សហរដ្ឋអាមេរិក ៖ វេបសាយ POLITICO អាមេរិករៀបរាប់កាលពីថ្ងៃទី៦ មិថុនាថា ប្រមុខពួកអ្នកប្រជាធិបតេយ្យក្នុងសភាអាមេរិក លោកស្រីNANCY PELOSIអះអាងថា លោកស្រីចង់ឃើញលោកដូណាល់ត្រាំជាប់គុក…
សហរដ្ឋអាមេរិក ៖ វេបសាយ POLITICO អាមេរិករៀបរាប់កាលពីថ្ងៃទី៦ មិថុនាថា ប្រមុខពួកអ្នកប្រជាធិបតេយ្យក្នុងសភាអាមេរិក លោកស្រីNANCY PELOSIអះអាងថា លោកស្រីចង់ឃើញលោកដូណាល់ត្រាំជាប់គុក ក្រោយពេលលោកត្រូវចាញ់ឆ្នោតប្រធានាធិបតីនាឆ្នាំ២០២០ ជាជាងត្រូវទម្លាក់តាមនីតិវិធី។
ក្នុងកិច្ចប្រជុំមួយកាលពីថ្ងៃទី៤មិថុនា ជាមួយអ្នកទទួលខុសត្រូវនៃក្រុមសមាជិកសភាគណបក្សប្រជាធិបតេយ្យជាច្រើនរូប លោកស្រីប្រធានសភារូបនោះអះអាងថា ខ្ញុំពុំចង់ឃើញលោកត្រាំត្រូវទម្លាក់ឡើយ តែខ្ញុំចង់ឃើញលោកជាប់គុក។
លោកស្រីប្រធានសភានិយាយថាលោកស្រីយល់ពីជំហររបស់ពួកអ្នក ចង់ទម្លាក់លោកត្រាំ តែនៅមានចំនួនមិនគ្រប់គ្រាន់នៅឡើយ។ លោកស្រីបន្តថា ពេលនេះវាមិនអំណោយផលឡើយ ដែលត្រូវប្រើនីតិវិធិនោះ ដែលអប្រជាប្រិយបំផុតក្នុងការស្ទាបស្ទង់មតិនានារបស់សាធារណជន ហើយសម្រាប់ពេលនេះបើធ្វើត្រូវបរាជ័យ ដោយពុំមានការគាំទ្រគ្រប់គ្រាន់ពីខាងពួកអ្នកសាធារណរដ្ឋ។
លោកស្រីNANCYនិងប្រធានគណៈកម្មការជាច្រើនជាអ្នក ប្រជាធិបតេយ្យបានព្រមព្រៀងគ្នា រក្សាទុករាល់ការជ្រើសរើសនៅលើតុ។ ពួកអ្នកប្រជាធិបតេយ្យបានជជែកពិភាក្សាគ្នាពីជំហានដែលត្រូវដើរ ចាប់តាំងពីការចេញផ្សាយរបាយការណ៍ របស់រដ្ឋអាជ្ញាពិសេសលោកROBERT MUELLER ស្ដីពីការជ្រៀតជ្រែករបស់រុស្ស៊ី ក្នុងការបោះឆ្នោតប្រធានាធិបតីអាមេរិកឆ្នាំ២០១៦។ ក្រោយការសើុបអង្កេតអស់ពេលដ៏យូរលោកបានសន្និដ្ឋានថា ពុំមានការព្រមព្រៀងគ្នារវាងក្រុមអ្នកឃោសនារបស់លោកត្រាំនិងក្រុងមូស្គូឡើយ តែផ្ទុយទៅវិញលោកពុំជំរះមន្ទិលលើការរារាំងតុលាការឡើយ។
លោក MUELLER ពុំបានស្នើឲ្យមានការចោទប្រកាន់លោកត្រាំ ដែលការពារដោយអភ័យឯកសិទ្ធិប្រធានាធិបតី។ ដោយមានសំឡេងភាគច្រើនក្នុងសភា ដែលមានអំណាចធ្វើការស្រាវជ្រាវស៊ើបអង្កេត ពួកអ្នកប្រជាធិបតេយ្យបានលើកពីការស៊ើបអង្កេតនានាប្រឆាំងប្រធានាធិបតី។ ដោយខ្លាចនីតិវិធីដកតំណែង នាំឲ្យមានការបែកបាក់គ្នាកាន់តែខ្លាំងនៅសហរដ្ឋអាមេរិក ដែលពេលនេះកំពុងចាប់ផ្ដើមយុទ្ធនាការឃោសនាបោះឆ្នោត ប្រធានាធិបតីឆ្នាំ២០២០ លោកស្រីNANCY PELOSI បានចោទប្រកាន់លោកត្រាំថា បានធ្វើប្រតិបត្តិការបិទបាំងនានាតែលោកស្រីយល់ថា ជាបឋមគេត្រូវរៀបចំសំណុំរឿងដែលរឹងមាំមួយសិន ដើម្បីអាចបញ្ចុះបញ្ចូលបានអ្នកគាំទ្រកាន់តែច្រើន។
មេដឹកនាំអាមេរិកសំខាន់ទាំង២រូបប្រៀបដូចក្របីនឹងដើមចេក ម្នាក់ៗនាពេលថ្មីៗនេះរហូតដល់ចោទគ្នាទៅវិញទៅមកថាឡប់សតិទៀតផង។ ក្រោយពីហៅលោកស្រីNANCYថាឆ្កួត លោកត្រាំនៅហៅលោកស្រីថា មនុស្សសរសៃប្រសាទ ពេលលោកសន្ទនាជាមួយទូរទស្សន៍FOX NEWSកាលពីថ្ងៃទី៦មិថុនា។ លោកបន្តថាលោកស្រីNANCYជាគ្រោះមហន្តរាយមួយ ហើយពួកអ្នកប្រជាធិបតេយ្យជួបបញ្ហាធំមួយ។
ពេលសួរពីឆន្ទៈរបស់លោកស្រីNANCYចង់ឃើញលោកត្រាំជាប់គុក មនុស្សសំខាន់ម្នាក់នៃសេតវិមាន លោកស្រីMERCEDES SCHLAPPថ្លែងតាមFOX NEWSថា ពិតជាគួរឲ្យអស់សំណើច៕ (កែសម្រួលដោយ ៖ បុប្ផា)
ចែករំលែកព័តមាននេះ