ប្រទេសហ្វ៊ីលីពីន ៖ វិមានប្រធានាធិបតីហ្វ៊ីលីពីន កាលពីថ្ងៃទី៨មិថុនាបានបដិសេធការអំពាវនាវឲ្យមានការស៊ើបអង្កេត លើការរំលោភបំពានសិទ្ធិមនុស្ស ដែលធ្វើឡើងកាលពីថ្ងៃទី៧មិថុនា ដោយអ្នកជំនាញការអ.ស.ប១១នាក់ ហើយចាត់ទុកថានោះជាការជ្រៀតជ្រែកចូលកិច្ចការផ្ទៃក្នុងរបស់ប្រទេស។ អ្នកជំំនាញការទាំងនេះបានអំពាវនាវកាលពីថ្ងៃទី៧មិថុនា ដល់បណ្ដារដ្ឋជាសមាជិកក្រុមប្រឹក្សាសិទ្ធិមនុស្សអ.ស.ប…
ប្រទេសហ្វ៊ីលីពីន ៖ វិមានប្រធានាធិបតីហ្វ៊ីលីពីន កាលពីថ្ងៃទី៨មិថុនាបានបដិសេធការអំពាវនាវឲ្យមានការស៊ើបអង្កេត លើការរំលោភបំពានសិទ្ធិមនុស្ស ដែលធ្វើឡើងកាលពីថ្ងៃទី៧មិថុនា ដោយអ្នកជំនាញការអ.ស.ប១១នាក់ ហើយចាត់ទុកថានោះជាការជ្រៀតជ្រែកចូលកិច្ចការផ្ទៃក្នុងរបស់ប្រទេស។
អ្នកជំំនាញការទាំងនេះបានអំពាវនាវកាលពីថ្ងៃទី៧មិថុនា ដល់បណ្ដារដ្ឋជាសមាជិកក្រុមប្រឹក្សាសិទ្ធិមនុស្សអ.ស.ប ឲ្យបើកការស៊ើបអង្កេតមួយលើការរំលោភបំពានសិទ្ធិមនុស្សធ្ងន់ធ្ងរ ដោយគូសបញ្ជាក់ជាពិសេសពីចំនួនច្រើនបំផុតនៃមនុស្សត្រូវប៉ូលិសសម្លាប់ ក្នុងក្របខណ្ឌនៃរបស់ហៅថា ការតស៊ូប្រឆាំងការរត់ពន្ធគ្រឿងញៀន។
យោងតាមតួលេខផ្លូវការថាជនសង្ស័យជាង៥.៣០០នាក់ បានត្រូវប៉ូលិសសម្លាប់ តាំងពីចាប់ផ្ដើមសង្គ្រាមប្រឆាំងគ្រឿងញៀន ប្រកាសដោយប្រធានាធិបតីលោកRODRIGO DUTERTE បន្ទាប់ពីលោកឈ្នះឆ្នោតកាលពី៣ឆ្នាំមុនមក។ ពួកអ្នកការពារសិទ្ធិមនុស្សយល់ថា តួលេខពិតប្រាកដមានច្រើនជាងនេះដល់ទៅ៣ដងឯណោះ។
ក្នុងសេចក្ដីប្រកាសមួយអ្នកនាំពាក្យរបស់វិមានប្រធានាធិបតីហ្វ៊ីលីពីន លោកSALVADOR PANELOថ្លែងថា ការអំពាវនាវនោះរបស់ពួកអ្នកជំនាញការអ.ស.បពុំត្រឹមតែជាអំពើឆ្កួតលីលាប៉ុណ្ណោះទេ តែជាការជ្រៀតជ្រែកមួយចូលកិច្ចការផៃ្ទក្នុងប្រទេសមួយដែលមិនអាចទទួលយកបាន ក្នុងអធិបតេយ្យភាពរបស់ហ្វ៊ីលីពីន។ លោកបានចោទប្រកាន់អ្នកជំនាញការទាំងនេះថា ធ្វើព័ត៌មានលំអៀងនិងខុសទាំងស្រុង។
លោកគូសបញ្ជាក់ថានៅហ្វ៊ីលីពីន ពួកអ្នកដែលនិយាយប្រឆាំងនឹងយុទ្ធនាការ ប្រឆាំងគ្រឿងញៀន ហើយចោទប្រកាន់ប្រធានាធិបតីថារំលោភបំពានសិទ្ធិមនុស្ស ត្រូវបានបដិសេធដោយពលរដ្ឋហ្វ៊ីលីពីន។ បណ្ដាគណបក្សជាសម្ព័ន្ធមិត្តរបស់ប្រធានាធិបតី បានឈ្នះដាច់ក្នុងការបោះឆ្នោតសភាពាក់កណ្ដាលអាណត្តិ កាលពីខែមុន ដោយដណ្ដើមការត្រួតត្រាក្នុងព្រឹទ្ធសភានិងសភា។ សង្គ្រាមប្រឆាំងគ្រឿងញៀនជានយោបាយអាទិភាពរបស់ប្រធានាធិបតី ហើយលោកការពារយ៉ាងមឺុងម៉ាត់ ប្រឆាំងរាល់ការចោទប្រកាន់ពីខាងក្រៅ៕ (កែសម្រួលដោយ ៖ បុប្ផា)
ចែករំលែកព័តមាននេះ