រាជធានីភ្នំពេញ ៖ បុរសម្នាក់បើកបរម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ បោះពួយក្នុងល្បឿនលឿន គេចលូដែលគេដាក់ធ្វើជារបាំងការពាផ្លូវបេតុងមិនឲ្យរថយន្តធំបើកឆ្លងកាត់ ហើយជ្រុលចូលទៅចំណែកផ្លូវម្ខាងទៀត រួចបានបុកជាមួយម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ២០០៨ ពេញទំហឹង…
រាជធានីភ្នំពេញ ៖ បុរសម្នាក់បើកបរម៉ូតូមួយគ្រឿងម៉ាកហុងដាឌ្រីម ស៊េរីឆ្នាំ២០១៩ បោះពួយក្នុងល្បឿនលឿន គេចលូដែលគេដាក់ធ្វើជារបាំងការពាផ្លូវបេតុងមិនឲ្យរថយន្តធំបើកឆ្លងកាត់ ហើយជ្រុលចូលទៅចំណែកផ្លូវម្ខាងទៀត រួចបានបុកជាមួយម៉ូតូមួយគ្រឿងទៀតម៉ាកហុងដាឌ្រីម ស៊េរីឆ្នាំ២០០៨ ពេញទំហឹង បណ្ដាលឲ្យភាគីម៉ូតូទាំងសងខាងរងរបួសធ្ងន់និងស្រាលចំនួន៤នាក់ ហើយម៉ូតូទាំង២គ្រឿងបានរងការខូច ខាតយ៉ាងដំណំដូចគ្នា បន្ទាប់មកភាគីទាំង២បានដោះស្រាយគ្នាបញ្ចប់រឿងនៅនឹងកន្លែងកើតហេតុនោះតែម្ដង។
គ្រោះថ្នាក់ចរាចរណ៍ខាងលើនេះបានកើតឡើងកាលពីវេលាម៉ោង៦ព្រឹកថ្ងៃទី១០ ខែមិថុនា ឆ្នាំ២០១៩ នៅលើកំណាត់ផ្លូវបេតុងស្ថិតនៅក្នុងភូមិស្រែរាជ្ជៈ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
តាមប្រភពពីអ្នកភូមិស្រែរាជ្ជះដែលបានឃើញហេតុការណ៍ដោយផ្ទាល់បាននិយាយថា ម៉ូតូម៉ាកហុងដាឌ្រីមទាំង២គ្រឿងនោះពណ៌ខ្មៅដូចគ្នា ប៉ុន្តែស៊េរីឆ្នាំផលិតខុសគ្នា ដោយមួយគ្រឿងម៉ាកហុងដាឌ្រីម ស៊េរីឆ្នាំ២០១៩ ពាក់ស្លាកលេខ កណ្ដាល ១AE-៩១៣៩ ជិះតែម្នាក់ឯង។ ចំណែកមួយគ្រឿងទៀតម៉ាកហុងដាឌ្រីម ស៊េរីឆ្នាំ២០០៨ ជិះគ្នា៣នាក់ ហើយភាគីទាំង២សុទ្ធតែបានរងរបួសធ្ងន់និងស្រាល ប៉ុន្តែភាគីទាំងពីរមិនត្រូវបានស្គាល់អត្តសញ្ញាណនោះឡើយ។
តាមប្រភពដដែលបានបន្តឲ្យដឹងថា នៅមុនពេលកើតហេតុ គេឃើញម៉ូតូទាំង២គ្រឿងធ្វើដំណើរក្នុងទិសដៅបញ្ច្រាសគ្នា ដោយម៉ូតូមួយគ្រឿង ស៊េរីឆ្នាំ២០១៩ ជិះម្នាក់ឯងបើកបរក្នុងទិសដៅពីលិចទៅកើត ។ ចំណែកម៉ូតូមួយគ្រឿង ស៊េរីឆ្នាំ២០០៨ ជិះគ្នា៣នាក់បើកបរក្នុងទិសដៅពីកើតទៅលិច ក្នុងល្បឿនលឿន ។ លុះពេលទៅដល់ចំណុចកើតហេតុខាងលើ មានលូដែលគេដាក់ធ្វើជារបាំងការពារផ្លូវមិនឲ្យរថយន្តធំបើកកាត់ តែម៉ូតូម៉ាកហុងដា ស៊េរីឆ្នាំ២០១៩ មិនព្រមបន្ថយល្បឿនឡើយ ព្រមទាំងបើកគេចចូលទៅចំណែកផ្លូវម្ខាងទៀតហើយក៏ជ្រុលទៅបុកម៉ូតូហុងដា ស៊េរីឆ្នាំ២០០៨ យ៉ាងពេញទំហឹង បណ្ដាលឲ្យភាគីម៉ូតូទាំង២គ្រឿងរងរបួសធ្ងន់និងស្រាលចំនួន៤នាក់តែម្តង ។
តាមប្រភពដដែលបានបន្តឱ្យទៀតថា ក្រោយពេលកើតហេតុ តំណាងខាងភាគីម៉ូតូម៉ាកហុងដា ស៊េរីឆ្នាំ២០១៩ បានចេញសំណងទៅឲ្យខាងភាគីម៉ូតូហុងដា ស៊េរីឆ្នាំ២០០៨ ដើម្បីព្យាបាលរបួសនិងជួសជុលម៉ូតូចំនួន១.០៥០.០០០រៀល(១លាន៥ម៉ឺនរៀល)ជាការបញ្ចប់រឿងនៅកន្លែងកើតហេតុ។ ចំណែកជនរងគ្រោះទាំង៤នាក់ត្រូវបាននគរបាលបញ្ជូនទៅកាន់គ្លីនិកឯកជនដែលនៅក្បែនោះដើម្បីព្យាបាលរបួសផងដែរ ៕
ចែករំលែកព័តមាននេះ