រាជធានីភ្នំពេញ៖ សហព័ន្ធស្រូវអង្ករកម្ពុជា ហៅកាត់ថា (CRF) បានដាក់ពាក្យប្តឹងជាផ្លូវការទៅកាន់តុលាការអឺរ៉ុបក្នុងករណី «ការដាក់ពន្ធរបស់អឺរ៉ុបលើការនាំចូលអង្ករពីកម្ពុជា» ដែលការសម្រេចដោយសហភាពអឺរ៉ុបយកពន្ធលើអង្ករកម្ពុជា ធ្វើឲ្យអ្នកនាំចេញអង្ករកម្ពុជាត្រូវបង់ពន្ធយ៉ាងច្រើននោះ ។ការពិត កម្ពុជា…
រាជធានីភ្នំពេញ៖ សហព័ន្ធស្រូវអង្ករកម្ពុជា ហៅកាត់ថា (CRF) បានដាក់ពាក្យប្តឹងជាផ្លូវការទៅកាន់តុលាការអឺរ៉ុបក្នុងករណី «ការដាក់ពន្ធរបស់អឺរ៉ុបលើការនាំចូលអង្ករពីកម្ពុជា» ដែលការសម្រេចដោយសហភាពអឺរ៉ុបយកពន្ធលើអង្ករកម្ពុជា ធ្វើឲ្យអ្នកនាំចេញអង្ករកម្ពុជាត្រូវបង់ពន្ធយ៉ាងច្រើននោះ ។ការពិត កម្ពុជា បានដាក់ពាក្យប្ដឹងទៅតុលាការយុត្តិធម៌អឺរ៉ុប រឿងសហភាពអឺរ៉ុបយកពន្ធលើអង្ករកម្ពុជាគឺត្រូវបានធ្វើឡើងក្នុងអំឡុងសប្តាហ៍ទី១ ក្នុងខែមេសា ឆ្នាំ២០១៩ កន្លងទៅនេះ ព្រោះការសម្រេចរបស់សហភាពអឺរ៉ុបយកពន្ធអង្ករពីកម្ពុជានេះ គឺជាអាវុធសម្លាប់កសិករខ្មែរ និងប្រឆាំងច្បាប់ពាណិជ្ជកម្មអន្តរជាតិ។បើតាម CRF បានឱ្យដឹងថាកាលពីថ្ងៃទី៧ ខែមិថុនា កន្លងទៅនេះ គឺនៅក្នុងកិច្ចប្រជុំពិភាក្សាទៅលើ«បញ្ហាការដាក់ពន្ធរបស់អឺរ៉ុបលើការនាំចូលអង្ករពីកម្ពុជា ឬ EU Safeguard
លោក សុខ ពុទ្ធិវុធ បានជម្រាបជូនអង្គប្រជុំថា យោងតាមសេចក្តីសម្រេចរបស់អង្គប្រជុំក្រុមប្រឹក្សាភិបាលសហព័ន្ធស្រូវអង្ករកម្ពុជាកាលពីថ្ងៃទី៨ ខែមេសា ឆ្នាំ២០១៩ សហព័ន្ធស្រូវអង្ករកម្ពុជាបានដាក់ពាក្យបណ្តឹងទៅកាន់តុលាការអឺរ៉ុបរួចទៅហើយ ដោយពេលវេលានៃការប្តឹងនេះបានកំណត់ឱ្យដាក់ពាក្យមិនឱ្យលើសពីថ្ងៃទី១០ ខែមេសា ឆ្នាំ២០១៩។ ប្រភពពី CRF ដដែលបានបន្តថាបន្ទាប់ពីបានពិភាក្សាគ្នាយ៉ាងផុសផុលរួចមក សមាជិកអង្គប្រជុំទាំងអស់បានផ្តល់មតិឯកភាពទាំងស្រុងនិងបានលើកដៃគាំទ្រ១០០% លើការដាក់ពាក្យបណ្តឹងទៅកាន់តុលាការអឺរ៉ុបករណី «ការដាក់ពន្ធរបស់អឺរ៉ុបលើការនាំចូលអង្ករពីកម្ពុជា ឬ EU Safeguardនេះ» ព្រមទាំងអង្គប្រជុំស្នើសុំជម្រុញឱ្យមានការគាំទ្រពីក្រសួងពាណិជ្ជកម្មកម្ពុជា និងលើកយកករណីនេះទៅតវ៉ាតាមរយៈអង្គការពាណិជ្ជកម្មពិភពលោក (WTO) ថែមទៀតផង។
