ខេត្តកណ្តាល ៖ បុរសម្នាក់ខូចចិត្ត ព្រោះតែប្រពន្ធមានប្រុសថ្មីផិតក្បត់ ដោយសារតែការគិតខ្លីក៏អោបកូនស្រីជាទីស្រលាញ់ទៅលោតទឹកលើស្ពានព្រែកសំរោង ក្រុងតាខ្មៅ ប៉ុនប៉ងសម្លាប់ខ្លួនតែមិនបានស្រេច ត្រូវគេឃើញសភាពប្លែកខុសពីធម្មតាក៏ជួយចាប់ជាប់ បង្កឱ្យមានការភ្ញាក់ផ្អើលម៉ោង៤ល្ងាចថ្ងៃទី៨ ខែមិថុនា ឆ្នាំ២០១៩ នៅលើស្ពានព្រែកសំរោង ក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ។
បុរសកំសត់ខាងលើមានឈ្មោះ ហេង សំណាង ភេទប្រុស អាយុ៤៤ឆ្នាំ មានទីលំនៅស្នាក់នៅបន្ទប់ជួល ក្នុងភូមិរបោះអង្កញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ មុខរបរជាអ្នករត់ម៉ូតូឌុប និងមានកូនស្រីឈ្មោះ ហេង សៀវឈីង ភេទស្រី អាយុ៣ឆ្នាំ ។
បើយោងតាមការបញ្ជាក់ពីលោក ស កែវពិសិដ្ឋ អធិការក្រុងតាខ្មៅបានប្រាប់ថា នៅពេលកើតហេតុ ជនរងគ្រោះបានជិះម៉ូតូម៉ាកឌ្រីម សេ១២៥ ពណ៌ខ្មៅ ដឹកកូនស្រីចេញពីបន្ទប់ជួលនៅភូមិរបោះអង្កាញ់ ខណ្ឌច្បារអំពៅ ក្នុងគោលបំណងមកលោតទឹកពីលើស្ពានព្រែកសំរោង ភូមិព្រែកសំរោង សង្កាត់តាខ្មៅ ។
ប្រភពដដែលបន្តថា តែពេលជនរងគ្រោះកំពុងអោបកូនស្រីរៀបចំលោតទឹកពីលើស្ពាន ក៏ត្រូវនគរបាលចរាចរណ៍ក្រុងតាខ្មៅដែលកំពុងសំរួលចរាចរណ៍នៅលើស្ពានបានឃើញ ក៏បានឃាត់ជនរងគ្រោះយកមកប៉ុស្តិ៍នគរបាលតាខ្មៅ ដើម្បីធ្វើការអប់រំ ហើយឱ្យវិលត្រឡប់ទៅវិញបន្ទប់ជួលវិញ៕ (កែសម្រួលដោយ ៖ បុប្ផា)
ចែករំលែកព័តមាននេះ