រាជធានីភ្នំពេញ ៖ អ្នករត់រ៉ឺម៉កម៉ូតូកង់បីឥណ្ឌាម្នាក់បានសម្រេចចិត្តយកក្រមាចងកសម្លាប់ខ្លួននៅក្នុងផ្ទះជួល បន្ទាប់ពីជនរងគ្រោះមានជំងឺរ៉ាំរ៉ៃ ព្យាបាលមិនជាស្គមរីងរៃសល់តែស្បែកដណ្តប់ឆ្អឹង ។
ការធ្វើអត្តឃាតខាងលើនេះបង្កអោយមានការភ្ញាក់ផ្អើលកាលពីម៉ោង៥និង៣០នាទីព្រឹកថ្ងៃទី១០ មិថុនា ឆ្នាំ២០១៩ នៅចំណុចបន្ទប់ឡៅតឿផ្ទះជួល តាមផ្លូវលេខ១៩៩០ ស្ថិតក្នុងភូមិ ភ្នំពេញថ្មី សង្កាត់ភ្នំពេញថ្មី ខណ្ឌសែនសុខ។
តាមប្រភពពីនគរបាលមូលដ្ឋានបានអោយដឹងថា ជនរងគ្រោះដែលស្លាប់ឈ្មោះ នួន សាវ៉ាត ភេទប្រុស អាយុ៤២ឆ្នាំ ជារត់រ៉ឺម៉កម៉ូតូកង់បីឥណ្ឌា ស្នាក់នៅផ្ទះជួលកន្លែងកើតហេតុខាងលើ និងមានស្រុកកំណើតភូមិជើងលង ឃុំចំប៉ី ស្រុកបាទី ខេត្តតាកែវ។
តាមនគរបាលមូលដ្ឋានបានអោយដឹងថា ជនរងគ្រោះបានចងកដោយយកក្រមាចងភ្ជាប់ទៅនឹងចំរឹងបង្អួចក្នុងបន្ទប់ឡៅតឿ បណ្តាលឱ្យស្លាប់ ហើយត្រូវបានប្រជាពលរដ្ឋរាយការណ៍ប្រាប់សមត្ថកិច្ចបង្កអោយមានការភ្ញាក់ផ្អើលកើតឡើងតែម្តង ។
តាមប្រភពពីក្រុមគ្រួសារជនរងគ្រោះបានអោយដឹងថា បុរសរងគ្រោះខាងលើមានជំងឺរ៉ាំរ៉ៃជាច្រើនមុខ ព្យាបាលពុំជាអស់រយៈពេលជាយូឆ្នាំមកហើយ ព្រមទាំងមានសភាពស្គមរីងរៃនៅសល់តែស្បែកដណ្តប់ឆ្អឹង ដោយសារតែកុំអោយពិបាកដល់គ្រួសារ ទើបជនរងគ្រោះសម្រេចចិត្តចងកសម្លាប់ខ្លួនតែម្តង ។
នៅព្រឹកថ្ងៃដដែលនេះដែរ នគរបាលជំនាញក៏បានចុះពិនិត្យកន្លែងកើតហេតុ និងសពជនរងគ្រោះ ហើយបានបញ្ជាក់ថា ជនរងគ្រោះពិតជាចងកសម្លាប់ខ្លួនប្រាកដមែន ។ ក្រោយពិនិត្យរួច សពជរងគ្រោះត្រូវបានក្រុមគ្រួសារដឹកយកទៅស្រុកកំណើតដើម្បីធ្វើបុណ្យតាមប្រពៃណី ៕
ចែករំលែកព័តមាននេះ