រាជធានីភ្នំពេញ ៖ ក្រសួងព័ត៌មានបានសម្រេចឲ្យវិទ្យុសំឡេងសហរដ្ឋអាមេរិក (VOA) បើកការិយាល័យតំណាងស្របច្បាប់មួយនៅក្នុងប្រទេសកម្ពុជា ។ ក្រសួងព័ត៌មាន កាលពីថ្ងៃទី៥ ខែមិថុនា បានចេញលិខិត ផ្លូវការសម្រេចឱ្យវិទ្យុសំឡេងសហ រដ្ឋអាមេរិកមួយនេះ បើកការិយាល័យតំណាងតាមផ្លូវច្បាប់ ហើយត្រូវបានចេញផ្សាយជាសាធារណៈនៅថ្ងៃទី៧ ខែមិថុនា ។
តាមសេចក្តីសម្រេច ការិយាល័យវិទ្យុសំឡេងសហរដ្ឋអាមេរិក(VOA)ប្រចាំនៅព្រះរាជាណាចក្រកម្ពុជា មានទីតាំងស្ថិតនៅផ្ទះលេខ៣២០មហាវិថីព្រះមុនីវង្ស សង្កាត់ចតុមុខ ខណ្ឌដូនពេញ រាជធានីភ្នំពេញ ដែលមានលោក Christopher Service Dechard ជនជាតិអាមេរិកកាន់លិខិតឆ្លងដែនលេខ P៨២២១០២៧៨៩ ជាតំណាងស្របច្បាប់ ។
ក្រសួងព័ត៌មាន បានសម្រេចឲ្យការិយាល័យវិទ្យុសំឡេងសហរដ្ឋអាមេរិក(VOA) និងតំណាងស្របច្បាប់ ត្រូវគោរពតាមរដ្ឋធម្មនុញ្ញនិងច្បាប់ស្តីពីរបបសារព័ត៌មាន ក្រមសីលធម៌អ្នកសារព័ត៌មាន បទបញ្ជា កិច្ចសន្យា និងសេចក្តីណែនាំនានាពាក់ព័ន្ធវិស័យព័ត៌មាន និងសោតទស្សន៍នៃព្រះរាជាណាចក្រកម្ពុជា ។ ករណីប្រព្រឹត្តល្មើស ត្រូវទទួលទោសតាមច្បាប់ជាធរមាន ។
មិនតែប៉ុណ្ណោះក្រសួងក៏បានតម្រូវឱ្យការិយាល័យវិទ្យុសំឡេងសហរដ្ឋអាមេរិករាល់ការផ្លាស់ប្តូរព័ត៌មានអំពីទីតាំងការិយាល័យ និង/ឬតំណាងស្របច្បាប់ ត្រូវជូនដំណឹងមកក្រសួងព័ត៌មាន៥ថ្ងៃមុន ។ វិទ្យុសំឡេងសហរដ្ឋអាមេរិក(VOA) ជាបណ្តាញផ្សាយពហុព័ត៌មានអន្តរជាតិធំបង្អស់របស់សហរដ្ឋអាមេរិក ដែលផ្តល់ព័ត៌មានជាច្រើនភាសា ។
VOA ត្រូវបានបង្កើតឡើងនៅឆ្នាំ១៩៤២ ជាមួយនឹងការប្តេជ្ញារាយការណ៍ព័ត៌មានឯករាជ្យ និងទូលំទូលាយ ហើយនាំយកការពិតជូនដល់អ្នកស្តាប់ និងទស្សនិកជន ។ VOA ត្រូវបានឧបត្ថម្ភថវិកាដោយពលរដ្ឋអាមេរិក ដែលបង់ពន្ធ ហើយVOAជាផ្នែកមួយនៃទីភ្នាក់ងារសហរដ្ឋអាមេរិកសម្រាប់បណ្តាញផ្សាយព័ត៌មានសាកល ។ នេះបើតាមការប្រកាសរបស់ VOA។
នាពេលកន្លងទៅ រាជរដ្ឋាភិបាលកម្ពុជារងការចោទប្រកាន់ថា បានបិទសារព័ត៌មានបរទេសដូចជា អាស៊ីសេរី និងThe Cambodia Daily ដែលមានវត្តមាននៅក្នុងប្រទេសកម្ពុជា ។ ប៉ុន្តែទោះជាយ៉ាងនេះក្តី តាមសេចក្តីថ្លែងការណ៍ កាលពីថ្ងៃទី៣ ខែធ្នូ ឆ្នាំ២០១៨ រាជរដ្ឋាភិបាលកម្ពុជា បានបង្ហាញនូវការប្តេជ្ញាចិត្តយ៉ាងមោះមុត ក្នុងការលើកតម្កើងនូវសិទ្ធិសេរីភាពសារព័ត៌មាន សេរីភាពនៃការបញ្ចេញមតិ ស្របតាមរដ្ឋធម្មនុញ្ញ និងច្បាប់ដែលមានជាធរមាន ។
រាជរដ្ឋាភិបាលបានបញ្ជាក់យ៉ាងច្បាស់ថា វិទ្យុអាស៊ីសេរី និងវិទ្យុសំឡេងសហរដ្ឋអាមេរិក បានផ្តួចផ្តើមគំនិតបិទការិយាល័យតំណាងរបស់ខ្លួនដោយខ្លួនឯង ។ ដូច្នេះវិទ្យុទាំងពីរនេះ ក៏មានសេរីភាពបើកការិយាល័យតំណាងរបស់ខ្លួននៅកម្ពុជាឡើងវិញបានដែរ ។ ដោយឡែក កាសែត The Cambodia Daily បានបិទការិយាល័យដោយសារតែមិនមានលទ្ធភាពបង់ពន្ធជូនរដ្ឋ ។
សូមជម្រាបថា ការសម្រេចអនុញ្ញាតឲ្យវិទ្យុ VOA បើកការិយាល័យនៅកម្ពុជានេះ ក្រោយពីមានជំនួបពិភាក្សាការងាររវាងលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ជាមួយលោក Christopher Service Dechard ជនជាតិអាមេរិក ជាតំណាងស្របច្បាប់របស់វិទ្យុនេះ ៕
ចែករំលែកព័តមាននេះ