ខេត្តប៉ៃលិន ៖ ជនសង្ស័យម្នាក់ត្រូវបានសមត្ថកិច្ចនគរបាលធ្វើការចាប់ឃាត់ខ្លួនពាក់ព័ន្ធនឹងករណីលួចម៉ូតូ កាលពីវេលាម៉ោង០៨ព្រឹក ថ្ងៃទី០៨ ខែមិថុនានេះ ស្ថិតនៅចំណុចផ្លូវបំបែក ក្នុងភូមិភ្នំកុយ ឃុំសាលាក្រៅ ស្រុកសាលាក្រៅ ។
នគរបាលបានឲ្យដឹងថា មុនពេលកើតហេតុគេឃើញជនរងគ្រោះបានជិះម៉ូតូមួយគ្រឿងទៅចម្ការរបស់ខ្លួន រួចចតទុកចោលមួយភ្លែតនៅលើផ្លូវ បន្ទាប់មកក៏ដើរចូលទៅក្នុងចម្ការ ស្រាប់តែមួយសន្ទុះក្រោយមកក៏ចេញមកក្រៅវិញ ពេលក្រលេករកមើលបែរជាបាត់ម៉ូតូតែម្តង រួចក៏មានការភ្ញាក់ផ្អើលដល់ប្រជាពលរដ្ឋ និងរាយការណ៍ទៅកម្លាំងនគរបាលឱ្យស្ទាក់ចាប់ខ្លួនតែម្តង ។
ប្រភពបន្តថា ក្រោយទទួលដំណឹងការណីលួចម៉ូតូ កម្លាំងនគរបាលក៏ចុះល្បាតប្រទះឃើញជនសង្ស័យម្នាក់កំពុងជិះម៉ូតូជនរបស់រងគ្រោះទើបនាំគ្នាដេញចាប់ក្នុងចម្ការដំឡូងមី ដើម្បីធ្វើការឃាត់ខ្លួន ។ ប្រភពបញ្ជាក់បន្តថា ជនរងគ្រោះមានឈ្មោះ សៅ វុទ្ធី ហៅញ៉ាញ់ ភេទប្រុស អាយុ៣៨ឆ្នាំ ជនជាតិខ្មែរ មុខរបរកសិករ រស់នៅភូមិភ្នំកុយ ឃុំសាលាក្រៅ ស្រុកសាលាក្រៅ ដោយបាត់ម៉ូតូចំនួន០១គ្រឿង ម៉ាកហុងដាឌ្រីម HONDA DREAM ស៊េរីឆ្នាំ២០១៩ ពណ៌ខ្មៅពាក់ស្លាកលេខ ប៉ៃលិន១c.៥៦៧៤ ។
ចំណែកជនសង្ស័យឈ្មោះ យន ដា ភេទប្រុស អាយុ៣៨ឆ្នាំ ជនជាតិខ្មែរ មុខរបរកម្មករ បច្ចុប្បន្នរស់នៅភូមិសំពរ ឃុំចំណារក្រោម ស្រុកស្ទោង ខេត្តកំពង់ធំ ដោយចាប់យកវត្ថុតាងម៉ូតូ០១គ្រឿង HONDA DREAM ស៊េរីឆ្នាំ២០១៩ សោច្នៃ១ សម្រាប់កាច់សោម៉ូតូ (ដង០១ និងផ្លែ០២) ។
បើតាមសំដីជនសង្ស័យបានឲ្យដឹងថា ពួកគេមានគ្នាពីរនាក់ដោយជិះម៉ូតូមួយគ្រឿង (មិនស្គាល់ម៉ាក) ដើម្បីធ្វើសកម្មភាពនៅពេលជួបម៉ូតូជនរងគ្រោះជនសង្ស័យខាងលើក៏ចុះពីលើម៉ូតូគ្នាគេ ដោយជនសង្ស័យម្នាក់ជិះចេញទៅមុន ចំណែករូបគេ (ជនសង្ស័យដែលឃាត់ខ្លួន) ក៏ចាប់លួចម៉ូតូជនរងគ្រោះតែម្តង ។
ជនសង្ស័យបញ្ជាក់ថា កាលពីយប់ថ្ងៃទី៧ ពួកគេធ្វើសកម្មភាព និងសម្រាកនៅខេត្តបាត់ដំបង លុះព្រឹកឡើងក៏បន្តដំណើរមកលួចនៅខេត្តប៉ៃលិន ហើយនេះជាលើកទីពីរ ដែលពួកគេធ្វើសកម្មភាពលួច ដោយលើកទីមួយបានសម្រេច១គ្រឿងផងដែរ ។ បច្ចុប្បន្នជនសង្ស័យខាងលើត្រូវបានឃាត់ខ្លួននៅ អធិការដ្ឋាននគរបាលស្រុកសាលាក្រៅ ដើម្បីរៀបចំសំនុំរឿងបញ្ជូនទៅតុលាការ ឱ្យចាត់ការតាមនីតិវិធីច្បាប់ ៕ កែសម្រួលដោយ ៖ សុឃាក់
ចែករំលែកព័តមាននេះ