រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រីក្រសួងមហាផ្ទៃបានស្នើដល់ម្ចាស់ក្រុមហ៊ុនទាំងដឹកអ្នកដំណើរ និងដឹកទំនិញទាំងត្រូវពិនិត្យអ្នកបើកបរមុននឹងទទួលយកធ្វើបុគ្គលិក ។ សម្តេចស ខេង…
រាជធានីភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រីក្រសួងមហាផ្ទៃបានស្នើដល់ម្ចាស់ក្រុមហ៊ុនទាំងដឹកអ្នកដំណើរ និងដឹកទំនិញទាំងត្រូវពិនិត្យអ្នកបើកបរមុននឹងទទួលយកធ្វើបុគ្គលិក ។ សម្តេចស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកបានលើកឡើងក្នុងទិវាសប្ដាហ៍ជាតិសុវត្ថិភាពចរាចរណ៍លើកទី១២ ប្រារព្ធនៅស្រុកពញាក្រែក ខេត្តត្បូងឃ្មុំ ថារឿងគ្រឿងញៀនជារឿងសំខាន់ចំពោះអ្នកបើកបរព្រោះថា គ្រឿងញៀនបានបំផ្លាញស្មារតីអ្នកបើកបរនៅពេលប្រើប្រាស់វា ។
សម្តេចបញ្ជាក់ថា ៖«បញ្ហាគ្រឿងញៀនជារឿងសំខាន់ និងរឿងមួយទៀត ។ ទន្ទឹមនឹងនេះខ្ញុំក៏យកឱកាស និងអំពាវនាវដល់ដល់ក្រុមហ៊ុនដឹកជញ្ជូនទាំងអស់ទាំងក្រុមហ៊ុនដឹកជញ្ជូន មនុស្ស និងក្រុមហ៊ុនដឹកជញ្ជូនទំនិញ សូមមេត្តាត្រួតពិនិត្យអ្នកបើកបរមុននឹងយកចូលបម្រើការក្នុងក្រុមហ៊ុន» ។ សម្តេចបន្តថា ៖ «មុនការសម្រេចជ្រើសរើសត្រូវពិនិត្យឈាមសិន តើមានសារធាតុញៀន ឬក៏អត់ ? បើមានសារធាតុញៀន គឺសុំមេត្តាកុំយកចូលជាអ្នកបើកបរពីព្រោះគ្រឿងញៀន កាលណាសេពគប់វាទៅវាបំផ្លាញប្រព័ន្ធសរសៃប្រសាទរបស់យើង អីញ្ចឹងវាមិនអាចបញ្ជាឡានឲ្យត្រង់ផ្លូវតាមច្បាប់បានទេ ។ អីញ្ចឹងសូមអំពាវនាវឲ្យម្ចាស់ក្រុមហ៊ុនទាំងអស់មេត្តាយកចិត្តទុកដាក់ និងអនុវត្តបញ្ហានេះឲ្យបានផង» ។
សម្តេចបានលើកឡើងថា ការស្នើសុំនេះ គឺដើម្បីសុវត្ថិភាពសង្គមយើងទាំងអស់គ្នា ដោយជៀងវាងកុំគិតតែផលប្រយោជន៍តែក្រុមហ៊ុនតែមួយនោះទេ ។ យើងត្រូវគិតពីសុវត្ថិភាព និងពីជីវិតអ្នកដទៃ និងជីវិតរបស់ប្រជាពលរដ្ឋដែលធ្វើដំណើរតាមដងផ្លូវផងដែរ ៕ កែសម្រួលដោយ ៖ សុឃាក់
ចែករំលែកព័តមាននេះ