បើតាមលោក ស៊ុង សារ៉ន អគ្គនាយកក្រុមហ៊ុន Amru Rice ដែលបានចូលរួមប្រជុំកាលពីថ្ងៃសុក្រកន្លងមកនោះ បានបញ្ជាក់ថាពាក្យប្តឹងទៅតុលាការអឺរ៉ុបត្រូវបានធ្វើរួចហើយ ហើយ ក្រុមការងារទី ៩ របស់ CRF ក៏បានគាំទ្រឲ្យ សហព័ន្ធស្រូវអង្ករកម្ពុជាបន្តនីតិវិធីផ្សេងទៀតពាក់ព័ន្ធនឹងពាក្យប្តឹងនោះ ព្រោះរួបលោកផ្ទាល់ក៏យល់ឃើញថាវាមានអយុត្តិធម៌សម្រាប់កម្ពុជា ។ លោក ស៊ុង សារ៉ន បានមានប្រសាសន៍ថា «អេមរុរាយស៍គាំំទ្រដល់ការដាក់ពាក្យរបស់សហព័ន្ធស្រូវអង្ករកម្ពុជា ។ យើងមិនទាន់សន្មត់លទ្ធផលយ៉ាងនោះទេ ប៉ុន្តែជាធម្មតាបើសិនដើម្បីរកយុត្តិធម៌ គឺយើងត្រូវទាមទារកយុត្តិធម៌បែបនេះហើយ។ ការដាក់ពាក្យប្តឹងនេះ បើទទួលបានជោគជ័យនោះប្រយោជន៍ដែលយើងទទួលបានគឺរាល់ការនាំចូលអង្ករពីកម្ពុជាទៅសហព័ន្ធអឺរ៉ុបមិនជាប់ពន្ធ»។ យ៉ាងណាមិញ លោក សុង សារ៉ន បានបញ្ជាក់ថារយៈពេល ៤ ខែដើមឆ្នាំ២០១៩ នេះការនាំចេញអង្ករកម្ពុជាទៅកាន់ទៅផ្សារអឺរ៉ុបបានធ្លាក់ចុះប្រមាណជាង ៣០ភាគរយ ។
សូមបញ្ជាក់ថា គណៈកម្មការអឺរ៉ុបសម្រេចជាផ្លូវការលែងផ្ដល់ការអនុគ្រោះពន្ធ លើអង្ករកម្ពុជា ដែលនាំចូលទៅទីផ្សារអឺរ៉ុបសម្រាប់រយៈពេលបីឆ្នាំជាប់គ្នា គិតចាប់ពីថ្ងៃទី១៨ មករា ឆ្នាំ២០១៩ តទៅ។ ការសម្រេចយកពន្ធលើអង្ករកម្ពុជានេះ ធ្វើឡើងដោយសារតែមានបណ្តឹងថាការនាំចូលអង្ករពីកម្ពុជាទៅអឺរ៉ុប បានកើនឡើងខ្លាំងក្នុងរយៈពេល ៥ឆ្នាំចុងក្រោយ គឺពីឆ្នាំ២០១២ ដល់ឆ្នាំ២០១៧ ដូច្នេះដោយសារការអនុគ្រោះពន្ធនេះ ធ្វើឲ្យការនាំចូលអង្ករកម្ពុជាអាចលក់ក្នុងតម្លៃទាប ដែលបានបណ្ដាលឲ្យមានផលវិបាកធ្ងន់ធ្ងរ សម្រាប់ក្រុមអ្នកផលិតអង្ករនៅអឺរ៉ុប។
ការសម្រេចយកពន្ធអង្កររបស់កម្ពុជាសម្រាប់នាំអង្ករទៅអឺរ៉ុប គឺកម្ពុជានៅតែអាចនាំចេញទៅដដែល បើទោះបីជាត្រូវបង់ពន្ធពេញថ្លៃ ក្នុងអត្រាជិត ២០០ដុល្លារអាមេរិក សម្រាប់អង្ករមួយតោនក្នុងឆ្នាំដំបូង ២០១៩ ហើយអត្រាពន្ធនេះនឹងធ្លាក់ចុះមកនៅត្រឹមជាង ១៧០ដុល្លារ សម្រាប់អង្ករមួយតោនក្នុងឆ្នាំ២០២០ និងជាង ១៤១ដុល្លារ ក្នុងអង្ករមួយតោន នៅឆ្នាំ២០២១ ៕ កែសម្រួលដោយ ៖សុឃាក់
ចែករំលែកព័តមាននេះ