ខេត្តស្ទឹងត្រែង ៖ ជនសង្ស័យម្នាក់ត្រូវកម្លាំងនគរបាលព្រហ្មទណ្ឌកំរិតធ្ងន់ស្នងការដ្ឋាននគរបាលខេត្តស្ទឹងត្រែងស្វែងតាមចាប់ខ្លួនក្រោមបណ្តឹងជនរងគ្រោះក្រោយប៉ុនប៉ង មនុស្សឃាត ដោយចេតនាប្រព្រឹត្តកាលពីយប់ថ្ងៃទី១ មិថុនា ២០១៩ ស្ថិតនៅភូមិគីឡូ៨ សង្កាត់សាមគ្គី ក្រុងស្ទឹងត្រែង ។
យោងតាមប្រភពព័ត៌មានអោយដឹងថា ជនសង្ស័យ រួមជនរងគ្រោះជាបងប្អូនបង្កើតនឹងគ្នា រស់នៅភូមិ សង្កាត់កើតហេតុខាងលើ ។ តាមការអះអាងពីនារីឈ្មោះ ហេង ធាវី អាយុ៣១ឆ្នាំ ជាប្រពន្ធជនរងគ្រោះរៀបរាប់ថា ជនសង្ស័យបានយកឈើក្តារបស់ខ្លួនទៅប្រើប្រាស់ក្រោយប្តីសួរនាំរួចនៅយប់កើត ហេតុជនសង្ស័យបានដើរមកដល់មុខផ្ទះ រួចហៅប្តីរបស់ខ្លួនអោយចេញក្រៅ ហើយទៅចង្អុលមើល៍ថា ឈើក្តាណាជាឈើរបស់ខ្លួន ខណៈ កំពុងឆ្លងផលចង្អុរឈើក្តាស្រាប់តែជនសង្ស័យកាប់ពីក្រោយត្រូវកញ្ចឹង.កមួយកាំបិត និងត្រូវគុម្ពត្រចៀកមួយកាំបិត ។ បន្ទាប់ពីរងរបួសជនរងគ្រោះប្រឹងរត់គេចមកផ្ទះរហូតដួលសន្លប់មុខផ្ទះ ទើបផ្អើលឈូឆរនាំជនរងគ្រោះទៅសង្គ្រោះនៅមន្ទីរពេទ្យបង្អែកខេត្ត ។
លោក ដួង ស៊ីវុត្ថានាយការិយាល័យព្រហ្មទណ្ឌកំរិតធ្ងន់ស្នងការដ្ឋាននគរបាលខេត្តស្ទឹងត្រែងអោយដឹងថា ករណីខាងលើបានកើតឡើង កាលពីថ្ងៃទី១ មិថុនា ២០១៩ ជនរងគ្រោះទើបមកដាក់ពាក្យបណ្តឹងនៅថ្ងៃទី៦ ដោយចោទប្រកាន់លើឈ្មោះ ផាន តុលា អាយុ២៦ឆ្នាំ ប្រើប្រាស់កាំបិតបុ័ងតោកាប់ទៅលើបងប្រុសបង្កើតរបស់ខ្លួនឈ្មោះ ផាន សុចាន់ អាយុ៣១ឆ្នាំ បណ្តាលអោយរងរបួសធ្ងន់ប្រព្រឹត្តនៅភូមិគីឡូ៨ សង្កាត់សាមគ្គីក្រុងស្ទឹងត្រែង ។
ក្រោយទៅទទួលសំណុំរឿងមន្ត្រីនគរបាលយុត្តិធម៌បានស្វែងតាមឃាត់ខ្លួនជនសង្ស័យមកសាកសួរ និងកសាងសំណុំរឿងតាមនីតិវិធី ។ បច្ចុប្បន្នជនសង្ស័យកំពុងគេចខ្លួន ចំណែកជនរងគ្រោះកំពុងសំរាកព្យាបាលនៅមន្ទីរពេទ្យបង្អែកខេត្តស្ទឹងត្រែង ៕ កែសម្រួលដោយ ៖សុឃាក់
ចែករំលែកព័តមាននេះ