រាជធានីភ្នំពេញ៖ ក្រសួងឧស្សាហកម្ម និងសិប្បកម្ម និងតំណាងពាណិជ្ជកម្មសហរដ្ឋអាមេរិក (USTR) ថ្មីៗនេះបានយល់ព្រមគ្នាក្នុងការពន្លឿននូវការងារមួយចំនួនដើម្បីធ្វើយ៉ាងណាធ្វើឲ្យសម្រេចនូវកិច្ចព្រមព្រៀងបច្ចេកទេស និងនីតិវិធីផ្សេងៗឲ្យមានភាពរលូន សំដៅឲ្យការធ្វើពាណិជ្ជកម្មយានយន្តរបស់សហរដ្ឋអាមេរិកសម្រាប់អ្នកប្រើប្រាស់នៅកម្ពុជាធានាបាននូវកំរិតស្តង់ដារ និងសុវត្ថិភាពលើដងផ្លូវ ។
គណៈប្រតិភូមួយក្រុមនៃតំណាងពាណិជ្ជកម្មសហរដ្ឋអាមេរិក (USTR) និងក្រសួងការបរទេសសហរដ្ឋអាមេរិកបានធ្វើទស្សនកិច្ចនៅប្រទេសកម្ពុជា ចាប់ថ្ងៃទី ៣ ដល់ថ្ងៃទី ៧
ខែមិថុនានេះ ដើម្បីពិភាក្សាពីបញ្ហាពាណិជ្ជកម្មទ្វេភាគី ដោយរាប់ទាំងបទដ្ឋានបច្ចេកទេសយានយន្ត ក៏ដូចជាស្ថានភាពវិស័យការងារនៅប្រទេសកម្ពុជាផងដែរ។ គណៈប្រតិភូ ដឹកនាំដោយ Karl Ehlers ឧបការី តំណាងពាណិជ្ជកម្មសហរដ្ឋអាមេរិក ទទួលបន្ទុកការិយាល័យប្រចាំតំបន់អាស៊ីអគ្នេយ៍ និងប៉ាស៊ីហ្វិក និងលោក Lewis Karesh ឧបការីតំណាងពាណិជ្ជកម្មសហរដ្ឋអាមេរិកទទួលបន្ទុកកិច្ចការការងារ ។
ជាមួយគ្នានោះផងដែរក៏មានជំនួបពិភាក្សាការងាររវាងលោក ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយលោក Karl Ehlers និងក្រុមការងាររបស់លោក កាលពីថ្ងទី ៥ មិថុនា ដែលក្នុងជំនួបនោះ ភាគីទាំងពីរបានផ្តោតជាសំខាន់លើការងារលម្អិតបន្ថែម ក៏ដូចជាការងារសេសសល់មួយចំនួន បន្ទាប់ពីភាគីទាំងពីរបានពិភាក្សាព្រមព្រៀងលើចំណុចរួមគ្នាជាច្រើនរួចមកហើយនាពេលកន្លងមក ក្រោមក្របខ័ណ្ឌកិច្ចប្រជុំគណៈកម្មាធិការចម្រុះស្តីពីកិច្ចព្រមព្រៀងក្របខ័ណ្ឌ វិនិយោគ និងពាណិជ្ជកម្ម (TIFA)ក៏ដូចជា កិច្ចប្រជុំរវាងវិទ្យាស្ថានស្តង់ដារកម្ពុជា ជាមួយក្រុមការងារបច្ចេកទេស របស់សហរដ្ឋអាមេរិក អំពីស្តង់ដារ និងនីតិវិធីពាក់ព័ន្ធនិងការធ្វើពាណិជ្ជកម្មយានយន្តរបស់សហរដ្ឋអាមេរិកនៅកម្ពុជា ។
