ខេត្តកណ្តាល ៖ បុរសម្នាក់ដែលខូចចិត្តព្រោះតែប្រពន្ធមានប្រុសថ្មីផិតក្បត់ខ្លួន ក៏គិតខ្លីឱបកូនស្រីជាទីស្រឡាញ់មកលោតទឹកពីលើស្ពានព្រែកសំរោង ក្រុងតាខ្មៅ ប៉ងសម្លាប់ខ្លួនតែមិនបានស្រេច ដោយត្រូវបានអ្នកធ្វើដំណើរតាមស្ពានឃើញសកម្មភាព ហាក់ដូចជាប្លែកខុសពីធម្មតាក៏ជួយចាប់ជាប់ ។ ការសម្រេចចិត្តរបស់បុរសខូចចិត្តរូបនេះ មិនទទួលបានការគាំទ្រពីបុរសទូទៅនោះទេ ពិសេសការយកកូនស្រីតូចដែលមិនទាន់ដឹងក្តីមកសម្លាប់ជាមួយខ្លួនដែរនោះ វាជាប្រការមិនត្រឹមត្រូវឡើយ ។
ហេតុការណ៍នេះ កើតឡើងកាលពីថ្ងៃទី៧ ខែមិថុនាកន្លងទៅ វេលាម៉ោង៤ល្ងាច នៅលើស្ពានព្រែកសំរោង ក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ។បុរសខូចចិត្តរូបនេះឈ្មោះ ហេង សំណាង អាយុ៤៤ឆ្នាំ ស្នាក់នៅបន្ទប់ជួលក្នុងភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ប្រកបរត់ម៉ូតូ ឌុប និងកូនស្រីឈ្មោះ ហេង សៀវឈីង អាយុ៣ឆ្នាំ ។
បើតាមលោក ស កែវពិសិដ្ឋ អធិការនគរបាលក្រុងតាខ្មៅឲ្យដឹងថា បុរសរូបនេះបានជិះម៉ូតូឌ្រីម១២៥ ពណ៌ខ្មៅ ដឹកកូនស្រីចេញពីបន្ទប់ជួលនៅភូមិរបោះអង្កាញ់ សង្កាត់ព្រែកឯង ឆ្ពោះមកស្ពានព្រែកសំរោង ។ ពេលកំពុងឱបកូនស្រីរៀបលោតពីលើស្ពាន ក៏ត្រូវនគរបាលចរាចរណ៍ក្រុងតាខ្មៅដែលកំពុងសម្រួលចរាចរណ៍នៅលើស្ពានឃើញ ក៏បានឃាត់រួចយកមកប៉ុស្តិ៍នគរបាលតាខ្មៅដើម្បីធ្វើការអប់រំ ហើយឱ្យវិលត្រឡប់ ទៅវិញ បោះបង់ការប៉ងសម្លាប់ខ្លួនបែបនេះ ដែលសូម្បីតែព្រះក៏មិនប្រស់ផង ។
មិនមានព័ត៌មានលម្អិតឱ្យដឹងថា តើប្រពន្ធដែលរត់ចោលប្តីនោះឈ្មោះអ្វីទេ ។ បុរសដើមទ្រូង៥ហត្ថ មិនគួរក្លាយជាមនុស្សទន់ជ្រាយចំពោះមុខការផិតក្បត់របស់ប្រពន្ធនោះឡើយ បើគេមិនស្រឡាញ់ឬអស់និស្ស័យជាមួយយើងហើយ គួរតែបំពេញចិត្តគេទៅមិនត្រូវនាំទុក្ខដាក់ខ្លួននោះទេ ៕
ចែករំលែកព័តមាននេះ