ប្រទេសវៀតណាម ៖ យោងតាមភ្នាក់ងារសារព័ត៌មាន Viet Nam News កាលពីថ្ងៃទី៥ មិថុនា កន្លងមកបានឲ្យដឹងថា ក្រុមហ៊ុនវៀតណាមចំនួន៤០ក្រុមហ៊ុននឹងចូលរួមការធ្វើទស្សនកិច្ចទៅកាន់ទីក្រុង Nanning និង Kunming របស់ប្រទេសចិន នៅកំឡុងពីថ្ងៃទី១០ដល់១៣ មិថុនា ខាងមុខនេះដើម្បីស្វែងរកឱកាសនាំចេញបើទោះបីជាចិនកំពុងមានជម្លោះពាណិជ្ជកម្មជាមួយអាមេរិកក៏ដោយ ។ ការធ្វើទស្សនកិច្ចខាងលើជាផ្នែកមួយនៃកម្មវិធីលើកកម្ពស់ការធ្វើពាណិជ្ជកម្មជាតិក្នុងឆ្នាំ២០១៩ ដែលនឹងមានការចូលរួមពីអ្នកតំណាងភ្នាក់ងារលើកកម្ពស់ពាណិជ្ជកម្មមកពីតំបន់ចំនួន១១នៅប៉ែកខាងជើង ។
ភ្នាក់ងារលើកកម្ពស់ពាណិជ្ជកម្ម (Vietrade) ក្រោមក្រសួងឧស្សាហកម្ម និងពាណិជ្ជកម្មវៀតណាមបានឲ្យដឹងថា ទស្សនកិច្ចនេះមានគោលដៅលើកកម្ពស់ការនាំចេញកសិផល គ្រឿងសមុទ្រ អាហារកែច្នៃ និងសិប្បកម្ម និងសម្លៀកបំពាក់ជាដើម និងបានបន្ថែមថា ពួកគេនឹងជួយដល់ក្រុមហ៊ុនក្នុងស្រុកក្នុងការផ្សព្វផ្សាយពីយីហោពួកគេក្នុងទីក្រុងទាំងនោះផងដែរ ។
ក្នុងកំឡុងពេលនៅប្រទេសចិន ក្រុមប្រតិភូក្រុមហ៊ុននឹងចូលរួមវេទិកាអាជីវកម្មវៀតណាម និងប្រទេសចិននៅ Nanning នៅថ្ងៃទី១០ មិថុនា និងធ្វើទស្សនកិច្ចទៅមជ្ឈមណ្ឌលពាណិជ្ជកម្មកសិផលនៅថ្ងៃទី១១ ផងដែរ ។ ពួកគេក៏នឹងចូលរួមការតាំងពិពណ៌ពាណិជ្ជកម្ម និងសន្និសីទវិនិយោគទ្រង់ទ្រាយធំក្នុង Kunming នៅថ្ងៃទី១២ មិថុនា ទៀតផង ។
Vietrade បានបន្ថែមថា លើសពីនេះទៅទៀតពួកគេនឹងធ្វើដំណើរទៅមជ្ឈមណ្ឌលដឹកជញ្ជូនអាស៊ាន Yunnan មជ្ឈមណ្ឌលពាណិជ្ជកម្មអាស៊ី និងផ្សារផ្លែឈើ និងផលិតផលប្រើប្រាស់ប្រចាំថ្ងៃដើម្បីសិក្សាពីចំណូលចិត្តរបស់ជនជាតិចិនជាដើម ។ ក្នុងកំឡុងពេលជាច្រើនឆ្នាំកន្លងមកនេះទំនាក់ទំនងរវាងវៀតណាម និងខេត្តទាំងពីររបស់ប្រទេសចិនបានជួយនាំយកផលិតផលវៀតណាមឲ្យកាន់តែជិតដៃទីផ្សារប្រទេសចិន និងបាននាំយកផលិតផលចិនមកកាន់ទីផ្សារអាស៊ានផងដែរ ។
បច្ចុប្បន្ននេះទំនាក់ទំនងពាណិជ្ជកម្មរវាងវៀតណាម និងខេត្ត Guangxi របស់ប្រទេសចិន ស្មើ១ភាគ៤នៃទំនាក់ទំនងពាណិជ្ជកម្មរបស់ប្រទេសទាំងពីរទៅហើយ ។ កាលពីឆ្នាំ ២០១៨ ការធ្វើពាណិជ្ជកម្មបានកើនដល់ ២៦.៧ប៊ីលានដុល្លារ ឬកើនឡើងបាន៨%បើធៀបនឹងឆ្នាំ២០១៧ ។ កាលពីឆ្នាំមុន ការធ្វើពាណិជ្ជកម្មរវាងវៀតណាមនិងខេត្ត Yunnan របស់ប្រទេសចិន ក៏បានកើនឡើង១៣%ដែរមកស្មើ៤.១៥ប៊ីលានដុល្លារ ៕
ប្រភព ៖ Vietnam News , កែសម្រួលដោយ ៖ សំណាង
ចែករំលែកព័តមាននេះ