លោកទេសរដ្ឋមន្ត្រី ចម ប្រសិទ្ធ បានវាយតម្លៃខ្ពស់ចំពោះវឌ្ឍនភាពការងារ ។ ក្នុងនោះ ជារួមភាគីកម្ពុជាបានឯកភាពទទួលស្គាល់ស្តង់ដារសុវត្ថិភាពយានយន្តសហរដ្ឋអាមេរិក (FMVSS) និង អនុញ្ញាតឲ្យនាំចូលផលិតផលយានយន្តមកកម្ពុជា ដោយមានបញ្ជាក់ពីអាជ្ញាធរសុវត្ថភាព និងចរាចរ ផ្លូវជាតិ សហរដ្ឋអាមេរិក (NHTSA) រឺ តំណាងពាណិជ្ជកម្មសហរដ្ឋអាមេរិក (USTR) ពីភាពអនុលោមស្តង់ដារ FMVSS និងនីតិវិធីនៃការធ្វើតេស្តពាក់ព័ន្ធ ។ ចំពោះកិច្ចការនាពេលខាងមុខ ភាគីទាំងពីរត្រូវជម្រុញការងារបង្កើតក្រុមបច្ចេកទេស ដែលមានសមាសភាពមកពីវិទ្យាស្ថានស្តង់ដារកម្ពុជានៃក្រសួងឧស្សាហកម្ម និងសិប្បកម្ម និងអាជ្ញាធរសុវត្ថភាព និងចរាចរ ផ្លូវជាតិសហរដ្ឋអាមេរិក( NHTSA) រួមជាមួយតំណាង ពាណិជ្ជកម្ម សហរដ្ឋអាមេរិក (USTR) ដើម្បីរៀបចំអនុកិច្ចព្រមព្រៀង រឺកិច្ចព្រមព្រៀងបច្ចេកទេស និងនីតិវិធីផ្សេងៗ ដែល ពាក់ព័ន្ធនិងការត្រួតពិនិត្យ ការទទួលស្គាល់លទ្ធផលធ្វើតេស្ត និងវិញ្ញាបនបត្របញ្ជាក់ បូករួមនិងការចុះ បញ្ជីផងដែរ ។ ក្នុងនោះឯកឧត្តមកិត្តិសេដ្ឋាបណ្ឌិត ក៏បានស្នើឲ្យក្រុមបច្ចេកទេសត្រូវបន្តរៀបចំឯកសារគតិយុត្តិ រឺបទដ្ឋានបច្ចេកទេសនានាឲ្យបានរួចរាល់ជាមុន មុននឹងប្រកាសលេខ ១៥០ MIH/2016 ចូលជាធរមានពេញ លេញនៅថ្ងៃទី០១ ខែមករា ឆ្នាំ២០២០ ខាងមុខ ។
លោក Karl Ehlers បានបង្ហាញនូវជំហរក្នុងការពង្រឹងកិច្ចសហប្រតិបត្តិការ ហើយសន្យាថា «នឹងបញ្ជូនក្រុមការងារ ក៏ដូចជាឯកសារពាក់ព័ន្ធនិងបទដ្ឋានបច្ចេកទេសផ្សេងៗ តាមតម្រូវការរបស់ភាគីកម្ពុជា ដើម្បីជាមូលដ្ឋានឈានទៅសម្រេចកិច្ចព្រមព្រៀងឲ្យមានភាពរលូន សំដៅឲ្យការធ្វើពាណិជ្ជកម្មយានយន្តរបស់សហរដ្ឋអាមេរិកសម្រាប់អ្នកប្រើប្រាស់នៅកម្ពុជា ធានាបាននូវកំរិតស្តង់ដារ និងសុវត្ថិភាពលើដងផ្លូវ» ។
សូមបញ្ជាក់ថាកម្ពុជាគឺជាទីផ្សារនាំចេញទំនិញធំបំផុតទី ១០៤ របស់សហរដ្ឋអាមេរិកនៅឆ្នាំ ២០១៨ ។ ការនាំចេញទំនិញរបស់សហរដ្ឋអាមេរិកទៅកាន់ប្រទេសកម្ពុជានៅក្នុងឆ្នាំ ២០១៨ មានចំនួន ៤៤៧ លានដុល្លារពោលគឺកើនឡើង ១១,៦% (៤៦ លានដុល្លារ) ចាប់ពីឆ្នាំ ២០១៧ និងកើនឡើង ១៨៩,៧% ពីឆ្នាំ ២០១៨ ។ ប្រភេទនៃការនាំចេញលំដាប់លេខ 2 ខ្ទង់នៅឆ្នាំ 2018 រួមមាន៖ រថយន្ត (២៩០ លានដុល្លារ) ចំណីអាហារចំណីសត្វ (២៧ លានដុល្លារ)៕ កែសម្រួលដោយ ៖ សុឃាក់
ចែករំលែកព័តមាននេះ