឋកិច្ចកម្ពុជា ។ លោកថា៖« ធនាគារភ្នំពេញពាណិជ្ជ ប្ដេជ្ញាផ្ដល់ឱ្យសហគ្រាសទាំងនេះ នូវដំណោះស្រាយហិរញ្ញវត្ថុ និងកម្ចីសមស្របបំផុត ដើម្បីផ្ដល់លទ្ធភាពឱ្យពួកគេអាចពង្រីកអាជីវកម្មខ្លួន បង្កើតការងារនិងមានឱកាសចូលរួមកសាងសេដ្ឋកិច្ចកម្ពុជាផងដែរ » ៕ កែសម្រួលដោយ ៖សុឃាក់
ចែករំលែកព័តមាននេះ