ខេត្តកំពង់ស្ពឹ ៖ នៅក្នុងគ្រោះថ្នាក់ចរាចរណ៍ដ៏រន្ធត់បំផុត គឺអ្នកជិះក្នុងរថយន្តហាយឡែនឌ័រត្រូវឆេះស្លាប់នៅនឹងកន្លែងកើតហេតុចំនួន៦នាក់ ឯរថយន្តហ៊ីយ៉ាន់ដាយស្លាប់៥នាក់នៅនឹងកន្លែងដែរ និងរបួស៥នាក់ ក្នុងនោះធ្ងន់១នាក់(ស្រី) ។ ចំពោះអ្នករងរបួស ក៏ត្រូវបានរថយន្តសង្គ្រោះដឹកយកទៅមន្ទីរពេទ្យបង្អែកខេត្ដ ។
គួរបញ្ជាក់ថា នេះគឺជាមហាសោកនាដកម្មដ៏ធំមួយ វេលាម៉ោងជាង៦ល្ងាចថ្ងៃទី៨ មិថុនា ដែលយ៉ាងហោចណាស់១១នាក់បានស្លាប់បាត់បង់ជីវិត និងរងរបួស៥នាក់ ក្នុងហេតុការណ៍គ្រោះថ្នាក់ដ៏រន្ធត់នៅលើកំណាត់ផ្លូវជាតិលេខ៤ ក្នុងស្រុកភ្នំស្រួច ហើយក្នុងចំណោមអ្នកស្លាប់ទាំង១១នាក់នេះ មានមន្ត្រីគយបម្រើការងារនៅកំពង់ផែស្វយ័តក្រុងព្រះសីហនុ៣នាក់ផងដែរ ។
មន្ត្រីគយទាំង៣នាក់ ដែលស្លាប់មាន ១-លោកជន់ ច័ន្ទរិទ្ធ ២-លោក គឹម ឆាត អនុប្រធានការិយាល័យ និង៣-លោក ហេង មករា ។ សពមន្ត្រីគយទាំង៣នាក់ ត្រូវបានដឹកយកទៅតម្កល់ធ្វើបុណ្យនៅវត្តទឹកថ្លា ។ មន្ត្រីគយដែលរងគ្រោះនេះ ត្រូវបានគេប្រាប់ថា ធ្វើដំណើរតាមរថយន្តហាយឡែនឌ័រ១គ្រឿង ។ មន្ត្រីនគរ បាលខេត្តបានឱ្យដឹងថា ជនរងគ្រោះដែលស្លាប់បាត់បង់ជីវិតគឺមាន៦នាក់ជិះក្នុងរថយន្តហាយឡែនឌ័រ និង៥នាក់ទៀតជិះនៅក្នុងរថយន្តទេសចរណ៍ប្រភេទ២៤កៅអី ។ ចំណែកអ្នករងរបួស៥នាក់ ក៏ជាអ្នកធ្វើដំណើរលើរថយន្តទេសចរណ៍ប្រភេទ២៤កៅអីដែរ ។
ហេតុការណ៍គ្រោះថ្នាក់ដ៏រន្ធត់នេះ កើតឡើងកាលពីវេលាម៉ោងប្រមាណ៦និង១០នាទីល្ងាច ថៃ្ងទី៨ ខែ មិថុនាកន្លងទៅ នៅលេីផ្លូវជាតិលេខ៤ ចន្លោះគីឡូម៉ែត្រលេខ៨៥-៨៦ ក្នុងឃុំត្រែងត្រយឹង ស្រុកភ្នំស្រួច ដែលរថយន្ត៣គ្រឿងបុកគ្នា បណ្ដាលឲ្យឆេះរថយន្តហាយឡែនឌ័រ និងរថយន្តហុីយ៉ាន់ដាយ ។
លោកវរសេនីយ៍ឯក សាយ ប៊ុនថន អធិការនគរបាលស្រុកភ្នំស្រួចបានឱ្យដឹងថា រថយន្តហាយឡែនឌ័រ ពាក់ផ្លាកលេខ ភ្នំពេញ ២L-០០៧១ ធ្វើដំណើរក្នុងទិសដៅពីខាងកើត ទៅខាងលិច។ លុះទៅដល់ចំណុចខាងលើ បានជែងរថយន្ត១គ្រឿងម៉ាកហុីយ៉ាន់ដាយ រួចជ្រុលទៅបុករថយន្ត១គ្រឿងទៀត ម៉ាកហុីយ៉ាន់ដាយដែរពាក់ផ្លាកលេខ ភ្នំពេញ ៣D-៧១០៧ ក្នុងដំណើរបញ្ច្រាសទិសគ្នា បណ្តាលឱ្យឆាបឆេះសន្ធោ សន្ធៅ ។
ក្រោយមានករណីគ្រោះថ្នាក់នេះ លោកឧត្តមសេនីយ៍ទោ សម សាមួន ស្នងការនគរបាលខេត្តបានបញ្ជាឱ្យរថយន្តពន្លត់អគ្គិភ័យចំនួន២គ្រឿង ទៅជួយអន្ដរាគមន៍ ។ ចំពោះមូលហេតុ គឺមកពីការបេីកជែងដោយគ្មានការប្រុងប្រយ័ត្ននិងមិនគោរពច្បាប់ចរាចរណ៍ ៕ (សម្រួលដោយ៖ ស្រីណា)
ចែករំលែកព័តមាននេះ