ប្រទេសអុីរ៉ង់ ៖ អុីរ៉ង់កាលពីថ្ងៃទី១០ មិថុនា បានព្រមានពីបណ្ដាផលវិបាកដែលអាចកើតមានពីសង្គ្រាមសេដ្ឋកិច្ចរបស់អាមេរិកប្រឆាំងខ្លួន ខណៈរដ្ឋមន្ត្រីការបរទេសអុីរ៉ង់ លោកMOHAMMAD JAVAD ZARIFជួបពិភាក្សាជាមួយសមភាគីអាល្លឺម៉ង់លោកHEIKO MAAS នៅក្រុងតេហេរ៉ង់។
លោកMOHAMMAD JAVAD ZARIFថ្លែងថា គេមិនអាចរង់ចាំសង្គ្រាមសេដ្ឋកិច្ចមួយ ប្រឆាំងប្រជាជនអុីរ៉ង់នៅបន្តទៀតឡើយ និងថាពួកអ្នកដែលគាំទ្រឬបង្កសង្គ្រាមនោះនឹងពុំអាចរស់ក្នុងសុខសន្តិសុខឡើយ។ ភាពតានតឹងថ្មីៗក្នុងតំបន់ ជាលទ្ធផលនៃសង្គ្រាមសេដ្ឋកិច្ចប្រឆាំងអុីរ៉ង់។ លោកចង់និយាយយោងដល់យុទ្ធនាការគាបសង្កត់ខ្លាំងបំផុតរបស់សហរដ្ឋអាមេរិក ប្រឆាំងក្រុងតេហេរ៉ង់ ពិសេសតាមរយៈអាវុធទណ្ឌកម្មសេដ្ឋកិច្ច ដែលក្រុងវ៉ាស៊ិនតោនដាក់ជាថ្មីឬបង្កើនថែមទៀតចាប់ពីឆ្នាំ២០១៨មក។
ក្នុងសន្និសីទសារព័ត៌មានរួមមួយជាមួយលោកMAAS លោកZARIFបន្តថា មធ្យោបាយតែមួយសម្រាប់កាត់បន្ថយភាពតានតឹង គឺបញ្ចប់សង្គ្រាមសេដ្ឋកិច្ចនោះ។ អាល្លឺម៉ង់និងសហភាពអឺរ៉ុបអាចដើរតួនាទីសំខាន់ ដើម្បីកាត់បន្ថយភាពតានតឹងទាំងនេះ ហើយយើងគាំទ្រដល់តួនាទីនោះ។ លោកMAASអះអាងថា មានសង្គ្រាមរួចហើយនៅសីុរីនិងយេម៉ែន។ យើងចង់រារាំងវាតាមគ្រប់មធ្យោបាយ។
តំបន់ឈូងសមុទ្រពែរ្ស៍ឆ្លងកាត់ចាប់តាំងពីជិត១ខែមកហើយ នូវដំណាក់កាលមានគ្រោះថ្នាក់ខ្លាំងបំផុតមួយ ខណៈភាពតានតឹងបានកើនឡើង រវាងអុីរ៉ង់និងសហរដ្ឋអាមេរិកព្រមទាំងបណ្ដាសម្ព័ន្ធមិត្តមហាអំណាចនោះក្នុងឧបទ្វីបអារ៉ាប់។ ភាពតានតឹងទាំងនេះទាក់ទិននឹងការខ្វះទំនុកចិត្តគ្នាខ្លាំង រវាងក្រុងវ៉ាស៊ិនតោន និងក្រុងតេហេរ៉ង់ បន្ទាប់ពីលោកដូណាល់ត្រាំសម្រេចជាឯកតោភាគី កាលពីខែឧសភាឆ្នាំ២០១៨ដើរចេញពីកិច្ចព្រមព្រៀងនុយក្លេអ៊ែរអុីរ៉ង់។ បន្ទាប់មកអាមេរិកបានបញ្ជូនទ័ពទៅមជ្ឈឹមបូព៌ា ប្រឈមនឹងអ្វីដែលខ្លួនហៅថាការគំរាមកំហែងរបស់អុីរ៉ង់៕ (កែសម្រួលដោយ ៖ បុប្ផា)
ចែករំលែកព័តមាននេះ