​សៀង​ហៃ​៖ យោង​តាម​ភ្នាក់ងារ​សារ​ព​ត៌​មាន Reuters ដែល​បាន​រាយការណ៍​មក​កាលពី​ថ្ងៃ​ទី​៨​ខែមិថុនា​កន្លង​មក​បាន​ឲ្យ​ដឹង​ថា ប្រទេស​ចិន​កំពុង​តែ​ត្រៀម​កាត់​បន្ថយ​ការ​នាំ​ចេញ​បច្ចេកវិទ្យា​មួយ​ចំនួន​ទៅ​កាន់​សហរដ្ឋអាមេរិក​។ ប្រសិនបើ​ត្រូវ​បាន​អនុវត្ត​នោះ​វិធានការ​នេះ​បង្ហាញ​ឲ្យ​ឃើញ​ថា​ប្រទេស​ចិន​នឹង​ឆ្លើយ​តប​នឹង​ការ​ហាមឃាត់​ដែល​សហរដ្ឋអាមេរិក​បាន​ដាក់​លើ​ក្រុមហ៊ុន​បច្ចេកវិទ្យា Huawei Technologies Co Ltd ព្រោះតែ​កង្វល់​ទាក់ទិន​នឹង​បញ្ហា​សន្តិសុខ​ជាតិ​។

​លោក Hu Xijing ដែល​ជា​ប្រធាន​កែស​ម្រូ​ល​ប្រចាំ​កាសែត Global Times របស់​ប្រទេស​ចិន​បាន​និយាយ​លើ Twitter របស់​លោក​ថា ប្រទេស​ចិន​កំពុង​តែ​កសាង​វិធានការ​គ្រប់គ្រង​មួយ​ដើម្បី​ការពារ​បច្ចេកវិទ្យា​សំខាន់​ៗ​របស់​ប្រទេស​ចិន​។

​លោក​បាន​បន្ថែម​ថា «​វា​គឺ​ជំហាន​ដ៏​សំខាន់​ក្នុង​ការ​ធ្វើ​ឲ្យ​ប្រព័ន្ធ​របស់​ខ្លួន​កាន់តែ​ល្អ​ប្រសើរ​ឡើង ហើយ​ក៏​ជា​ការ​ឆ្លើយ​តប​មួយ​ទៅ​នឹង​វិធានការ​អា​មេ​រិ​ក​ដែរ​។ ដែល​ត្រូវ​បាន​អនុវត្ត ការ​នាំ​ចេញ​បច្ចេកវិទ្យា​មួយ​ចំនួន​ទៅ​កាន់​សហរដ្ឋអាមេរិក​នឹង​ស្ថិត​ក្រោម​ការ​គ្រប់គ្រង​»​។ យ៉ាងណា​ក្តី លោក​មិន​បាន​ប្រាប់​ពី​ប្រភព​នៃ​ព​ត៌​មាន​នេះ​លើ Twitter លោក ឡើយ​។ សារ​ព​ត៌​មាន Global Times មិនមែន​ជា​សារ​ព​ត៌​មាន​ក្រោម​គណ​បក្ស​គ​ម្មុ​យ​នី​ស្ត​ចិន​ជា​ផ្លូវការ​ទេ ប៉ុន្តែ​ទស្សនៈ​របស់​ពួក​គេ​ត្រី​វ​បាន​ចាត់​ទុក​ថា​តំណាង​អ្នកដឹកនាំ​ក្នុ​ប្រទេស។

​ក្នុង​ខណៈ​ពេល​ដែល​លោក Hu បាន​បង្ហោះ​លើ Twitter របស់​លោក ភ្នាក់ងារ​សារ​ព​ទ៌​មាន Xinhua របស់​រដ្ឋាភិបាល​ចិន​បាន​រាយការណ៍​មក​ថា គណៈកម្មាធិការ​ជាតិ​អភិវឌ្ឍន៍ និង​កែទម្រង់ (NDRC) នឹង​រៀបចំ​ការ​សិក្សារ​មួយ​ដើម្បី​បង្កើត​ប្រព័ន្ធ​បញ្ជី​គ្រប់គ្រង​សន្តិសុខ​បច្ចេកវិទ្យា​ជាតិ​។ ការ​ប្រកាស​ទាំងនេះ​ត្រូវ​បាន​លើក​ឡើង​ប៉ុន្មាន​ស​ប្តា​ហ៍​បន្ទាប់​ពី​សហរដ្ឋអាមេរិក​បាន​ដាក់​ក្រុមហ៊ុន Huawei ចូល​ក្នុង​បញ្ជីខ្មៅ​ដែល​ហាមឃាត់​ក្រុមហ៊ុន​អា​មេ​រិ​ក​មិន​ឲ្យ​ផ្គត់ផ្គង់​ផលិតផល​និង​សេវាកម្ម​ដល់​ពួក​គេ​។ មិនយូរ​ប៉ុន្មាន ប្រទេស​ចិន​បាន​ប្រកាស​ថា​ពួក​គេ​នឹង​ចេញ​បញ្ជី​ឈ្មោះ​បុគ្គល​បរទេស​ដែល​មិន​អាច​ទុកចិត្ត​បាន​ដែរ ៕ (​កែសម្រួល​ដោយ ៖ បុប្ផា​)